NUMERI 30

₁Gomme Moshe a bolela le bagolo ba meloko ya Baisiraele a re: Taba ye Morena a e laetšego še: ₂Ge monna a enetše Morena keno, goba a itlema a re: Ke tlo ikona sekete, a se ke a hlanogela lentšu la gagwe; a dire tšohle ka mo di tšwilego molomong wa gagwe.

₃Ge mosadi a enetše Morena keno, a itlema a re: Ke tlo ikona sekete, a dira bjalo a sa le lapeng la gabo, a sa le kgarebe, ₄gomme tatagwe a mo kwa ge a ena, ge a itlema a re: Ke tlo ikona, mme tatagwe a homola, gona keno yeo e tiile, le go itlemela go ikona ga gagwe go tiile. ₅Fela, ge tatagwe a ka gana ka tšatši le a di kwago ka lona, gona keno ya kgarebe yeo, le go itlemela go ikona ga gagwe, di ka se ke tša tia; Morena o tlo mo lebalela ka ge tatagwe a gana.

₆Ge a ka tšewa ke monna, keno e sa le go yena, a sa itlemile ka lentšu le le tšwilego molomong wa gagwe, ₇gomme monna wa gagwe a homola ka tšatši le a di kwago ka lona, gona keno ya mosadi eo e tiile; le lentšu le a itlemilego ka lona le tiile. ₈Fela, ge monna wa gagwe a ka gana ka tšatši le a di kwago ka lona, gona o hlanoša keno ya mosadi wa gagwe le lentšu le a itlemilego ka lona a re: Ke tlo ikona sekete; gomme Morena o tlo mo lebalela.

₉Ge e le keno ya mosadi wa mohlologadi, goba ya e a hladilwego, le ge e le lentšu le a itlemilego ka lona, di mo tietše.

₁₀Ge go ka ena mosadi e a lego lapeng la monna wa gagwe, a itlema a re: Ke tlo ikona sekete, ₁₁gomme monna mohla a di kwago a homola, a lesa go mo ganetša, gona keno ya mosadi e tiile ka moka, le tše a itlemilego ka tšona a re: Ke tlo ikona tšona, di tiile. ₁₂Fela, ge monna wa gagwe a ka re go di kwa, mme a di hlanošetša ruri, gona keno ye e tšwilego molomong wa gagwe, le tše a itlemilego a re: Ke tlo ikona tšona, di ka se ke tša tia, monna o di hlanošitše; mme Morena o tlo mo lebalela. ₁₃Dikeno ka moka tša mosadi, le tšohle tše a itlemago a re ke ikotla ka tšona, monna wa gagwe a ka di tiiša, le ge e le go di hlanoša. ₁₄Ge monna wa gagwe a ka homola gwa fela matšatsi, gona o tlo ba a tiišitše keno ka moka ya mosadi, le tše a itlemilego ka tšona ka moka, ka ge a homotše ka tšatši le a di kwilego ka lona. ₁₅Ge a ka di hlanoša ka morago, a šetše a di kwile kgale, gona o ikobela molato wa mosadi eo.

₁₆Ke tšona ditaelo tše Morena a di laetšego Moshe ka baka la monna le mosadi, le ka baka la tatago ngwana le morwedi wa gagwe ge a sa le kgarebe, a sa le ka lapeng labo.