LUKA 23

₁Gomme lešaba ka moka la ema, la mo iša go Pilato. ₂Ba thoma go mmega ba re: Motho yo re mo hwetša a fapoša setšhaba; o iletša batho go ntšhetša Kesara motšhelo; o re: Ke nna Kriste, ke kgoši.

₃Pilato a mmotšiša a re: A ke wena Kgoši ya Bajuda?

Jesu a fetola a re: O boletše.

₄Pilato a bolela le baperisita ba bagolo le mašaba a batho, a re: nna ga ke hwetše molato go motho yo.

₅Ya ba gona ba phegelelago ba re: O ferekanya batho ka go ruta gohle mo nageng ya Juda; o thomile kua Galilea a ba a tla fano.

₆Pilato ge a ekwa ba bolela Galilea, a botšiša ge e le motho wa Galilea. ₇Ge a ekwa gore ke wa mmušo wa Herode, a mo romela go Herode yo le yena a bego a le Jerusalema mehleng yeo. ₈Herode ge a bona Jesu, a thaba gagolo, gobane e be e šetše e le kgale a rata go mmona ka baka la ditaba tše ntši tša gagwe tše a bego a di kwile; mme a holofela gore o tlo mmonna ge a dira mohlolo. ₉A mmotšiša ditaba tše ntši; fela, Jesu a se mo fetole le ka se tee. ₁₀Baperisita ba bagolo le bamangwalo, bona ba ema ba mmega ba befetšwe. ₁₁Ge e le Herode a mo nyatša, a mo kwera, a na le bahlanka ba gagwe, a mo apeša kobo e tšhweu, a mo gomišetša go Pilato. ₁₂Ka lona tšatši leo, Pilato le Herode ba thoma go kwana, gobane kgale ba be ba hloyane.

₁₃Pilato a bitša baperisita ba bagolo le bagolo ba sethšaba ba tle kgauswi, ₁₄A bolela le bona a re: Motho yo le mo tlišitše go nna la re o fapoša setšhaba. Gomme šefa, ke mo sekišitše, ka hwetša ditaba tše le mmegago ka tšona di se gona, le ge e le e tee ya tšona. ₁₅Le Herode o realo; gobane ke le rometše go yena, gomme šedi; ga a ka a dira se a swanetšego go bolawa ka baka la sona. ₁₆Ke gona ke tlo mo itia ke mo golole. ₁₇A realo ka gobane ka monyanya o be a swanetše go ba gololela e mongwe wa batlengwa.

₁₈Gomme lešaba ka moka la goa la re: Tloša e; re gololele Baraba! ₁₉Gomme monna eo o be a lahletšwe kgolegong a tsošitše mpherefere motseng, a bolaile motho.

₂₀Bjale Pilato a buša a hlaboša lentšu a bolela le bona a rata go golola Jesu. ₂₁Bona ba tšhologa legoa ba re: Mmapole! Mmapole!

₂₂Pilato a bolela nabo la boraro a re: Gomme bosenyi bjo a bo dirilego ke bofe? Nna ga ka hwetša molato go yena le o tee o kago swanela polao. Ke gona ke tlo mo itia, ke mo golole.

₂₃Bona ba tsoga ka lešata le legolo, ba re a bapolwe; mme megoo ya bona ya fenya. ₂₄Pilato a ahlola a re: go dirwe se ba se nyakago. ₂₅A golola motho eo a bego a lahletšwe kgolegong ka baka la mpherefere le polao, yo bona ba mo hlaotšego; gomme Jesu a mo gafela bona gore a dirwe se bona ba se ratago.

₂₆Ba sa mo iša, ba swara monna e mongwe, Simone wa Kirene, e a bego a boa nageng, ba mo rwadiša sefapano ba re a latele Jesu a mo rwaletše.

₂₇Gomme Jesu a ya a latetšwe ke lešaba le lentši la batho le la basadi ba ba bego ba itshetla dihuba ba mo llela. ₂₈Bona, Jesu a ba retologela a bolela le bona a re: Lena barwedi ba Jerusalema, lesang go llela nna. Iteleleng, le llele le bana ba lena. ₂₉Le tsebe gobane go tlo tla mehla yeo ba tlo go re: Ba lehlogonolo ke baopa, le mala a sa kago a belega, le mabele a sa kago a amuša! ₃₀Ke mo ba tlogo bolela ba era dithaba ba re: Re weleng, ba era meboto ba re: Re khupetšeng! ₃₁Gobane ge sehlare sa moketla ba se dira ka mokgwa wo, se se omilego se tlo dirwa eng?

