PSALME ya 36

₁Lentšu lesolaemobe le mo pelong ya ka, le re: Go šia Modimo mo go yena ga dio.

₂Bobe bo mo okeletša mo mahlong, a hwetša e se sebe se kago hloega.

₃Polelo tša molomo wagwe ke bosenyi le bofora; o hladile tlhaloganyo le bothakga.

₄O eleletša bobe a le dilaong, a tsogela tsela e sego e botse, ga a sa itšimeletša go šaetša.

₅Morena! Botho bja gago bo fihla kua magodimong; potego ya gago e fihla kua marung.

₆Go loka ga gago go etša dithaba tša Modimo; kahlolo tša gago ke bodiba bjo bogolo. O phediša batho le dikgomo.

₇Modimo, botho bja gago ga se ka go ratega; bana ba batho ba khuta moriting wa phego tša gago.

₈Ba khora menono ya Ngwako wa gago; o ba noša noka ya menate yago.

₉Gobane go wena go mothopo wa bophelo; seetša re se bona re le seetšeng sa gago.

₁₀Botho bja gago nama nabjo go ba ba go tsebago; go loka ga gago go ye le ba pelo ya go loka.

₁₁A nke ke se gatwe ke leoto la wa boikgantšho; mme diatla tša ba babe di se nkhuduše.

₁₂Ke gona badirabokgopo ba tlogo wa, ke mo ba tlogo fenywa ba se hlwe ba tsoga.