JOSHUA 15

₁Tengwa la leloko la Bajuda, ka dilete tša bona, la šupa thoko ya borwa mellwaneng ya Edomo lešokeng la Sini, kua magomong a thoko ya borwa. ₂Mollwane wa bona ka thoko ya borwa o tloga mo magomong a lewatle la letswai, mafelelong a lona a lebago thoko ya borwa. ₃O leba thoko ya borwa ka morotoga wa diphepheng o fetela Sini, wa rotogela Kadese-Baranea, wa fetela Hetserone, wa rotogela Adara, wa aroga wa ya Kareka, ₄wa feta Atsimona wa fihla nokeng ya Egipita, wa yo kgotla ka lewatle.

₅Thoko ya bohlabela mollwane ke lewatle la letswai go fihla mo le tsenwago ke noka ya Jorodane. Gonamoo go gomago lewatle matsenong a Jorodane ke mo go thomago mollwane wa thoko ya leboa.

₆O rotogela Bethe-Hogola, wa rarela Bethe-Araba ka thoko ya leboa, wa hlatlogela leswikeng la Bohani morwa wa Rubeni. ₇O rotoga ka moedi wa Akore wa tla Debiri, wa arogela thoko ya leboa wa ya Giligala fala go lebanego le mmotwana wa Adumima ka thoko ya borwa bja nokana, wa fetela letsheng la Entsemese, wa tla sedibeng sa Rogele. ₈O rotoga mo mogwereng wa Beni-Hinomi o rarela thaba ya Bajebusi ka thoko ya borwa, ke gona Jerusalema; mollwane o rotogela sehlweng sa thaba e bapetšego le mogwere wa Beni-Hinomi ka thoko ya bodikela mo molala wa Refaimi o gomago gona thoko ya leboa. ₉Sehlweng sa thaba yeo mollwane o theogela sedibeng sa nokana ya Nefuthoa, wa fetela metseng ya Efurone, wa arogela Baala, ke gona Kiryathe-Jearima. ₁₀Mollwane o tloga Baala wa leba bodikela thabeng ya Seire, o šika le lehlakore la thaba ya Jearima ka thoko ya leboa; ke gona Kaselone; wa fologela Bethe-Semese, wa fihla Thimina. ₁₁O tšwa moo wa šika le thaba ya Ekironi ka thoko ya leboa, wa tloga o leba Sikerone, wa fetela thabeng ya Baala, wa tšwela Jabiniele wa yo kgotla le lewatle. ₁₂Mollwane ka thoko yeo ya Bodikela ke lewatle le legolo.

Ke yona mellwane ya ba Juda le dilete tša thoko tšohle.

₁₃Ga e le Kalebe morwa wa Jefune o neilwe kabelo le bana ba Juda ka mo Morena a laetšego Joshua, e lego motse wa Araba, tatago Enaki; ke wona motse wa Heburone. ₁₄Gona moo Kalebe a raka Baenaki ba bararo; ke Sesai, le Ahimane, le Thalamai, ba ba tswetšwego ke Enaki. ₁₅A tšwa moo a rotogela go ba gaDebiri. Leina la motse woo kgaleng e be e le Kiryathe-Sefere. ₁₆Kalebe a re: E a hulago motse wa Kiryathe-Sefere a o thopa, ke tlo mo nea Akisa morwedi waka ya ba mosadi wa gagwe. ₁₇Othiniele morwa wa Kenasi ngwanabo Kalebe a o thopa; Kalebe a mo nea morwedi wa gagwe Akisa ya ba mosadi wa gagwe. ₁₈Ya re ge a mmeka a mo otelela gore a kgopele tšhemo go tatagwe. Akisa, a šetše a nametše pokolo, a fologa. Kalebe a re: O hloma bjang? ₁₉Yena a re: A nke o nkatle; ge o ntšeišitše nageng ya lesehla, gona a ko mphe didiba tša meetse. Ke mo Kalebe a mo neilego didiba tša tletlolo le tša tlase.

