NUMERI 26

₁Ya re ge kotlo yeo e fetile, Morena a bolela le Moshe le Eleasara morwa wa Arone moperisita a re: ₂Balang batho ba phuthego ka moka ya Baisiraele ba nywaga e masome a mabedi le ba ba fetago bao; le ye ka meloko ya bona; le bale ka moka ba ba kago tšwa dira mo go Baisiraele. ₃Moshe le Eleasara moperisita ba bolela le bona gona moo molaleng wa Moaba nokeng ya Jorodane, mo ba lebanago le motse wa Jeriko, ba re: ₄Go balwe ba nywaga e masome a mabedi le ba ba fetago bao, bjalo ka ge Morena a laetše Moshe.

Baisiraele ba ba tšwilego nageng ya Egipita ke:

₅Rubeni morwa wa pele wa Isiraele. Bana ba Rubeni e be e le Hanoge; lešika la Bahanoge, le Palu, lešika la Bapalu; ₆le Hetserone, lešika la Bahetserone; le Karami, lešika la Bakarami. ₇Ke ona mašika a Barubeni. Ba ba badilwego ba bona e be e le ba dikete tše masome a mane a metšo e meraro, le makgolo a šupago a nago le masome a mararo. ₈Morwa wa Palu e be e le Eliaba. ₉Barwa ba Eliaba e be e le Nemuele le Dathane le Abirama. Dathane le Abirama ke bala ba go bitšwa ke phuthego mola ba omantše Moshe le Arone, ba na le lešaba la Kora, mohla wola ba omanya Morena, ₁₀lefase la ahlama la ba metša gotee le Kora, le lešaba lela la go hwa ge mollo o fiša banna ba makgolo a mabedi a masome a mahlano, ya ba seeletši. ₁₁Ge e le bana ba Kora bona ga ba ka ba hwa.

₁₂Barwa ba Simeone ka mašika a bona šeba: Go Nemuele go tšwile Banemuele; go Jamini go tšwile lešika la Bajamini; go Jakine go tšwile lešika la Bajakine; ₁₃go Sera go tšwile lešika la Basera; go Saulo go tšwile lešika la Basaulo. ₁₄Ke ona mašika a Basimeone; e be e le ba dikete tše masome a mabedi a metšo e mebedi, le makgolo a mabedi.

₁₅Barwa ba Gada ka mašika a bona šeba: Go Tsifone go tšwile lešika la Batsifone; go Hagi go tšwile lešika la Bahagi; go Suni go tšwile lešika la Basuni; ₁₆go Osini go tšwile lešika la Baosini; go Eri go tšwile lešika la Baeri; ₁₇go Arodi go tšwile lešika la Baarodi; go Areli go tšwile lešika la Baareli. ₁₈Ke ona mašika a barwa ba Gada ka mo ba badilwego ya ba dikete tše masome a mane, le makgolo a mahlano. ₁₉Barwa ba Juda e be e le Ere le Onane. Ere le Onane ba hwetše nageng ya Kanana. ₂₀Ge e le barwa ba Juda ka mašika a bona ke ba: Go Sela go tšwile ba lešika la Basela; go Pheretse go tšwile lešika la Bapheretse; go Sera go tšwile lešika la Basera. ₂₁Barwa ba Pheretse šeba: Go Hetserone go tšwile lešika la Bahetserone; go Hamulu go tšwile lešika la Bahamulu. ₂₂Ke ona mašika a Bajuda ka mo ba badilwego ya ba dikete tše masome a šupago a metšo e selelago, le makgolo a mahlano. ₂₃Barwa ba Isashara ka mašika a bona šeba: Go Thola go tšwile lešika la Bathola; go Pufa go tšwile lešika la Bapuni; ₂₄go Jasubu go tšwile lešika la Bajasubu; go Simerone go tšwile lešika la Basimerone. ₂₅Ke ona mašika a Isashara ka mo ba badilwego ya ba dikete tše masome a selelago a metšo e mene, le makgolo a mararo. ₂₆Barwa ba Sebulone ka mašika a bona šeba: Go Serede go tšwile lešika la Baserede; go Elone go tšwile lešika la Baelone; go Jahaliele go tšwile lešika la Bajahaliele. ₂₇Ke ona mašika a Sebulone ka mo ba badilwego ya ba dikete tše masome a selelago, le makgolo a mahlano. ₂₈Barwa ba Josefa ka meloko ya bona e be e le Manase le Efuraimi. ₂₉Barwa ba Manase šeba: Go Magiri go tšwile ba leloko la Magiri. Magiri ke tatago Gileada. Go Gileada go tšwile lešika la Bagileada. ₃₀Barwa ba Gileada šeba: Go Jesere go tšwile lešika la Bajesere; go Heleke go tšwile lešika la Baheleke; ₃₁go Asiriele go tšwile lešika la Baasiriele; go Sekeme go tšwile lešika la Basekeme; ₃₂go Semida go tšwile lesika la Basemida; go Hefere go tšwile lešika la Bahefere. ₃₃Tselofagadi morwa wa Hefere o be a se na barwa; o be a na le barwedi fela. Maina a barwedi ba Tselofagadi e be e le Mahla, le Noa, le Hogola, le Milika, le Thiritsa. ₃₄Ke ona mašika a Manase ka mo ba badilwego ya ba dikete tše masome a mahlano a metšo e mebedi, le makgolo a šupago. ₃₅Barwa ba Efuraimi ka mašika a bona šeba: Go Suthela go tšwile lešika la Basuthela; go Bekere go tšwile lešika la Babekere; go Thagane go tšwile lešika la Bathagane. ₃₆Barwa ba Suthela seba: Go Erane go tšwile lešika la Baerane. ₃₇Ke ona mašika a Baefuraimi ka mo ba badilwego ya ba dikete tše masome a mararo a metšo e mebedi, le makgolo a mahlano. Ke bona barwa ba Josefa ka mašika a bona.

