NUMERI 28

₁Morena o boletše le Moshe a re: ₂Anegela Baisiraele molao wo, o ba botše o re: Le hlokomeleng gore dibego tša ka, le dijo tša ka le tša mello ya ka, le tša monko o bose tša ka le ntlišetše tšona ka lebaka la tšona.

₃O ba botše o re: Tša mello tše le tlogo di tlišetša Morena ke tše: Ke dikwanyana tše pedi tše di se nago bosodi tša ngwaga o tee tša go tlišwa ka mehla, tša sehlabelo sa ka mehla. ₄Kwanyana e nngwe le e hlabe gosasa, e nngwe le e hlabe ka mantšiboa. ₅Le e tliše le sebego sa ntlatlana ya bupi bjo bo tšhetšwego makhura a a hlotlilwego a tletšego lefiswana. ₆Ke sona sehlabelo sa ka mehla se se bego se dirwa thabeng ya Sinai gore e be sa monko o bose, sa mello ya Morena. ₇Le sebego sa dino sa yona, se se tletšego lefiswana, se tšhollelwe godimo ga kwanyana e nngwe. Le tšhollele Morena sebego sa dino mo sekgethweng. ₈Kwanyana e nngwe le e hlabe ka mantšiboa; le e tliše e na le dibego tša dijo le tša dino bjalo ka tšela tša gosasa, e be sa mello ya Morena sa monko o bose.

₉Ka la Sabatha e be dikwanyana tše pedi tše di se nago bosodi tša ngwaga o tee, le ntlatlana tše pedi tša bupi bja sebego sa dijo, le sebego sa dino sa gona. ₁₀Ke sona sehlabelo sa Sabatha, sa disabatha tšohle, ka ntle ga dihlabelo tše ka mehla le dibego di tlago le tšona.

₁₁Ge le thoma dikgwedi tša lena le tlišetše Morena sehlabelo sa dipowana tše pedi, le kgapana e tee, le dikwanyana tše di šupago, tše di se nago bosodi tša ngwaga o tee. ₁₂Le dintlatlana tše tharo tša bupi bjo bo tšhetšwego makhura, e be sebego se se tlago le powana e tee, le dintlatlana tše pedi tša bupi bjo bo tšhetšwego makhura bja sebego se se tlago le kgapana e tee; ₁₃le ntlatlana e tee ya bupi bjo bo tšhetšwego makhura bja sebego se se tlago le kwanyana ka e tee ka e tee; ke sehlabelo sa monko o bose sa mello ya Morena. ₁₄Dibego tše di tlago le tšona e be seroto se se tlago le powana, ntlatla e tlago le kgapana, le ntlatlana e tlago le kwanyana. Ke sona sa ge kgwedi e balama, sa kgwedi e nngwe le e nngwe, sa dikgwedi ka moka tša ngwaga. ₁₅Go tlišwe le pudi ya seloba sa Morena, e tle le sehlabelo sa ka mehla gotee le dibego tša sona.

₁₆'Tšatši la lesome le metšo e mene la kgwedi ya pele ke la Paseka ya Morena. ₁₇La lesome le metšo e mehlano ke la monyanya. Ka matšatši a šupago go lewe dinkgwa tše di se nago komelo. ₁₈'Tšatši la pele e be la pitšokgethwa; go se ke gwa ba le modiro wo le o dirago. ₁₉Le tliše tša mello, dihlabelo tša Morena, dipowana tše pedi, le kgapana e tee, le dikwanyana tše di šupago tša ngwaga o tee; e be tše di se nago bosodi. ₂₀Le di tliše di na le dibego tša tšona tša bupi bjo bo tšhetšwego makhura, moetana o tle le powana, pitšana e tle le kgapana; ₂₁kwanyana tše di šupago di tle le makhura a tletšego lefiswana ka e tee ka e tee. ₂₂Le tliše le pudi e tee ya seloba sa go le direla poelanyo. ₂₃Tše ka moka le di tliše ka ntle ga sehlabelo sa ka moswana, e le sehlabelo sa ka mehla. ₂₄Ka mokgwa o bjalo le tliše dijo tša mello ya Morena gore e be tša monko o bose ka mehla ka matšatši a šupago ao; le di tliše ka ntle ga dihlabelo tša ka mehla le dibego tša tšona. ₂₅'Tšatši la go šupa le le dire la pitšokgethwa ya Morena; go se ke gwa ba le modiro wo le o dirago.

₂₆Le ka tšatši la dithakangwaga tše le di tlišetšago Morena e le dibego tša tše mpsha ka monyanya wa lena wa dibeke, le be le pitšokgethwa; go se ke gwa ba le modiro wo le o dirago. ₂₇Le tliše sehlabelo, tša monko wa go natefela Morena, dipowana tše pedi, le kgapana e tee, le dikwanyana tše di šupago tša ngwaga o tee. ₂₈Di tle le dibego tša bupi bjo bo tšhetšwego makhura a moetana o lebanago le powana, le pitšana e lebanago le kgapana; ₂₉le lefiswana le le lebanago le kwanyana e tee e tee ya tšela dikwanyana tše di šupago. ₃₀Le tliše le pudi e tee ya go le direla poelanyo. ₃₁Tše ka moka le di tliše ka ntle ga sehlabelo sa ka mehla le dibego tša sona tša dijo. E be tše le bonago di se na bosodi, le dibego tša tšona tša dino.