PSALME ya 106

₁Haleluya! Lebogang Morena, gobane ke yo botho, gomme kgaugelo ya agwe e ka go sa felego.

₂Ke mang a kago kgona go reta ditiro tše maatla tša Morena, a kgona go kwatša ditheto tša gagwe ka moka?

₃Ba lehlogonolo ke baloti ba molao, ba go dira toko mehla yohle.

₄Morena, hle nkgopole ka mo o ratilego tšhaba sa gago; o nthole o le Mophološi;

₅Gore ke bone mahlatse a bakgethwa bago, ke thabele thabo la setšhaba sago, ke ithete le bao o lego Mong wa bona.

₆Re sentše, rena le botatawešo, re molato, re dirile bobe.

₇Botatawešo kua Egipita ga ba hlokomela mehlolo ya gago; ga ba ka ba gopola bogolo bja botho bja gago, mme ba ngangana le wena Yogodimo kua Lehlakawatle.

₈Le ge go le bjalo wa fela o ba namolela ka baka la leina la lago, le gore o bonatše maatla a gago.

₉Wa kgalema Watlelamahlaka, la gopa, wa ba sepediša madibeng bjalo ka šokeng.

₁₀Wa ba hlakodiša atleng tša bahloi, wa ba phološa atleng tša manaba.

₁₁Meetse a ribegetša manaba a bona, gwa se ke gwa šala le o tee.

₁₂Ke moo ba kilego ba dumela mantšu a gago, ba hlaba sefela sa go go reta.

₁₃Ba se diege go lebala tiro tša gagwe, ba lesa go letela morero wa gagwe.

₁₄Ba tsenwa ke kganyogo lešokeng, ba leka Modimo ba le gara naga.

₁₅Yena a ba nea se ba bego ba se duma, a ba romela le phokolo ya meoya.

₁₆Ba baka bogolo le Moshe mešašeng, le Arone mokgethwa wa Morena.

₁₇Lefase la ahlama la metša boDathane, la phupetša sephohla sa Abirama.

₁₈Gwa hlaga mollo sephohleng sa bona; ba babe bao ba tšhungwa ke kgabo ya wona.

₁₉Ba dira namane kua Horebe, ba khunamela swantšho se se bopilwego.

₂₀Ba phekgoga ba re Moretwa wa bona ke swantšho sa pholo e fulago bjang.

₂₁Ba gakwa Modimo Mophološi wa bona, yena wa go dira tše dikgolo kua Egipita,

₂₂Le mehlolo kua nageng ya Hama, le matete kua Lehlakawatle.

₂₃Yena a re o tlo ba fediša; Moshe mokgethwa wagwe a humela, a phohliša dikgalefo, ba se sa fedišwa.

₂₄Ba boela mme ba nyatša naga e kganyogegago, ba se dumele tše a ba boditšego tšona.

₂₅Ba tsota ba le mo mekutwaneng ya bona, ba se theetše lentšu la Morena.

₂₆Yena a akalatša tsogo, a ena a re: Ke tlo ba rapalatša lešokeng.

₂₇A re o tlo rapalatša peu ya bona gara ditšhaba, o tlo ba tšitlanya le dinaga.

₂₈Bona ba gwerana le Baali-Peoro, ba ja didimo tša bahu.

₂₉Ba mo seleka ka tiro tša bona, mme ba tsenwa ke dinkhu.

₃₀Pinease a nanoga a fetša taba yeo, dinkhu tša ba gomela.

₃₁Pinease a thwe o lokile; ditlogolo le ditlogolwana di fela di realo.

₃₂Le kua meetseng a Meriba ba mo rumola; Moshe a senyegelwa ke ditaba ka baka la bona.

₃₃Gobane ba be ba mo tenne, a šaetša ka molomo.

₃₄Le gona ba lesa go fediša tšhaba tšela, ka mo Morena a ba boditšego.

₃₅Ba itswakanya le ditšhaba, ba ithuta mediro ya tšona.

₃₆Ba hlankela diswantšho tša tšona, ya ba go ikiša moreong.

₃₇Barwa le barwedi ba bona ba ba hlabetše masathane ao.

₃₈Ba tšholla madi a se nago molato, madi a barwa le barwedi ba bona, ba ba hlabetšwego medimo ya Bakanana; naga ya ba ya goboga ka melato ya madi.

₃₉Ya ba gona go itšhilafatša ka tše ba bego ba di dira, mekgwa ya bona e le ya bootswa.

₄₀Ke ka baka leo ge Morena a tukela tšhaba sa gagwe bogale, a hlaswa setšhaba sa gagwe.

₄₁A ba gafela diatleng tša baditšhaba, ba bušwa ke ba ba bego ba ba hloya.

₄₂Manabaa bona a ba pitlaganya, ba kokobetšwa ke matsogo a ona.

₄₃Ke gantši a ba namolela; fela, bona ba gana ba nganga, ba ba ba notlega ka dibe tša bona.

₄₄Mme yena ge a bona ba hlaka, a kwa dillo tša bona.

₄₅A ba šetša ka go tseba kgwerano ya gagwe, a ba kwela bohloko ka bogolo bja botho bja gagwe.

₄₆A letafatša pelo tša bao ba ba thopilego, ba ba gaugela.

₄₇Morena Modimo wa rena! Re phološe! Re phuthe re boe ditšhabeng, re leboge leina la gago le lekgethwa, re fadiše ditheto tša gago.

₄₈A go retwe Morena Modimo wa Isiraele wa kgale le nkhono le neng le neng. Mme batho bohle a ba re: Amene, Haleluya!