PSALME ya 5

₁Morena, sekegela dipolelo tša ka tšebe, o kwe diphegelo tša ka.

₂O theetše ge ke goeletša, wena Kgoši ya ka le Modimo wa ka! Ke wena ke go rapelago.

₃Morena, e sa le bosasa o kwa lentšu la ka; ke tla ke ipega e sa le bosasa, ka dula ke go lebeletše.

₄Gobane ga o Modimo wa go kgahlwa ke bokgopo; yo mobe ga a dule nago.

₅Baipoti ga be eme ba lebana nago; ba dira boleu o a ba hloya.

₆Babolamaaka o a ba senya. Monna wa madi, le wa bofora, Morena o a ba hlaswa.

₇Gomme ka botho bogolo bja gago, Ngwakong wa gago ke a tsena; ke le Ntlong ya gago ye kgethwa, ke khunama ke go boifa.

₈Morena ntlhahle go lokeng ga gago ka baka la bahloi ba ka; ya gago tsela a e loke pele ga ka.

₉Gobane ganong ga bona go hlokwa therešo; ka teng ga bona go bodile; megolo ya bona ke lebitla le le butšwego; maleme a bona ke a masese.

₁₀Ba sekiše, wena Modimo, ba we ba tantšwe ke maano a bona; ba lahle, ka ge go bona go atile bohlanogi; gobane ba tsogetše wena.

₁₁Ke mo go tlogo thaba bohle ba go botilego; ba tlo fela ba goloka o ba šireletša, wa hlalalelwa ke ba go rata leina la gago.

₁₂Gobane wena Morena, o atla moloki; botho bja gago ke kotse ya go mo efela thoko tšohle.