Diswantšho: Mobjadi, lebone, peu. Ledimo lewatleng
1A buša a thoma go ruta lewatleng, a phuthegelwa ke lešaba le lentši, a ba a namela leselawatle, a dula mo go lona le le lewatleng, lešaba ka moka le eme lešing la lewatle. 2A ba ruta ditaba tše ntšintši ka diswantšho; a ba anegela thuto ya gagwe a re:
3Theetšang! Bonang, go tšwele mobjadi a bjala. 4Ge a bjala, tše dingwe tša wela tseleng; dinonyana tša sebakeng tša tla tša di ja. 5Tše dingwe tša wela lekgwareng mo go se nago mobu o montši; tša akgofa tša mela ka ge mobu o sa iše fase. 6Ya re tšatši le hlabile, tša pona tša omelela ka go hloka medu. 7Tše dingwe tša wela meetlweng; meetlwa ya gola ya di bipa, tša se tswale selo. 8Tše dingwe tša wela mobung o botse, tša mela, tša gola, tša bea dienywa; tše dingwe tša tšwa masome a mararo; tše dingwe tša tšwa masome a selelago; tše dingwe tša tšwa lekgolo.
9A fetša ka go re: E a nago le ditsebe tša go kwa, a a kwe.
10Mohla ba le noši, ba lesome le metšo e mebedi, le ba ba bego ba na le yena, ba mmotšiša seswantšho seo. 11A fetola a re: Lena le filwe go tseba dithopa tša mmušo wa Modimo; bao ba ntle, tšohle ba di botšwa ka diswantšho, 12gore go bona ba bone, mme ba se lemoge; go kwa ba kwe, mme ba se hlaologanye; gore ba se ke ba sokologa ka ba lebalela.
13A iša pele a re: Ge seswantšho se le sa se hlaologanye, tše dingwe diswantšho ka moka le tlo di lemoga bjang? 14Mobjadi o bjala lentšu. 15Ba go bjalelwa tseleng ke bao, e rego ge lentšu le bjalwa go bona, ba re go le kwa, Sathane a nape a tle a ba amoga lentšu le le bjetšwego mo go bona. 16Ba go bjalelwa lekgwareng ke bao e rego ge ba kwele lentšu ba akgofa ba le amogela ka thabo. 17Fela, ga ba na medu dipelong tša bona, ke ba lebakanyana fela. Mohla go tsoga dihlokofatšo le tlaišo ka baka la lona lentšu ba tloga ba ngala. 18Ba bangwe ke ba go bjalelwa meetlweng. Ke bao ba kwago lentšu, 19gwa tsena pelaelo tša bophelo bjono, le bofora bja lehumo, le dikganyogo tša dilo tše dingwe, tša bipa lentšu, mme le opafale. 20Ge e le bao ba go bjalelwa mobung o botse, ke ba ba kwago lentšu, ba le amogela, ba enywa dienywa, ba tšwa masome a mararo, le masome a selelago, le lekgolo.
21A ba ruta a re: A lebone le tlela go ribegetšwa ke seroto, le ge e le go bewa tlase ga sedulo? A ga le tlele go hlomelwa sehlomong? 22Gobane ga go na sephiri se se sa tlogo bonagala; ga go seutwa se se sa tlogo tšwelela pepeneneng. 23Ge motho a na le ditsebe tša go kwa, a a kwe.
24A ba ruta a re: Setšang se le se kwago. Seelo se le elago ka sona, ke se le tlogo elelwa ka sona; mme lena ba le kwago le tlo ekeletšwa. 25E a nago natšo, o tlo newa; e a se nago natšo, o tlo amogwa le tše a nago natšo.
26A buša a re: Mmušo wa Modimo o swana le ge motho a bjala peu tšhemong. 27A robala, a tsoga, bošego le mosegare; peu ya mela ya gola yena a sa tsebe. 28Gobane mobu o mediša mabele ka noši; go thoma lekgaba, gwa tla seako, seako sa tsebo tlala mabele. 29Ge mabele a budule, ke gona a išago thipa, ka gobane go fihlile puno.
30A buša a re: Mmušo wa Modimo re ka o swantšha kang? Goba re ka o bolela ka seswantšho sefe? 31O swana le thorwana ye lehloko, ye e rego e sa bjalwa mo mobung, ya ba yona e nnyane go dipeu tšohle lefaseng. 32Ya tlo re ge e bjetšwe, e hloge e be e kgolo e fete merogo ka moka, e be le makala a matelele, ao dinonyana tša sebakeng di kgonago go aga moriting wa ona.
33A ba ruta ka diswantšho tše ntši tše bjalo, ka mo ba bego ba kgona go mo kwa. 34A ba ruta ka go fela a ba swantšhetša. Ge e le barutiwa ba gagwe a ba hlathollela ge ba nnoši.
35Ka mantšiboa a letšatši leo a ba bitša a re: A re seleleng mošola. 36Ba laelana le lešaba, ba tloga nae a le moo leselawatleng; a mangwe maselawatle a mo felegetša. 37Gwa tsoga sesesedi se segolo sa ledimo, sa gašetša maphoto mo leselawatleng, la nyako tlala meetse. 38Mme yena o be a le lešagong la leselawatle a ithobaletše mosamong. Ba tla ba mo tsoša ba re: Moruti! A ga o re selo ge re lahlega?
39Yena a tsoga, a kgalema ledimo, a bolela le lewatle, a re: Homola o re “tuu”! Ledimo la okobala, mme gwa ruthela ruri. 40A bolela le bona a re: Le reng le boifa ka mokgwa wo? Le reng le hloka tumelo gakaakaa?
41Bona ba swerwe ke tšhogo e kgolo ba botšišana ba re: Bjale motho yo ke mang ge ledimo le lewatle le tšona di mo kwa?
