Tagafalo ya Jesu, segafa sa ngwedi, šeleng ya lekgetho
1Ge go fetile matšatši a selelago, Jesu a tloga a na le Petro, le Jakobo, le Johane monnagwe; mme ba ya thabeng e telele ba nnoši. 2A fetoga lebopo ba mo lebeletše, sefahlogo sa gagwe sa phadima bjalo ka letšatši, diaparo tša gagwe tša šweufala wa seetša. 3Ba bona go tšwelela Moše le Eliya, ba tla ba bolela le yena. 4Petro a bolela a re: Morena ke mo go botse ge re le fa; ge o rata re ka hloma mekutwana e meraro fa, o mongwe e be wa gago, o mongwe e be wa Moše, o mongwe e be wa Eliya.
5A re a sa bolela, gwa tla leru le le editšego la ba apeša ka moriti; ba kwa lentšu le etšwa lerung, le re; yo ke yena Morwamoratwa wa ka, yo ke kgahlwago ke yena; le mo kwe.
6Barutiwa ge ba ekwa lentšu leo, ba wa ka difahlogo, ba boifa ka kudu. 7Jesu a tla go bona a ba kgwatha a re: Tsogang, le se boife. 8Ge ba taditetša mahlo, ba se ke ba bona motho, ge e se Jesu a nnoši.
9Ge ba fologa thabeng, Jesu a ba laela a re: Le se ke la botša motho pono ye, Morwamotho a be a tsoge bahung.
10Barutiwa ba gagwe ba mmotšiša ba re: Bamangwalo ba rang ge ba re: Go swanetše go thoma go tla Eliya?
11Jesu a fetola a re: Eliya ke wa go tla pele, le go lokiša tšohle. 12Gomme ke a le botša: Eliya o be a tlile, mme ga ba ka ba mo tseba. Ba mo dirile ka mo ba ratilego. Le Morwamotho ba tlo mo dira ka mokgwa woo; ba tlo mo tlaiša.
13Barutiwa gomme ba lemoga gobane o ba botša tša Johane Mokolobetši.
14Ya re ge ba boela bathong, gwa tla motho e mongwe, a mo khunamela ka matolo, 15A re: Morena, gaugela morwa wa ka. O na le bogafa bja ngwedi, mme o tlaišega o mobe; gobane ke gantši a wela mollong; ke gantši a wela le meetseng. 16Ke be ke mo tlišitše go barutiwa ba gago; bona ba palelwa go mo fodiša.
17Jesu a fetola a re: Aowii! Moloko o sa dumelego, o sa tsebalegego! Ke tlo ba le lena go le gokae? Ke tlo le kgotlelela go le gokae? Mo tlišeng fa go nna. 18Jesu a napa a kgalema moya woo, mme wa tšwa; mošemanyana a fola ka yona nako yeo.
19Barutiwa ba tla go Jesu ba bolela le yena thopeng, ba re: Ke ka baka lang ge rena re paletšwe go o leleka?
20Jesu a re: Le šitišitšwe ke go hlaela tumelo; gobane ke le botša therešo ge ke re: Ge le ka ba le tumelo e kakago thorwane ya lehloko, le ka bolela le thaba ye la re: Tloga mo, o ye kua; ya tlo tloga ya ya. Go ka se ke gwa ba le se se le palelago. 21Fela, mohuta wo wa meoya e mebe ga o tšwe ge e se ka thapelo le ka go ikona.
22Ge ba sepela le naga ya Galilea, Jesu a bolela le bona a re: Morwamotho o tlo gafelwa diatleng tša batho. 23Ba tlo mmolaya, mme ka tšatši la boraro o tlo tsoga,
Ge a realo ba nyama gagolo.
24Ge ba tsena Kaperenaume, ba lekgetho la phuthego ba tla go Petro ba re: A moruti wa lena ga a ntšhe lekgetho?
25Petro a re: O a ntšha.
Ya re ge a tsena ngwakong, Jesu a mo rakapele a re: Simone, go bjang ge o bona; dikgoši tša lefase di tšea lekgetho le dibego go bomang? A di tšhediša bakgomana goba batho ba bangwe?
26Petro a re: Ba tšhediša batho ba bangwe.
Jesu a re: Anthe bakgomana ga ba tšhele! 27Fela, re se ba kgopiše. Yaa lewatleng, o lahlele kgwega o sware hlapi ye e tlo go rotoga pele. E tlo re ge o e ahlamološa molomo, o tlo hwetša e hupile tšhelete ya lekgetho. Tšea yona, o ba fe, e be go ntšhetša nna le wena.
