NUMERI 31

₁Morena o boletše le Moshe a re: ₂Lefetša Bamidiane tše ba di dirilego Baisiraele, e be gona o tlogo gorošetswa go ba geno.

₃Moshe a bolela le setšhaba a re: Hlaolang banna ba itlhame, ba tšwele Bamidiane dira, ba iše kgalefo ya Morena go Bamidiane. ₄Go moloko o mongwe le o mongwe go tšwe ba sekete, le ba rome ba tšwe dira.

₅Gomme gwa hlaolwa ba sekete setee mo molokong o mongwe le o mongwe, ya ba ba dikete tše lesome le metšo e mebedi ba ba itlhametšego go tšwa dira. ₆Bona ba, ba ba tšwilego e le sekete seteesetee ka moloko, ba tšwa le Pinease morwa wa Eleasara moperisita ba swere dilo tše kgethwa le dinaka tša go letša. ₇Ba šwahlela Bamidiane, bjalo ka ge Morena a laetše Moshe, ba bolaya banna ka moka. ₈Ka ntle ga ba bangwe ba ba fedilego ba bolaile le magoši a Bamidiane, Boefi, le Rekema, le Tsuri, le Huri, le Reba; ka moka ke dikgoši tše tlhano. Le Bileama morwa wa Beoro ba mmolaile ka lerumo.

₉Gomme Baisiraele ba thopa basadi ba Bamidiane le bana ba bona, le dikgomo tša bona ka moka, le mehlape ya bona ka moka, le maruo a bona ka moka. ₁₀Ba fiša metse ya bona ka moka, le meago ya bona ka moka, le meraka ya bona ka moka. ₁₁Ba tšea tše di thopilwego ka moka, le dithebola ka moka tša batho le tša diruiwa. ₁₂Tšona tšeo, mathopša, le dithebola, le tše di thopilwego, ba di tlišitše go Moshe le go Eleasara moperisita, le go phuthego ya Baisiraele mešašeng, kua molaleng wa Moaba, nokeng ya Jorodane, go lebanego le motse wa Jeriko.

₁₃Moshe le Eleasara moperisita, le bagolo ka moka ba phuthego, ba tšwa ba ba gahlanetša kua ntle ga mešaša. ₁₄Gomme Moshe a galefela balaodi ba madira e lego ditona tša ba dikete le tša ba makgolo, tše di boilego di etšwa direng, tlhabanong. ₁₅A bolela le bona a re: A le lesitše basadi ka moka ba phela? ₁₆Hleng ke bona ba ba fapošitšego Baisiraele ka keletšo ya Bileama ba hlala Morena ka molato wola wa Peoro, mme phuthego ya Morena ya welwa ke kotlo! ₁₇Bjale bolayang bana ka moka ba bašimane; mme le bolaye le basadi ka moka ba ba kilego ba robala le monna. ₁₈Le lese basetsana ka moka ba ba sa tsebego monna ba phele, e be ba lena. ₁₉Ge e le lena, le fetše matšatši a šupago le dutše kua ntle ga mešaša; mang le mang e a bolailego motho, le e a kgwathilego motho e a bolailwego, a ithakgafatše ka tšatši la boraro le ka la go šupa, lena le mathopša a lena ka moka. ₂₀Le thakgafatše le diaparo ka moka, le dilo tšohle tša letlalo, le tše di direlwego ka boya bja dipudi le ka kota.

₂₁Eleasara moperisita a laodišetša bahlabani ba ba bego ba ile ntweng a re: Ke molao wo o tiilego, wo Morena a o laetšego Moshe. ₂₂Ge e le gauta, le silifera, le mphiri, le tshipi, le tshipithšweu, le morodu, ₂₃tšohle tše di sa swego mollong, le di tsenye mollong, gore di thakgafale; mme le se ke la lesa go di hlatswa ka meetse a thakgafatšo. Gomme tšohle tše di sa dumellanego le mollo le di tsenye meetseng. ₂₄Ge le hlatswitše diaparo tša lena ka la go šupa, ke mo le tlogo tšwa ditšhila, la kgona le boela mešašeng.

