DIEMA 25

₁Tše dingwe šidi, diema tša Salomo. Di kokotleditšwe ke banna ba Hiskia kgoši ya Juda.

₂Modimo o retwa ge a uta taba; dikgoši di retwa ge di e nyakišiša.

₃Pelo ya kgoši go se tsebje e etša legodimo bokgole, e etša lefase boteng.

₄Tlošang lehulo la tshipi e tshehla, makgone a rule sebjana. ₅Tlošang e mobe go kala tša kgoši, sedulo sa yona se tie ka toko.

₆O se ke wa itheta pele ga kgoši; o se ke wa ipea madulong a bagolo. ₇O se tlo nyatšega o lebane le marena. Go kaone ge o ka thwe: Fetela mono pele.

₈O se hlaganele go yo bega taba; o tlo reng wa geno ge a fihla a go leša hlong?

₉Taba ya gago, yona e sekišane le wa geno; ge e le dithopa tša e mongwe, o se di utolle. ₁₀O se tlo kgalwa ke ba ba go kwago, wa se sa tlogwa ke nyatšego.

₁₁Lentšu le bolelwago lebakeng la gona, le bjalo ka matsaka a tshipi e khwibidu mogopyaneng wa tshipi tshehla.

₁₂Mokgalemi yo bohlale a hweditše tsebe ye e kwago, ke lengina le ngangane ya tshipi e bohlokwa.

₁₃Motsetammotegi o rola mong wa gagwe pelo boka meetse a tonyago tšatši ge le fiša.

₁₄Mokgantšhampho e sego gona ke leru le ledimo, pula ya se ne.

₁₅Wa go se fele pelo, le babuši o a fenya; leme le boleta le roba marapo.

₁₆Wa hwetša dinose, o je di go lekanego; di se tlo go kgama wa di hlatša. ₁₇Se fele o iša nao tša gago lapeng la wa geno, o se tlo mo tena a be a go nyatša.

₁₈Mpharawagabo o bjalo ka noto, lerumo, mosebe o bogale.

₁₉Go bota mohlanogi mohla wa tlalelo, ke go bota ino le le bodilego, le oto le le thelelago.

₂₀Go opelela majapelo koša ke go apola kobo ge go tonya, ke go tšhela meetse mororeng.

₂₁Ge naba la gago le ne tlala, le fe dijo; ge le nyorwa, o le noše meetse. ₂₂Ke mo o tlo go gokolela magala mo hlogong ya lona; moputso wa tlo go tšwela go Morena.

₂₃Ledimoletšwaborwa le tla le pula; leleme la tshebi le hlafiša sefahlogo.

₂₄Go dula ntle mokutwaneng go phala go dula ngwakong ga mmogo le mosadi wa senganga.

₂₅Fokobololetšwakgole ke meetse a batago a ge o hwile ka lenyora.

₂₆Diba se kgotlelegile, nokeng go senyegile; yo bolo o loba yo mobe.

₂₇Go ja dinose ka kudu ga go botse; go nyakišiša taba tše kgolo gona go godiša motho.

₂₈Motho mosekgonegoitshwara ke motsemothubya o se ne merako.