₂₀Šea magae a ba leloko la Juda ka dilete tša bona: ₂₁Metse ya ba leloko la Juda go tloga magomong a naga ka thoko ya borwa ke motse wa Kabatsiele, le wa Edere, le wa Jaguru, ₂₂le wa Kina, le wa Dimona, le wa Adada, ₂₃le wa Kedese, le wa Hatsora, le wa Jithinani, ₂₄le wa Sifi, le wa Telema, le wa Bealothe, ₂₅le wa Hatsora-Hadathe, le wa Kiryothe-Hatserone, ke gona Hatsora; ₂₆le wa Amami, le wa Sema, le wa Molada, ₂₇le wa Hasara-Gada, le wa Hasimone, le wa Bethe-Pelete, ₂₈le wa Hasara-Suali, le wa Bereseba, le wa Bisiothia, ₂₉le wa Baala, le wa Ijima, le wa Atsema, ₃₀le wa Elitholada, le wa Kesila, le wa Horoma, ₃₁le wa Tsikilaga, le wa Madimana, le wa Sanisana, ₃₂le wa Lebaothe, le wa Silima, le wa Ajina, le wa Rimoni. Ka mokana ga yona ke metse e masome a mabedi le metšo e senyane le metsana ya yona.

₃₃Metse ya mo molaleng ke motse wa Esithaolo, le wa Tsarea, le wa Asina, ₃₄le wa Sanoa, le wa Enganime, le wa Thapua, le wa Enama, ₃₅le wa Jaramuthe, le wa Adulama, le wa Soko, le wa Aseka, ₃₆le wa Saarima, le wa Adithaima, le wa Gedera, le wa Gederothaima. Ke metse e lesome le metšo e mene le metsana ya yona.

₃₇Le wa Tsenana, le wa Hadasha, le wa Migidala-Gada, ₃₈le wa Dileana, le wa Mitsipe, le wa Jokotiele, ₃₉le wa Lakisi, le wa Botsikathe, le wa Egilone, ₄₀le wa Kabone, le wa Lahemasi, le wa Kithilisi, ₄₁le wa Gederothe, le wa Bethe-Dagona, le wa Naama, le wa Makeda. Ke metse e lesome le metšo e selelago le metsana ya yona.

₄₂Le wa Libina, le wa Ethere, le wa Ashani, ₄₃le wa Jifitha, le wa Asina, le wa Netsiba, ₄₄le wa Kegila, le wa Akasibe, le wa Maresa. Ke metse e senyane le metsana ya yona.

₄₅Le wa Ekironi le dinakana tša wona le metsana ya wona, ₄₆le go tloga Ekironi go fihla lewatleng, naga ka moka e šikago le motse wa Asidodo le metsana ya wona, ₄₇le wa Asidodo le dinakana tša wona le metsana ya wona, le wa Gasa le dinakana tša wona le metsana ya wona, go fihla nokeng ya Egipita le lewatleng le e lego wona mollwane.

₄₈Metse ya dithabeng ke wa Samiri, le wa Jathiri, le wa Soko, ₄₉le wa Dana, le wa Kiryathe-Sana, ke gona Debiri, ₅₀le wa Anaba, le wa Esithemo, le wa Anima, ₅₁le wa Gosene, le wa Holoni, le wa Gilo. Ke metse e lesome le motšo o tee le metsana ya yona.

₅₂Le wa Araba, le wa Duma, le wa Esegane, ₅₃le wa Januma, le wa Bethe-Thapua, le wa Afeka, ₅₄le wa Humuta, le wa Kiryathe-Araba, ke wona wa Heburone; le Tsioro. Ke metse e senyane le metsana ya yona.

₅₅Le wa Maoni, le wa Karamele, le wa Sifi, le wa Juta, ₅₆le wa Jeseriele, le wa Jokodeama, le wa Sanoa, ₅₇le wa Kaini, le wa Gibea, le wa Thimina. Ke metse e lesome le metsana ya yona.

₅₈Le wa Halahulu, le wa Bethe-Tsuri, le wa Gedora, ₅₉le wa Maarathe, le Bethe-Anothe, le wa Elithekoni. Ke metse e selelago le metsana ya yona.

₆₀Le wa Kiryathe-Baali, ke wola wa Kiryathe-Jearima, le motse wa Raba. Ke metse e mebedi le metsana ya yona, ₆₁le wa Bethe-Araba wa lebaleng, le wa Medina, le wa Sekaka, ₆₂le wa Mibisani, le wa Letswaing, le wa Engedi. Ke metse e selelago le metsana ya yona.

₆₃Ge e le Bajebusi ba ba agilego Jerusalema, Bajuda ba šitilwe go ba raka. Ke ba baka leo Bajebusi le mehleng yeno ba sa dutšego Jerusalema.