DIEMA 2

₁Ngwanaka! Ge o ka dumela dikeletšo tša ka, mme wa hlokomela ditaelo tša ka, ₂ge bohlale o bo sekegela tsebe, wa lebiša pelo yaago mo go lego tlhaloganyo, ₃Ge o ka bitša temogo wa hlabošetša tlhaloganyo lentšu la gago, ₄ge o ka e tsoma bjalo ka leruo, wa e nyakišiša boka lehumo le le fihlilwego, ₅ke mo o tlogo go tseba go boifa Morena, wa fihlela go tseba Modimo. ₆Gobane bohlale motho o bo newa ke Modimo; tsebo le temogo di tšwa molomong wa gagwe. ₇Ke yena a beetšego baloki phologo; ke yena kotse ya ba se nago bosodi. ₈Gobane o hlapetša mmila wa molao; o letile tsela ya baratwa ba gagwe.

₉Gona moo o tlo hlaloganya toko le molao le bothakga, le tšohle ditsela tše bolo. ₁₀Ke moo bohlale bo tsenago mo pelong ya gago; mme tsebo e tlo natefela moya waago. ₁₁Gona keletšo e tlo go lotola; o tlo namolelwa ke temogo. ₁₂Mohla tsela e befago, o tlo hlakodišwa le diatleng tša bathobaradia, ₁₃ba ba tlogetšego mmila wa go loka, ba yo swara tsela tša lefsifsi, ₁₄ba go thaba ge ba dira bobe, ba hlalalela maanomabe, ₁₅ba tsela tša go kgopama, ba mehlala ya go fapogela thoko.

₁₆E tlo ba go go thibela go ya go mosadi e sego wa gago, le go e a sa tsebjego, wa mantšu a boreledi; ₁₇o hladile moratwa wa gagwe wa mola a sa le kgarebe, a lahla kgwerano ye a e dirilego ka Modimo. ₁₈Lapa la gagwe le tlo sobelela kwa lehung; mme tsela tša gagwe di iša bahung. ₁₉Bohle ba yago go yena ga ba boe; ga ba boele mo go tsela ya bophelo. ₂₀Ka baka leo swara tsela ya ba bolo; tšea ka tsela ya ba ba lokago. ₂₁Gobane ba ba tlogo dula mo nageng, ke baloki; ba ba tlogo šala ba le gona, ke bona bailabokgopo. ₂₂Ba babe ba tlo fedišwa nageng; bakgelogi ba tlo rakwa mo go yona.