PSALME ya 19

₁Magodimo a re anegela bogolo bja Modimo; mediro ya diatla tša gagwe e retwa ke leratadima.

₂Letšatši le akgoletša letšatši taba; bošego bo sebelana le bošego tsebo.

₃Ga se taba, ga se mantšu, a go sa kwalego modumo wa tšona.

₄Lešika la tšona le tšwetše lefase ka moka; le kua mafelelong a lona go kwala polelo ya tšona; gomme letšatši o le hlometše ngwako go tšona.

₅Lona le etša monyadi a etšwa phapošing ya gagwe, le thabetše go sepela tsela ya lona bjalo ka mogale.

₆Le tsoga kua pheletšong ya magodimo, la a putla la sobela pheletšong ya ona; gomme ga go selo se kago efoga ge le fiša.

₇Molao wa Morena ga o na bosodi, o lapološa moya. Bohlatse bja Morena bo a botega, bo hlalefiša a se nago maano.

₈Ditaelo tša Morena di lokile, di thabiša pelo. Ditayo tša Morena di sekile, di boniša mahlo.

₉Go šia Morena ke bothakga, bo tiile neng le neng. Dikahlolo tša Morena ke therešo, ga di na mo di hlaolago.

₁₀Di kganyogega go fetiša digauta, le bontši bja gauta ye e tagilego; di bose go fetiša dinose le todi ya tšona.

₁₁Molata wa gago di a mo laya; mme ka go hlokomela tšona o bona moputsomogolo.

₁₂Ke mang a itemogago dikarogo? -- Ntebalele le tše ke sa di tsebego.

₁₃Le gona, nna molata wa gago, o nkefele maipoti, a se ke a mpuša; ke mo go nna go tlogo hlokwa bosodi, ka tseba go ila makgopo a mantši.

₁₄A nke o kgahlwe hlee ke polelo tša molomo wa ka, le dikeleletšo tše tša pelo ya ka, wena Morena lentswe la ka, wena Monamoledi wa ka.