MAREKA 10

₁A tsoga moo a ya mathokong a naga ya Juda mošola wa noka ya Jorodane. Mašaba a buša a tla a bokana; mme Jesu a dira ka mo a lemetšego ka gona, a ba ruta.

₂Gwa tla bafarisei ba mmotšiša ge go swanetše ge monna a hlala mosadi.

₃Jesu a fetola a re: Moshe o le laetšeng?

₄Bona ba re: Moshe o dumetše gore go ngwalwe lengwalo la tlhalo, go hlalwe.

₅Jesu a re: Taelo yeo o le ngwaletše yona ka baka la bothata bja dipelo tša lena; ₆fela, mathomong a tlholo Modimo o ba dirile monna le mosadi; gwa thwe: ₇Ka baka leo monna o tlo tlogela tatagwe le mmagwe, a gomarela mosadi wa gagwe; gomme ba tlo ba nama e tee. ₈Ge go thwe: Ba tlo ba nama e tee, ke go re ga e sa hlwe e le ba babedi; ke nama e tee. ₉Bjale, se Modimo a se tlemagantšego motho a se ke a se aroganya.

₁₀Ba le ka ngwakong, barutiwa ba gagwe ba mmotšiša gape taba ye. ₁₁Yena a re: Motho e a hlalago mosadi wa gagwe a tšea e mongwe, o dira bootswa ka yena. ₁₂Mosadi ge a hlala monna wa gagwe, a tšewa ke e mongwe, o dira bootswa.

₁₃Gomme ba tliša bana go Jesu, gore a ba sware; mme barutiwa ba kgalemela ba ba ba tlišago. ₁₄Jesu ge a bona, tša mmefela; a bolela le bona a re: Lesang bana ba tle go nna; le se ke la ba thibela, gobane mmušo wa Modimo ke wa ba bjalo. ₁₅Ruri, ke a le botša, motho e a sa amogelego mmušo wa Modimo bjalo ka ngwana, a ka se ke a ba a tsena go wona. ₁₆Mme a ba gokara, a ba bea diatla a ba šegofatša.

₁₇Ge a tloga moo, a sa wela tsela, monna e mongwe a tla a kitima, a mo khunamela, a mmotšiša a re: Moruti yo botse: Ke tlo dirang gore ke rue bophelo bjo bo sa felego?

₁₈Jesu a re: O reng ge o re “yo botse” o era nna? Ga go yo botse ge e se Modimo fela. ₁₉Melao o a e tseba, e re: O se ke wa otswa; o se ke wa bolaya; o se kê wa bolela bohlatse bja maaka; o se ke wa fora; godiša tatago le mmago.

₂₀Monna yoo a fetola a re: Moruti, tšeo ka moka ke di lotile go tloga bjaneng bja ka.

₂₁Jesu a mo lebelela a mo rata; a re: O sa hlaelelwa ke se sengwe. Sepela o yo rekiša tšohle tše o nago natšo, o di abele bahloki. Ke mo o tlogo ba le lehumo kwa legodimong; mme o tle o ntatele, o rwale sefapano. ₂₂Monna yoo lentšu le la mo hlaba; a tloga a nyamile, ka gobane o be a na le mahumo a mantši.

₂₃Jesu a retologa a lebelela barutiwa ba gagwe, a re: E a nago le mahumo, ge a re ke tsena mmušong wa Modimo, ga se ka bothata!

₂₄Barutiwa ba tlabega ge a realo. Jesu a bolela gape a re: Bana ba ka! Go tsena mmušong wa Modimo, ga se ka go thatafalela bao ba botilego mahumo! ₂₅Mohumi, go tsena mmušong wa Modimo, go kaone ge kgomo e re ke tsena ka lešobana la tšhwana.

₂₆Ya ba gona barutiwa ba tlabegago kudu; ba botšana ba re: Gona go ka phologa mang?

₂₇Jesu a ba lebelela, a re: Mo go batho seo ga se kgonege; se kgonegago Modimo; gobane go Modimo ke mo go kgonegago tšohle.

₂₈Petro a tla le tša gagwe a re: O ko bone; rena re tlogetše tšohle ra go latela.

