Sehlabelo sa pele sa Arone
1Ka tšatši la seswai Moshe o biditše Arone le barwa ba gagwe le bagolo ba Baisiraele. 2A botša Arone a re: Hlaola namane ya kgomo, e be seloba, le kgapana ya sehlabelo, e be tše di se nago bosodi, mme o di tliše pele ga Morena. 3O bolele le Baisiraele o re: Hlaolang pudi ya seloba, le namane le nku, e be tša ngwaga o tee, tše di se nago bosodi; e be tša sehlabelo; 4le kgomo le kgapana, e be sedimo sa seleboga; di hlabelwe Morena; le tliše le sebego sa tše di dubilwego ka makhura; ka gobane lehono Morena o tlo iponagatša go lena.
5Tše di laetšwego ke Moshe ba di tliša mojako wa ngwako wa kgwerano; le phuthego ka moka ya batamela ya ema pele ga Morena. 6Moshe a re: Ke tšona tše Morena a le laetšego tšona; le di dire; mme le tlo bona letago la Morena. 7Moshe a tsebo bolela le Arone a re: Batamela aletare, o fihliše seloba sa gago, o itirele poelanyo; o tsebo fihliša sebego sa batho ba setšhaba, o ba direle poelanyo, bjalo ka ge Morena a laetše.
8Arone a batamela aletare a hlaba namane ya seloba sa gagwe. 9Barwa ba gagwe ba mo tlišetša madi a yona; a ina monwana mading, a fetša dinaka tša aletare ka ona; madi a a šetšego a a tšhollela fase aletareng. 10Makhura le dipshio, le sebetšana, e lego tša seloba, a di tšhuma mo aletareng, bjalo ka ge Morena a laetše Moshe. 11Dinama le letlalo a di fiša ka mollo ka ntle ga mešaša.
12A tsebo hlaba sehlabelo; barwa ba gagwe ba mo tlišetša madi a sona, a a fokela aletareng thoko tšohle. 13Ba mo tlišetša le sehlabelo se phakologantšwe, le hlogo; a di tšhuma mo aletareng. 14A hlatswa mala le mehlahu, a di tšhuma godimo ga sehlabelo mo aletareng.
15Ya ba gona a tlišitšego sebego sa setšhaba; a tšea phoko ya seloba sa setšhaba, a e hlaba, ya ba seloba, a e dira ka mokgwa wa namane yela. 16Le sehlabelo a se tliša, a se dira ka mokgwa wa sona. 17A tliša le dibego tša dijo a tabola ka seatla sa gagwe, a di tšhuma aletareng, go šetše go tlišitšwe sehlabelo sa bosasa. 18A hlaba powana le kgapana, ya ba sedimo sa seleboga se se tšwago go setšhaba; barwa ba gagwe ba mo tlišetša madi a tšona, a a gaša lehlakoreng la aletare thoko tšohle. 19Ba mo tlišetša le makhura a powana, le a kgapana, le mosela, le lebipi, le dipshio, le sebetšana. 20Makhura ba a bea godimo ga maumo; ona ba a tšhuma aletareng. 21Maumo ona le maoto a le letona, Arone a a ekara pele ga Morena, bjalo ka ge Moshe a laetše.
22Gomme Arone a emiša matsogo a gagwe a lebane le setšhaba, mme a se šegofatša; a tloga mo aletareng a phethile seloba, le sehlabelo, le sedimo sa seleboga. 23Gomme Moshe le Arone ba tsena Ngwakong wa Kgwerano. Ge ba etšwa gona, ba šegofaditše setšhaba ka moka. 24Ya ba gona go tlilego mollo o etšwa go Morena, wa fiša sehlabelo le makhura mo aletareng. Setšhaba ka moka sa di bona, sa hlalala, sa lotšha.