₃₂Le ba bangwe ba babedi ba disenyi ba išwa le yena gore ba yo bolawa. ₃₃Ge ba fihlile mo ba bego ba re ke Legateng, ba mmapola sefapanong; ba bapola le disenyi tšeo, se sengwe sa ba ka letsogong le letona, se sengwe sa ba ka go le letshadi. ₃₄Gomme Jesu a bolela a re: Tata! Ba lebalele, gobane ga ba tsebe se ba se dirago!

-- Gomme ba arolelana diaparo tša gagwe ka go dira matengwa. ₃₅Batho ba be ba eme ba lebeletše. Ge e le ba bagolo, bona ba mo kgoba ba re: O phološitše ba bangwe; a a iphološe, ge e le Kriste Mokgethwa wa Modimo.

₃₆Le bahlabani ba mo kwera; ba batamela ba mo tlišetša mokgope. ₃₇Ba re: Ge o le Kgoši ya Bajuda, iphološe.

₃₈Ka godimo ga hlogo ya gagwe go be go beilwe lengwalo, le le ngwadilwego ka Seroma le ka Segerika le ka Sehebere, la re: YO KE YENA KGOŠI YA BAJUDA.

₃₉E mongwe wa basenyi bao ba ba bego ba fegilwe, a mo roga a re: Ge o le Kriste, iphološe; le rena o re phološe.

₄₀Yola e mongwe a fetola, a mo kgala a re: Anthe le wena ga o boife Modimo, le ge o wetšwe ke kotlo bjalo ka yena? ₄₁Ge e le rena go re swanetše, gobane re dirwa se se lebanego ditiro tša rena. Ge e le yo, ga a ka a dira se se sa lokago le se tee. ₄₂A tsebo bolela le Jesu a re: Morena! O nkgopole ge o etla ka mmušo wa gago.

₄₃Jesu a fetola a re: Ruri, ke a go botša lehono o tlo ba le nna Paradiseng.

₄₄Ka nako ya go selela naga ka moka ya welwa ke leswiswi go fihla nakong ya senyane. ₄₅Letšatši la fifala; gomme lešela la sešireletšo Ntlongkgethwa la gagoga ka bogare. ₄₆Gomme Jesu a hlaboša lentšu a re: Tata! Moya wa ka ke o gafela diatleng tša gago! Ge a itšalo a fela moya.

₄₇Gomme tona ya lekgolo, ge e bona tše di diregilego, ya reta Modimo ya re: Ruri, motho e e be e le moloki.

₄₈Le mašaba ka moka a a bego a phuthegetše go bogela dilo tšeo, ge a bona tše di diregilego, a boela gae a itshetla dihuba. ₄₉Ba ba bego ba tsebana le Jesu, le basadi bala ba go mo latela ba etšwa Galilea, ka moka ba be ba emetše kgakala, ba di bona.

₅₀Gomme monna e mongwe, yo leina la gagwe e lego Josefa, e mongwe wa matona a lekgotla, monna yo bolo e a lokilego, ₅₁yo a sa kago a dumela morero wa bona le tše ba di dirilego, e be e le wa Arimathea motse o mongwe wa Bajuda; mme le yena o be a letetše mmušo wa Modimo; ₅₂yena a tla go Pilato a kgopela mmele wa Jesu. ₅₃A o fegolla, a o phuthela ka mašela, a o bea lebitleng le le kgorilwego leswikeng, leo go sešogo gwa fihlwa motho go lona. ₅₄Letšatši leo e be e le la go itokiša, gomme Sabatha e be e šetše e batametše.

₅₅Basadi bala ba go tla le yena ba etšwa Galilea, ba be ba latetše, ba bona lebitla, le ka mo ba mmolokago ka gona. ₅₆Ba boela gae, ba lokiša dinoko le ditlolo; mme ka la Sabatha ba khutša ka go ya ka molao.