₂₅Gomme Morena a botša Moshe a re: ₂₆Bala palo ya mathopša a a swerwego, a batho le a dikgomo; o bale o na le Eleasara moperisita le ba bagolo ba phuthego. ₂₇Gomme ba ba thopilwego o ba arolele bahlabani ba ba tšwago direng le phuthego ka moka. ₂₈Bahlabani ba ba tšwago ntweng o ba ntšhiše lekgetho la Morena, ba ntšhe setee go makgolo a mahlano go batho le go dikgomo, le go dipokolo, le go dinku. ₂₉O di tšee mo karolong ya bona, o di neele Eleasara moperisita, e be sebego sa Morena. ₃₀Mo karolong ya Baisiraele o tšee setee go masome a mahlano go batho, le go dikgomo, le go dipokolo, le go dinku, le go diruiwa ka moka, mme o di neele Balefi, bahlokomedi ba madišo a Ntlong ya Morena. ₃₁Moshe le Eleasara ba dira ka mo Morena a laetšego Moshe ka gona.

₃₂Tše di thopilwego, tše bahlabani ba boilego natšo di sa phela, e be e le dinku tše dikete tše makgolo a selelago, a nago le masome a šupago a metšo e mehlano. ₃₃Dikgomo e be e le dikete tše masome a šupago a metšo e mebedi. ₃₄Dipokolo e be e le dikete tše masome a selelago a motšo o tee. ₃₅Batho e be e le basetsana ba dikete tše masome a mararo a metšo e mebedi ba ba sešogo ba tseba monna. ₃₆Bjalo karolo ye e baletšwego bahlabani ba ba tšwilego ntweng e tlile ya ba dinku tše dikete tše makgolo a mararo, a nago le masome a mararo a metšo e šupago, le makgolo a mahlano; ₃₇Lekgetho la Morena le le tšwilego dinkung tšeo ya ba tše makgolo a selelago a nago le masome a šupago a metšo e mehlano. ₃₈Dikgomo e be e le tše dikete tše masome a mararo a metšo e selelago; lekgetho la Morena mo go tšona ya ba masome a šupago a metšo e mebedi. ₃₉Dipokolo e be e le dikete tše masome a mararo, le makgolo a mahlano; lekgetho la Morena ya ba tše masome a selelago le pokolo e tee. ₄₀Batho e be e le dikete tše lesome la metšo e selelago; lekgetho la Morena mo go bona ya ba ba masome a mararo le batho ba babedi. ₄₁Lekgetho le la Morena Moshe o le meetše Eleasara moperisita, ka mo Morena a mo laetšego ka gona.

₄₂Karolo ya Baisiraele ye Moshe a e arotšego go ya bahlabani še: ₄₃Karolo ya phuthego e be e le dinku tše dikete tše makgolo a mararo a nago le masome a mararo a metšo e šupago, le makgolo a mahlano, ₄₄dikgomo e be e le dikete tše masome a mararo, a metšo e selelago. ₄₅Dipokolo e be e le dikete tše masome a mararo, le makgolo a mahlano. ₄₆Batho e be e le ba dikete tše lesome la metšo e selelago. ₄₇Go karolo ye ya Baisiraele o tšere setee go tše masome a mahlano, go batho le go diruiwa, a di neela Balefi bahlokomedi ba madišo a Ntlo ya Morena, ka mo Morena a mo laetšego ka gona.

₄₈Gwa batamela balaodi ba dikgao tša madira, matona a ba dikete, le matona a ba makgolo, ba tla go Moshe; ₄₉ba bolela le Moshe ba re: Rena bahlanka ba gago re badile palo ya bahlabani ba re bego re ba laola, ra hwetša go sa hlokege le monna o tee wa rena. ₅₀Ke ka baka leo re tlišetšago Morena neo ya tše e mongwe le e mongwe wa rena a di thopilego; ke dilo tša gauta; ke meruka, le maseka, le mangina, le mabitsi; re dira gore meoya ya rena e boelanywe le Morena. ₅₁Moshe le Eleasara moperisita ba amogela gauta yeo go bona. E be e le dilwana tše di botsana tša mehutahuta. ₅₂Gauta ya dilo tšeo tše ba di neetšego Morena di etšwa go ditona tša ba dikete le go ditona tša ba makgolo, e be e le sekele tše dikete tše lesome la metšo e selelago, le makgolo a šupago a nago le masome a mahlano. ₅₃Bahlabani ka moka ba be ba ithopetše tša bona. ₅₄Moshe le Eleasara moperisita ba tšere gauta yeo, ye e tšwilego go ditona tša ba dikete le go ditona tša ba makgolo, ba e tliša Ngwakong wa Kgwerano, ya ba seeletši sa Baisiraele pele ga Morena.