LEFITIKO 2

₁Ge motho a tlišetša Morena sebego sa dijo, gona a e be sa bupi bjo bo tokilwego. A bo tšhele makhura, a bee diorelo godimo. ₂A di iše go baperista, barwa ba Arone. E mongwe wa bona a tabole buping bjoo, a tsapare makhura le diorelo ka moka, mme a di tšhume, e be kgopotšo aletareng, mollo wa monko o bose wa Morena. ₃Se se šalago sa sebego seo sa dijo ke sa Arone le sa barwa ba gagwe, ke se sekgethwakgethwa sa mello ya Morena.

₄Ge o tliša sa dijo tše di tšwago sebešong, gona e be dinkgwa tša bupi bjo bo tokilwego, tše di sa omelwago, tše di tšhetšwego makhura, le dinkgwa tša dimatla tše di tloditšwego makhura.

₅Ge sebego sa gago e le dijo tše di gadikilwego, gona e be tša bupi bjo bo tokilwego, tše di tšhetšwego makhura, tše sa omelwago. ₆O di ngwathaganye maratha, o di tšhele makhura. Ke sebego sa dijo.

₇Ge sebego sa gago e le se se apewago ka pitša, gona se dirwe ka bupi bjo bo tokilwego, le ka makhura. ₈Sebego se se dirilwego ka tšeo, o se tlišetše Morena, se neelwe moperisita, gore a se iše aletareng. ₉Moperisita gona moo sebegong a tabole sa kgopotšo, a se tšhume aletareng. Ke mollo wa monko o bose wa Morena. ₁₀Se se šalago sa sebego seo ke sa Arone le sa barwa ba gagwe. Ke se sekgethwakgethwa sa mello ya Morena.

₁₁Dibego ka moka tše le di tlišetšago Morena, di se ke tša omelwa; ka gobane tše di nago le komelo le ge e le nose, le se ke la di tšhumela Morena. ₁₂Tšona le ka di tliša go Morena e le dibego tša dithakangwaga; fela, mo aletareng di se ke tša tla go ba tša monko wa go natefela Morena. ₁₃Dibego tša gago ka moka o di noke letswai. O se ke wa ba wa hlokiša sebego sa gago letswai la kgwerano ya Modimo wa gago. Dibego tša gago tšohle o di tliše di na le letswai. ₁₄Ge o tlišetša Morena sebego sa dithakangwaga, o tliše ditsetwa tše di gadikilwego; le mabele a a fogohlilwego a magollelo o a tliše e le sebego sa dithakangwaga tša gago. ₁₅O di tšhele makhura, o bee diorelo godimo ga tšona. Ke sebego. ₁₆Moperisita a tabole sa kgopotšo, a se tšhume; a ntšhe go mabele a a fogohlilwego, le go makhura, diorelo a tšee ka moka. Ke tša mollo wa Morena.