PSALME ya 38

₁Morena, se nkotle o sa galefile; o se ntshole o befetšwe.

₂Gobane mesebe ya gago e ntlhabile; ke hlabilwe ke seatla sa gago.

₃Mmele wa ka ga o sa na mo go kwago bose ka ge o befetšwe; ga ke sa na setho se kago iketla, ge ke bona dibe tša ka.

₄Gobane melato ya ka e nthibegetše hlogo; e nthoba bjalo ka morwalo o boima.

₅Ke nkga dišo di kekago, ka ge ke dirile tša bošilo.

₆Ke hunyapane kudu, mme ke inamile, ke hlwa ke itshepelela ke nyamile.

₇Bohloko bo nkgama dinoka; mmele wa ka ga o sa na mo go kwago bose.

₈Maatla a mpheletše; ke robegetše ruri; ke bobola ke hlokogile pelo.

₉Mongaka! Tlhologelo ya ka ka moka o a e tseba; le phegelo tša ka ga tša utagala pela gago.

₁₀Pelo ya ka e a tula; maatla a ka a ntlogile; le mahlo a ka ga a sa na seetša.

₁₁Bagwera ba ka le ba gešo ba fo nkema kgole; ba bona bolwetše bo nkwetše; le bana bešo ga ba batamele.

₁₂Gomme ke theilwe ke ba ba rego ke hwe; ke lakanwa ke ba rego ba ntlholele kotsi; ba hlwa ba loga maano a mabe.

₁₃Gomme nna ke etša sefoa, ga ke kwe; ke etša semuma se sa bolelego.

₁₄Ke etša monna e a sa kwego, yo go sego boiphetolelo molomong wa gagwe.

₁₅Gobane ke letetše wena Morena; ke wena o tlogo nkwa, wena Mong a ka, Modimo wa ka.

₁₆Gobane nna ke be ke re: A ba se thabe ka nna, ge dinao tša ka di ka thedimoga; a ba se ikgantšhe ka nna.

₁₇Gomme nna ke šetše ke le wa go tlo wa; ke hlwa ke lebana le bohloko bja ka.

₁₈Ge e le molato wa ka, ke bile ke ipegile; mme ke šulafetše ka ge ke le wa dibe.

₁₉Fela, manaba a ka a a phela, a tiile; ba ba fogo ntlhoya ba atile.

₂₀Ba a ntlhokofatša, mola nna ke ba thakgile; ba mpeka ka gobane ke latela tše dibotse.

₂₁Morena, se ntlogele; Modimo wa ka, o se nkeme kgole.

₂₂Morena, akgofa o nthuše, Mong a ka Mophološi wa ka.