₂₉Jesu a fetola a re: Ruri, ke a le botša, ga go e a tlogetšego lapa, goba bana babo, goba dikgaetšedi, goba tatagwe, goba mmagwe, goba mosadi, goba bana, goba mašemo, e le ka baka la ka le ka baka la Ebangedi, ₃₀e a se tlo go boelwa ke lekgolo ka se tee sa tšona, e sa le bophelong bjono, a hwetša malapa, le bana babo, le dikgaetšedi, le bommagwe, le bana, le mašemo, le tšona ditlaišego; mme mehleng e tlogo tla o tlo hwetša bophelo bjo bo sa felego. ₃₁Ba bantši e lego ba pele, e tlo ba ba morago; ba morago e tlo ba ba pele.

₃₂Mohla ba le tseleng, ba rotogela Jerusalema, Jesu a ba etile pele, ba be ba sepela ba tlaletšwe ba swerwe ke poifo. A buša a ba bitša, bona ba lesome le metšo e mebedi, a ba botša tše di tlogo mo diregela. ₃₃A re: Bonang! Re rotogela Jerusalema; gomme Morwamotho o tlo gafelwa baperisita ba bagolo le bamangwalo; mme ba tlo mo ahlolela go bolawa, ba mo gafela bantle. ₃₄Ba tlo mo kwera, ba mo otla, ba mo tshwela ka mare, ba mmolaya; gomme ka tšatši la boraro o tlo tsoga.

₃₅Gwa tla Jakobo le Johane barwa ba Tsebedeo, ba re: Moruti re rata ge o ka re direla se re tlogo se kgopela.

₃₆Jesu a re: Le rata ge nka le direlang?

₃₇Bona ba re: Re fe gore re dule le wene letagong la gago; e mongwe a dule ka letsogong la gago le letona, e mongwe a dule go la ntsogošo.

₃₈Jesu a fetola a re: Ga le tsebe se le se kgopelago. Senwelo se ke se nwago, a le ka kgona go se nwa? Le kolobetšo ye ke kolobetšwago ka yona a le ka kgona go kolobetšwa ka yona?

₃₉Bona ba re: Re ka kgona.

Jesu a re: Ge e le senwelo se ke se nwago, le tlo se nwa; le kolobetšo ye ke kolobetšwago ka yona, le tlo kolobetšwa ka yona. ₄₀Ge e le go dula ka letsogong la ka le letona le go la ntšogošo, ga se mo nkago nea motho: go tlo newa ba ba go lokišeditšwego.

₄₁Ya re ge ba lesome ba di kwa, ba hlonamela Jakobo le Johane. ₄₂Jesu a ba bitša, a bolela le bona a re: Le a tseba; bao batho ba rego ke marena a ditšhaba, ba a di buša; mme bagolo ba di dira ka bogoši. ₄₃Go lena go se ke gwa ba bjalo. E a ratago go ba yo mogolo mo go lena, a a be modiredi wa lena. ₄₄E a ratago go ba wa pele mo go lena, a a be mohlanka wa lena. ₄₅Gobane le yena Morwamotho ga a ka a tlela go direlwa; o tlile go direla le go neela bophelo bja gagwe gore e be topollo ya ba bantši.

₄₆Ba fihla motseng wa Jeriko. Ge a etšwa motseng woo a na le barutiwa ba gagwe le lešaba le legolo, gwa ba go dutše motho wa sefofu hleng ga tsela a kgopela; e be e le Baratimeo morwa wa Timeo. ₄₇Ge a ekwa gore ke Jesu wa Natsaretha, a thoma go goeletša a re: Jesu Morwa wa Dafida, nkgaogele!

₄₈Ba bantši ba mo kgalema ba re a homole; ya ba gona a hlabošago lentšu ka kudu, a re: Morwa-Dafida, nkgaogele!

₄₉Jesu a ema a re ba mmitše.

Ba mmitša, monna yoo wa sefofu, ba re: Beta pelo! Tsoga o eme! O a go bitša.

₅₀Yena a lahla kobo ya gagwe, a tsoga, a tla go Jesu.

₅₁Jesu a mmotšiša a re: O rata ge nka go dirang?

Sefofu sa re: Moruti wa ka: Ke boele ke bone!

₅₂Jesu a re: Sepela! Tumelo ya gago e go phološitše.

Monna yoo a boela a bona a sa le moo; a wela tsela a latela Jesu.