MATEO 12

₁Ka mohla o mongwe wa Sabatha Jesu o be a phatša mašemong. Barutiwa ba gagwe ba swerwe ke tlala, ba thoma go kga diako ba di ja. ₂Bafarisei ge ba bona fao, ba bolela nae ba re: Bona! Barutiwa ba gago ba dira se se sa swanelago go dirwa ka Sabatha.

₃Jesu a fetola a re: A ga la bala se Dafida a kilego a se dira mohla wola a swerwe ke tlala, a na le batho ba gagwe? ₄Ka mo a nago a tsena Ngwakong wa Modimo, a ja magobe a go bewa pele ga Morena, a go bego go sa swanela go ka lewa ke yena le batho ba gagwe, ge e se baperisita fela? ₅Le gona, a ga la bala Molaong gore ka Sabatha baperisita mo Ntlongkgethwa ba goboša Sabatha, ba se be le molato? ₆Gomme nna ke le botša ke re: Yo e lego e mogolo go Ntlokgethwa o fa. ₇Gomme ge le ka be le hlatha lentšu le rego: Se nna ke se ratago ke kgaugelo, ga se sedimo, -- le ka be le lesitše go lahla ba ba se nago molato. ₈Gobane Morwamotho, le tšatši la Sabatha ke yena Mong wa lona.

₉A feta a tla phuthegong ya bona. ₁₀A hwetša go na le motho wa letsogo le le omeletšego. Ba mmotšiša ba re: A go swanetše ge go fodišwa motho ka Sabatha? -- Ba realo e le go nyaka molato go yena.

₁₁Jesu a fetola a re: Motho ke mang mo go lena, yo e rego ge a na le nku e tee, ya wela moleteng ka Sabatha, e a ka se kego a e swara a e ntšha? ₁₂Bjale motho, a ga a fete nku gagologolo? Gona go dumeletšwe go dira botse ka Sabatha. ₁₃Ya ba gona a bolelago le motho eo, a re: Otlolla letsogo la gago!

A le otlolla, la boela le fodile, le etša lela le lengwe. ₁₄Ge e le bafarisei, bona ba tšwa, ba lakana go mmolaya.

₁₅Jesu, ka go ba lemoga, a tloga felo fao, a latelwa ke mašaba a mantši a batho; a fodiša bohle. ₁₆A ba laela a re ba se ke ba mmolela. ₁₇Ke mo go phethegilego se se boletšwego ke Jesaya moporofeta ge a re: ₁₈Mohlanka wa ka šo, yo ke mo hlaotšego, moratwa wa ka e a kgahlago pelo yaka. Ke tlo bea Moya wa ka mo go yena, mme o tlo tsebiša ditšhaba kahlolo. ₁₉A ka se ke a omana, a ka se ke a goa, go ka se ke gwa ba e a kwago lentšu la gagwe mekgotheng. ₂₀Lehlaka le le thinyegilego a ka se ke a le thokgela ruri; mme lebonenyana le le kunyelelago a ka se le timele ruri, a tlo ba a tšweletša phenyo kahlolong. ₂₁Mme ditšhaba di tlo holofela ina lagwe.

₂₂Ka lebaka leo gwa tlišwa motho, e a nago le moya o mobe, e le sefofu le semuma; Jesu a mo fodiša; mme motho eo wa sefofu le semuma a bona, a bolela. ₂₃Mašaba ka moka a tlabega, a re: Afa yo ga se yena Morwa Dafida?

₂₄Ge e le bafarisei, bona ge ba ekwa tšeo, ba re: Motho yo, ge a leleka meoya e mebe, o dira ka Beletsebulu kgoši ya meoya e mebe; ga se tše dingwe.

₂₅Gomme Jesu ka ge a tseba kgopolo tša bona, a re: Mmušo ofe le ofe, ge o ikgaoganya, o a šwalalana; le ngwako ge o ikgaoganya, ga o eme. ₂₆Bjale ge Sathane a ka leleka Sathane, ge a ikgaoganya, mmušo wa gagwe o tlo ema bjang? ₂₇Ge le re nna ke leleka meoya e mebe ka Beletsebulu, ge e le barwa ba lena ba e leleka ka mang? Ke gona, baahlodi ba lena e tlo ba bona. ₂₈Nna bjale ge ke leleka meoya e mebe ka Moya wa Modimo, ke gona ge mmušo wa Modimo o tlile go lena.

