PSALME ya 135

₁Haleluya! Retang leina la Morena! Retang, lena bahlanka ba Morena.

₂Lena le emego mo Ngwakong wa Morena, le mo malapeng a Ngwako wa Modimo wa rena.

₃Retang Morena gobane ke yo bolo; hlabang sefela sa ina la gagwe, gobane le a ratega.

₄Gobane Morena o itlhaoletše Jakobo le Isiraele, ya ba leru la gagwe.

₅Ka kgonthe, nna ke tseba gobane Morena ke yena e mogolo; Mong wa rena o feta medimo ka moka.

₆Tše a ratago go di dira o di dira tšohle kua magodimong le mo lefaseng, le kua mawatleng, le gohle madibeng.

₇O rotoša maru kua pheletšong tša lefase; o tšweletša dikgadima tša ge pula e ena, o ntšha diphefo mo a di bolokago.

₈Maitšibulo a kua Egipita, a batho le a dikgomo, o a bolaile.

₉Ke mola a roma mehlolo le dimakatšo, mme tša go tsena, wena Egipita, le Farao le malata a gagwe ka moka.

₁₀A otla ditšhaba tše ntši, magoši a maatla a a bolaya.

₁₁Sihoni kgoši ya Amoro, le Ogo kgoši ya Basani, le yohle mebušo ya Bakanana.

₁₂Naga ya bona a e nea Isiraele, ya ba ya bona, magae a setšhaba sa gagwe.

₁₃Morena, leina la gago ke la neng le neng. O tlo tsebja ke meloko le melokoloko.

₁₄Gobane Morena o tlo ahlolela setšhaba sa gagwe, o kwela balata bagagwe bohloko.

₁₅Medimo ya ditšhaba ke ya silifera le gauta, dibopša tša diatla tša batho.

₁₆E na le melomo mme ga e bolele; e na le mahlo, mme ga e bone;

₁₇E na le ditsebe, gomme ga e kwe; gomme ga e buše moya ka ganong ga yona.

₁₈Babopi ba yona ba swana le yona, le bohle ba ba e botago.

₁₉Lena ba leloko la Isiraele, retang Morena! Lena ba leloko la Arone, retang Morena!

₂₀Lena ba leloko la Lefi, retang Morena! Lena ba go boifa Morena, retang Morena!

₂₁Morena a a retwe motseng wa Tsione, yena Moagi wa Jerusalema. Haleluya!