Sello sa molahlegi; kholofelo ya gagwe
Ya mohlabeledi, ka “Tshepe ya meso”. Sefela sa Dafida.
1Modimo wa ka! Modimo wa ka! O ntlogeletšeng? Lentšu la mokgoši wa ka ga le fihle go wena Mophološi wa ka.
2Modimo wa ka! Ke hlwa ke goa, mme ga o nkarabe; ke lala ke realo mme ke hloka khomotšo,
3Mola Yomokgethwa, Modulagodimo ga ditheto tša Isiraele e le wena,
4o le wa go botwa ke botatawešo, wa ba hlakodiša.
5Bona ba go hlabetše mokgoši, ba namolelwa; ba be ba botile wena, ba se ke ba nyamišwa.
6Gomme nna, ke seboko, ga ke motho; ke sekwero sa batho; ke nyatšwa ke setšhaba.
7Bohle ba mpona ba nkwera; ba šwenya melomo, ba šišinya hlogo.
8Ba re o bota Modimo; o tlo mo lwela; a mo namole; hleng o kgahlwa ke yena!
9E, ke wena wa go ntšweletša mmeleng wa mme, ka iketla o mpeile mabeleng a mme.
10E sa le mola ke tswalwa, ke gafetšwe wena. Go tloga mmeleng wa mme Modimo wa ka ke wena.
11Se nkeme kgole ge ke batamelwa ke tlalelo, ke hloka monamodi.
12Dipoo tše kgolo di ntietše gare; ke dikilwe ke dipoo tša Basani.
13Di nkahlamišetša legano la tšona; ke ditau tša go loma le go rora.
14Mme nna ke meetse matshologafase; ka moka mašapo a ka a a kgolokgotla; pelo ya ka e bjalo ka moti; e tologile ka teng ga ka.
15Maatla a ka a omile bo ka lekopelo; leleme la ka le nkgomaretše magalapa; O mpeile leroleng la lehu.
16Ke rakeletšwe ke dimpša; ke dikwa ke seboka sa ba babe; ba nthutše diatla le dinao.
17Mašapo a ka ohle nka a bala; mme bona ba mpoga ba ntomela.
18Ba abelane diaparo tša ka; mme kobo ya ka yona ba e direla matengwa.
19Mme wena Morena, se nkeme kgole. O maatla a ka; akgofa o ntwele.
20Hlakodiša moya wa ka lerumong; bophelwana bja ka bjo, bo ntšhe mo dimpšeng.
21Nnamolele ganong la ditau; mphemele dinaka tša nare.
22A nke ke begele bana bešo leina la gago, ke go rete phuthegong.
23Lena baboifamorena, mo tumišeng! Bohle ba mohuta wa Jakobo, le mo rete. Bohle ba mohuta wa Isiraele, le mmoife.
24Gobane mohlako wa mohlaki ga o nyatše, ga o nyenye; ga a mo utele sefahlego sa gagwe. Ge a goeletša o a mo kwa.
25Ke mo go hlagago sefela sa ka phuthegong e kgolo; ba ba mmoifago ba tlo mpona ge ke phetha dikeno tša ka.
26Babotlana ba tlo ja ba khora; Morena o tlo retwa ke ba mo nyakago. A dipelo tša lena di phele ka go sa felego.
27Ba kua mafelelong a lefase lohle ba tlo elelwa Morena ba mmoela; meloko ya ditšhaba tšohle e tlo mo khunamela.
28Gobane mmušo ke wa Morena; ke yena mmuši wa ditšhaba.
29Le ba dioka tša lefase ba tlo loba; bohle ba go fologela leroleng ba tlo lotšha yena.
30Le ba sa tlogo tswalwa ba tlo mo hlankela; le ditlogolwana di tlo botšwa tša Morena.
31Ba tlo tla ba bega go loka ga gagwe; tlogolo di tlo botšwa ga thwe: Morena o a dira.
