NEHEMIA 3

₁Gwa tsoga Eliyasiba moperisita e mogolo, a na le bana babo ba baperisita, ba aga kgoro ya dinku, ba e kgakola, ba thwela mamati a yona, ba aga ba fihliša sebong sa Hammea, ba se kgakola, ba goma ka sebo sa Hananaele.

₂Hleng ga bona gwa aga banna ba Jeriko; hleng ga bona gwa aga Sakuri morwa wa Imiri.

₃Ba ga Senaa ba aga kgoro ya dihlapi, ba e rulela ka dikota, ba thwela mamati a yona, ba a direla ditswalelo le mapheko.

₄Hleng ga bona morako wa tsošwa ke Meremothe morwa wa Uria morwa wa Hakotse; hleng ga bona wa tsošwa ke Tsadoko morwa wa Baana.

₅Hleng ga gagwe wa tsošwa ke ba Thekoa; fela, bagolo ba bona ba gana go swara modiro wo wa Mong a bona.

₆Kgoro ya kgale ya tsošwa ke Jeyada morwa wa Pasea le Mesulama morwa wa Besodia, ba e rulela, ba thwela mamati, ba e direla ditswalelo le mapheko.

₇Hleng ga bona morako wa tsošwa ke Melatia wa Gibeoni le Jadoni wa Meronothe, ba na le banna ba Gideoni le ba Mitsipa ba ba bego ba bušwa ke mokgoma wa mošono wa noka.

₈Hleng ga bona morako wa tsošwa ke Usiele morwa wa Harahaya wa barudi ba digauta.

Hleng ga gagwe wa tsošwa ke Hananya wa baapei ba ditlolo. Ba tsoša motse wa Jerusalema ba iša morakong o mogolo.

₉Hleng ga bona morako wa tsošwa ke Refaya morwa wa Hura, mokgoma wa lehlakore letee la naga ya Jerusalema.

₁₀Hleng ga gagwe morako wa tsošwa ke Jeyada morwa wa Harumafa, a aga mo go lebanego le ngwako wa gagwe; hleng ga gagwe wa tsošwa ke Hatusi morwa wa Hasebanea.

₁₁Seripa se sengwe sa tsošwa ke Malakia morwa wa Harima, le Hasuba morwa wa Phalathe-Moaba, ba aga sebo sa dibešong.

₁₂Hleng ga bona morako wa tsošwa ke Salume morwa wa Halohese, mokgoma wa lehlakore le lengwe la naga ya Jerusalema, a dira a na le barwedi ba gagwe.

₁₃Kgoro ya moeding e be e tsošwa ke Hanuni le ba motse wa Sanoa, ba e aga, ba thwela mamati a yona, ba e direla ditswalelo le mapheko; ba tsoša morako o fetšago meelo e sekete go fihla kgorong ya morole.

₁₄Kgoro ya morole yona e be e tsošwa ke Malakia morwa wa Rekaba, mokgoma wa selete sa Bethe-Kerema, a e aga, a thwela mamati a yona, a e direla ditswalelo le mapheko.

₁₅Kgoro ya sedibeng e be e tsošwa ke Salume morwa wa Kolihose, mokgoma wa selete sa Mitsipa, a e aga a e rulela, a thwela mamati a yona, a e direla ditswalelo le mapheko; a tsoša le morako wa letshana la Siloa mo tšhemong ya kgoši, a o fihliša manamelong a išago motseng wa Dafida.

₁₆O be a batagane le Nehemia morwa wa Asibuku, mokgoma wa selete se sengwe sa Bethe-Tsuri, e a bego a tsoša morako a o fihliša mo go lebanego le mabitla a Dafida, le go fihla letshaneng le le epilwego le mo ngwakong wa bagale.

₁₇Ba ba bego ba batagane le yena ke Balefi, ba na le Rehuma morwa wa Bani; hleng ga gagwe morako wa tsošwa ke Hasabya mokgoma wa selete se sengwe sa Kegila, a direla selete sa gabo.

₁₈O be a batagane le bana babobona ba ga Bafai morwa wa Henadadi mokgoma wa selete se sengwe sa Kegila.

₁₉Hleng ga gagwe morako o be o tsošwa ke Esere morwa wa Jeshua mokgoma wa Mitsipa; a aga seripa se sengwe sa go lebana le mahlatlogo a yago polokelong ya dibetša e lego sekhutlong.

₂₀O be a batagane le Baruki morwa wa Sabai e a bego a aga seripa se sengwe se se tlogago moo sa fihla mojakong wa ngwako wa Eliyasiba moperisita e mogolo.

₂₁O be a batagane le Merimothe morwa wa Uria morwa wa Hakotse e a bego a tsoša seripa se sengwe moo mojakong wa ngwako wa Eliyasiba, sa fihla mo go felago ngwako woo.

₂₂O be a batagane le baperisita, banna ba molaleng wa Jorodane.

₂₃Ba be ba batagane le Benyamini le Hasuba ba ba bego ba tsoša morako mo o bego o lebane le ngwako wa bona; ba be ba batagane le Asaria morwa wa Maaseya morwa wa Ananya, e a bego a tsoša morako mo o lebanego le ngwako wa gagwe.

₂₄O be a batagane le Benui morwa wa Henadadi, e a bego a tsoša seripa se sengwe a thoma ngwakong wa Asaria a fihliša sekhutlong sa morako.

₂₅Palale morwa wa Usai a tsoša morako mo go lebanego le sekhutlo seo ka sebong sa tletlolo se se bapetšego le ngwako wa kgoši; hleng ga gagwe go be go dira Pedaya morwa wa Pareose. ₂₆Bahlanka ba Ntlokgethwa ba ba bego ba agile mmotong wa Ofele, ba be ba tsoša morako mo go lebanego le kgoro ya meetse ka thoko ya bohlabela, le sebo se se khutlaganego le morako.

₂₇Ba be ba batagane le ba Thekao, ba ba bego ba tsoša seripa se sengwe sa bobedi sa morako mo o bapetšego le sebo se setelele se se khutlaganego le morako, ba goma ka morako wa Ofele.

₂₈Ka thoko ya tletlolo ga kgoro ya dipitsi morako o be o tsošwa ke baperisita, e mongwe le e mongwe a aga mo go lebanego ngwako wa gagwe.

₂₉Ba be ba batagane le Tsadoko morwa wa Imere, e a bego a aga mo go lebanego ngwako wa gagwe, a batagane le Semaya morwa wa Sekanya moletakgoro ka thoko ya bohlabela.

₃₀O be a batagane le Hananya morwa wa Selemia, le Hanuni morwa wa go selela wa Tsalafa, ba ba bego ba tsoša seripa se sengwe sa morako; ba batagane le Mesulama morwa wa Berekia e a bego a o tsoša mo go lebanego le ngwako wa gagwe.

₃₁O be a batagane le Malakia wa barudi ba digauta, e a bego a o tsoša a goma ka ngwako wa bahlanka ba Ntlokgethwa le wa babapatši, mo go lebanego le kgoro ya bahlapetši, go goma ka ngwakwana wa sekhutlong sa morako.

₃₂Go tloga moo ngwakwaneng wa sekhutlong go iša kgorong ya dinku, ke mo morako o bego o tsošwa ke barudi ba digauta le babapatši.