PSALME ya 148

₁Haleluya! Retang Morena le le kua magodimong! Mo reteng le le kua maphagamong!

₂Mo reteng, lena batseta bagwe bohle! Mo reteng, lena dira tša gagwe tšohle!

₃Mo reteng, lena letšatši le kgwedi! Mo reteng, lena dinaledi ka moka tše di phadimago.

₄Mo reteng, lena magodimodimo, le meetse a leratadima.

₅A di rete leina la Morena, gobane ke yena a lailego, gomme tša hlolega.

₆Me o di beile ya ba tša neng le neng; a di beela mokgwa, di se o tlogele.

₇Retang Morena mono lefaseng, le lena dibata tša lewatle, le madiba ohle,

₈Le mello, le difako, le leswela, le meuwane, le ledimo le tšutlago, lena le phethago ditaelo tšagwe,

₉Lena dithaba le meboto yohle, meremelewa le hlare ka moka tša merokwana,

₁₀Dibata tša naga le tšohle diphoofolo, le lena digagabi le nonyana tša diphego,

₁₁Le lena marena a lefase le merafo yohle, le lena bakgoma le babuši bohle ba dinaga,

₁₂Lena masogana le lena basetsana, ba bagolo le ba bafsa,

₁₃bohle a ba rete leina la Morena, gobane leina la gagwe ke lona le inalephagami le le nnoši; letago la gagwe le ukametše lefase le magodimo.

₁₄O phagamišitše lenaka la setšhaba sagwe, theto ya bagaugelwa ba gagwe bohle, theto ya Baisiraele, setšhaba se lego kgauswi le yena, Haleluya!