MIKA 6

₁Kwang se Morena a se bolelago; o re: Ema! Sekišana le ditšhaba, mme meboto e kwe lentšu la gago.

₂Hee lena dithaba! Lena metheo ye e tiilego ya lefase, kwang kgang ya Morena! Morena o sekiša tšhaba sagwe, o fetolana le Isiraele.

₃Wena setšhaba sa ka! Ke go dirileng? Ke go tenne kang? O ko mphetole. ₄Ke go ntšhitše nageng ya Egipita. Ke go lopolotše o le kua ntlong ya bohlanka. Ke romile Moshe le Arone le Miryama ba go etapele. ₅Wena setšhaba sa ka! Gopola Balaka kgoši yela ya Moaba, se a se rerilego, le se Bileama morwa wa Beoro a mmoletšego sona; le tša mola le etšwa Sithima, la ba la tsena Giligala. Di gopole o lemoge mabobo a Morena.

₆Ke tlo ipega kang pele ga Morena, ke lobe Modimo wa godimo? A nka lebana nae ka didimo, ka mamane a ngwagola? ₇Afa Morena a ka kgahlwa ke dikete tša dikgapa? Le makhura a elago boka noka tše diketekete a a ka mo kgahla? A nka lefa dikarogo ka morwake yo mogolo? Ka lefa mabobe a moya wa ka ka ngwana wa mmele wa ka? ₈Hee wena motho! O boditšwe se e lego se sebotse, le se Morena a se nyakago go wena: Ke go dira toko, ke go rata botho; ke go sepela le Modimo wago o ne boipoetšo.

₉Lentšu la Morena le bitša motse wo. Bohlale ke go šia ina la Morena. Kwang kgati, le yo a e beilego. ₁₀A ntlong ya mosenyi go sa le mahumo a bohodu? A go sa le moelo wo o hlaswegago wa go kotobetša? ₁₁A nka se sole ge go na le seelo sa go fora, le mokotlana wa kelo tša go ja moreki? ₁₂Gobane bahumi ba gona ba bata šoro; batho ba motse wo ba bata maaka, mme leleme maganong a bona ke la go fora. ₁₃Bjale le nna ke tlo go hlokofatša ka go otla, ka go šwalalanya ka baka la dibe tša gago. ₁₄O tlo ja, mme wa se hore, mala a gago a šala le tlala. Ge o thopile, o ka se goroše. Le ge o ka goroša selo, ke tlo se gafela lerumo. ₁₅O tlo bjala wa se bune; o tlo kgatla tlhware wa se tlole ka makhura, wa hlotla morara wa se o nwe. ₁₆Ba lotola mekgwa ya Omiri; ka moka ke mediro ya moloko wa Ahaba. Le ya ka maano a bona. -- Bjale nna ke tlo go dira setšhošetši; baagi ba gago e tlo ba ba go kwerwa; mme kgobogo ya setšhaba sa ka e tlo le imela.