₃₈Barwa ba Benyamini ka mašika a bona šeba: Go Bela go tšwile lešika la Babela; go Asebele go tšwile lešika la Baasebele; go Ahirama go tšwile lešika la Baahirama; ₃₉go Sufufama go tšwile lešika la Basufufama; go Hufama go tšwile lešika la Bahufama. ₄₀Barwa ba Bela e be e le Arede le Naamani; go bona go tšwile lešika la Baarede le la Banaamani. ₄₁Ke bona barwa ba Benyamini ka mašika a bona. Ba ba badilwego mo go bona e be e le dikete tše masome a mane a metšo e mehlano, le makgolo a selelago.

₄₂Barwa ba Dani ka mašika a bona šeba: Go Suhama go tšwile lešika la Basuhama. Ke bona ba leloko la Dani ka mašika a bona. ₄₃Ba mašika a Basuhama ka moka ka mo ba badilwego e be e le dikete tše masome a selelago a metšo e mene, le makgolo a mane.

₄₄Barwa ba Asere ka mašika a bona šeba: Go Jimina go tšwile ba lešika la Bajimina; go Jisifi go tšwile lešika la Bajisifi; ₄₅go Beria go tšwile lešika la Baberia; go Hebere go tšwile lešika la Bahebere; go Malakiele go tšwile lešika la Bamalakiele. ₄₆Leina la morwedi wa Asere e be e le Sera. ₄₇Ke ona maina a barwa ba Asere ka mo ba badilwego ya ba dikete tše masome a mahlano a metšo e meraro, le makgolo a mane.

₄₈Barwa ba Nafutali ka mašika a bona šeba: Go Jahasele go tšwile lešika la Bajahasele; go Guni go tšwile lešika la Baguni; ₄₉go Jesere go tšwile lešika la Bajesere; go Sileme go tšwile lešika la Basileme. ₅₀Ke bona ba leloko la Nafutali ka mašika a bona. Ba ba badilwego ba bona e be e le ba dikete tše masome a mane a metšo e mehlano, le makgolo a mane.

₅₁Baisiraele ka moka ba ba badilwego e be e le ba dikete tše makgolo a selelago a nago le motšo o tee, le makgolo a šupago a nago le masome a mararo.

₅₂Morena a bolela le Moshe a re: ₅₃Ke bona ba ba tlogo arolelwa naga e tlogo ba ya bona; go iwe ka palo ya maina. ₅₄Ba ba lego ba bantši o ba arolele naga e kgolo; ba ba sego nene o ba arolele e nyenyane; ba arolelwe ka mo go lekanego palo ya ba ba badilwego. ₅₅Naga yona e abaganywe ka go e direla matengwa; ba e tšee ka maina a meloko ya botatabo. ₅₆Moloko o tšee naga ya wona ka tengwa ge e arolelwa ba e lego ba bantši goba ba ba sego nene.

₅₇Balefi ba ba badilwego ka mašika a bona šeba: Go Gerisone go tšwile Bagerisone; go Kahathe go tšwile Bakahathe; go Merari go tšwile Bamerari. ₅₈Mašika a Balefi šea: Lešika la Balibini, lešika la Baheburone, lešika la Bamahli, lešika la Bamusi, lešika la Bakora. Kahathe ke yena tatago Amorama. ₅₉Leina la mogatša Amorama e be e le Jogebeda morwedi wa Lefi, yo mosadi wa Lefi a mmelegego ba le Egipita. Ke yena mmago Arone le Moshe, barwa ba Amorama, le mmago Miryama kgaetšedi ya bona. ₆₀Arone, barwa ba gagwe ke Nadaba, le Abihu, le Eleasara, le Ithamara. ₆₁Nadaba le Abihu ke bala ba go hwa mola ba tlišitše mollo o šele pele ga Morena. ₆₂Ba ba badilwego ba bona ba dikete tše masome a mabedi a metšo e meraro ba banna, e le ba kgwedi e tee le ba ba fetago bao. Bona ga ba ka ba balwa le Baisiraele ba bangwe, ka gobane ba sa ka ba newa naga mo go Baisiraele.

₆₃Ke bona ba ba badilwego ke Moshe le Eleasara, ba ba badilego Baisiraele mola ba le molaleng wa Moaba nokeng ya Jorodane ba lebane le motse wa Jeriko. ₆₄Mo go bona go be go se na e a badilwego le bala ba go balwa ke Moshe le Arone moperisita mola ba balwa ba le lešokeng la Sinai. ₆₅Gobane tše bona Morena o be a di boletše a re: Ruri, ba tlo hwa lešokeng. Gomme ga go a ka gwa šala le o tee, ge e se Kalebe morwa wa Jefune, le Joshua morwa wa Nuni.