₂₉Ka gobane ngwakong wa mogale motho a ka tsena bjang a thopa dilo tša gagwe, ge a sešo a tlema mogale eo, a kgona a thopa ngwako wa gagwe?

₃₀E a sa emego le nna, o lwa le nna; le e a sa kgobelego le nna, o a gašanya. ₃₁Ke ka baka leo ke rego: Batho ba tlo lebalelwa sebe mang le mang, le yona thogako; fela, go rogaka Moya, batho ba ka se ke ba go lebalelwa. ₃₂Le gona, e a boletšego lentšu a ganetša Morwamotho, o tlo lebalelwa; fela e a ganetšago Moyamokgethwa, a ka se ke a ba a lebalelwa lebakeng leno le lebakeng le le tlo go tla.

₃₃Sehlare, le re ke se se botse, ge dienywa tša sona e le tše botse. Sehlare, le re ga se tsebalege, ge se enywa tše di sa tsebalegego. Sehlare se tsebja ka kenyo. ₃₄Lena matswinyana a dinoga, le ka kgona bjang go bolela tše di botse mola le le ba babe? Gobane molomo o bolela tše pelo e di falatšago. ₃₅Motho yo botse o ntšha tše botse lehumong le le botse la pelo; motho e mobe o ntšha tše mpe lehumong le lebe.

₃₆Mme ke a le botša, ka tšatši la kahlolo batho ba tlo sekišwa mantšu ohle a lefela a ba a boletšego. ₃₇Ke mantšu a gago a tlo go go emela; mme ke mantšu a gago a tlo go go bea molato.

₃₈Ke mo ba bangwe ba bamangwalo le ba bafarisei ba boletšego le yena ba re: Moruti, re rata go bona ge o dira mohlolo.

₃₉Jesu a fetola a re: Moloko o mobe wo wa bahladi o nyaka mohlolo; mme o ka se ke wa fiwa mohlolo o mongwe, ge e se mohlolo wa Jona moporofeta. ₄₀Gobane boka Jona ge a fetša matšatši a mararo le mašego a mararo a le mpeng ya hlapikgolo, le Morwamotho o tlo fetša matšatši a mararo le mašego a mararo a le pelong ya lefase. ₄₁Banna ba Ninife mohla wa kahlolo ba tlo tsoga ba lebana le moloko wo ba o tšwa; gobane bona ba sokologile ka mokgoši wa Jona. Gomme tsebang, yo e lego e mogolo go Jona o fa. ₄₂Mohumagadi wa borwa mohla wa kahlolo o tlo tsoga a lebana le moloko wo a o tšwa; gobane yena o tlile a etšwa pheletšong ya lefase, a kwa bohlale bja Salomo. Gomme tsebang, yo e lego e mogolo go Salomo o fa.

₄₃Mohla moya wa ditšhila o tšwago go motho, o a putlaputle dinaga tša lesehla; o nyaka bokhutšo a se bo hwetše. ₄₄Ke mo a rego: Ke tlo boela ngwakong waka wo ke tšwilego go wona! Gomme ge a fihla gona, o o hwetša o le fela, o fsietšwe o hlophilwe. ₄₅Bjale o a ye a boe le e mengwe meoya e šupago, e o fetišago ka bobe, mme o tsene o dule gona; mme tša mafelo a motho eo e be tše mpe, tše di fetišago tša pele. Moloko o mobe wo o tlo tlelwa ke tše bjalo.

₄₆A re a bolela le batho, gwa rotoga mmagwe le bana babo; ba ema ntle, ba nyaka go bolela le yena. ₄₇Motho e mongwe a mmotša a re: Mmago šoo, le bana beno; ba eme fao ntle; ba nyaka go bolela nago?

₄₈Jesu a fetola a bolela le monna eo a re: Mmane ke mang? Le bana bešo ke bomang? ₄₉A emiša letsogo a šupa barutiwa ba gagwe, a re: Mmane šo, le bana bešo! ₅₀Gobane mang le mang e a dirago thato ya Tate wa magodimong ke ngwanešo, ke kgaetšedi ya ka le mmane.