PSALME ya 24

₁Lefase ke la Morena, le makokokoko a lona, lefase lohle le baagi ba lona.

₂Ke yena mothei wa lona godimo ga mawatle, mothekgi wa lona godimo ga dinoka.

₃Thabeng ya Morena go tlo namela mang? Ke mang wa go tlo ema felo mo gokgethwa?

₄Ke wa diatla tše di se nago bosodi, wa pelotshekegi, wa pelo e sa dumego tša lefela, a sa enego maaka.

₅Yena yo o tlo amogela tšhegofatšo go Morena; o tlo ahlolelwa ke Modimo wa go mo emela.

₆Ke wona mohuta wa bao ba go mo nyaka, ba go tsoma sefahlego sa gago, wena Modimo wa Jakobo.

₇Hee lena dikgoro! Katologang! Ahlamang, lena mejako ya mehleng; go tsene Kgoši ya letago.

₈Ke mang Kgoši yeo ya letago? -- Ke Morena wa maatla, mogale, Morena mogale ntweng.

₉Hee lena dikgoro! Katologang! Ahlamang, lena mejako ya mehleng; go tsene Kgoši ya letago.

₁₀Ke mang Kgoši yeo ya letago? -- Ke Morena wa mašaba. Ke yena Kgoši ya letago.