PSALME ya 69

₁Modimo, ntlhakodiše gobane mafula a nkgoma ka moya.

₂Ke sobeletše lerageng la go iša wa go ntlhokiša maemo. Ke tsene madibeng; ke ribegetšwa ke mafula.

₃Ke fedile maatla ka go goeletša, mme ke hwile lentšu; le mahlo a ka a lapile ka go hlwa ke letetše wena Modimo wa ka.

₄Ba go fo ntlhoya ba feta meriri ya hlogo ya ka ka go ata. Ke ba maatla ba go fo ba manaba a ka. Ke lefišwa ke sa ka ka utswa.

₅E a kago tseba bošaedi bja ka ke wena Modimo; mme melato ya ka wene ga e go šite.

₆Wena Mong wa ka Morena wa mašaba, ba ba go botilego a ba se nyatšege ka nna. Ba ba go tsomago, wena Modimo wa Isiraele, a ba se ke ba šegama ka nna.

₇Gobane ke ka lebaka la gago ge ke rwele nyatšego, ge sefahlego sa ka se bipilwe ke kgobogo.

₈Ke šetše ke le wa lethoko mo go bana bešo, yo ke sa tsebjego ke bana ba mme.

₉Gobane ke llwe ke lehufa ka lebaka la Ngwako wa gago; ke wetšwe ke kgobošo ya ba go kgobago.

₁₀Sa ka ke go lla, le go ikona dijo; mme le tšona ke nyatšwa ka lebaka la tšona.

₁₁Ke ikapešitše mankgeretla, ka napa ka ba sekwero sa bona.

₁₂Ba ba dutšego kgorong ba a nkgobotla; le matagwa a nkopela koša.

₁₃Ge e le nna, thapelo ya ka e ya go wena Morena ka lebaka le le go kgahlago; mme wena Modimo nkarabe ka bogolo bja botho bja gago, ka ge o le Mophološi mmotegi.

₁₄A ke o nntšhe lerageng, ke se sobelele ruri; a nke ke hlakodišwe mo go ba ba ntlhoilego, madibeng a meetse.

₁₅Ke se ke ka tšwena ke mafula; ke se ke ka metšwa ke bodiba; molete o se ke wa thibala ke le teng.

₁₆Morena nkwe; botho bjago ke bjo botse, o ntebelele ka ge kgaugelo ya gago e le e kgolo.

₁₇Se nkgerule nna molata wa gago, ka gobane ke tlaletšwe; o se diege go nkaraba.

₁₈Batamela moya wa ka o o lopolle ka lebaka la manaba a ka.

₁₉Go goboga ga ka o a go tseba, le dihlong tša ka, le go kgobja ga ka; le ba ba ntlhakišago bohle o a ba bona.

₂₀Nyatšego e nthobile pelo, ke nyako hloboga. Ke hlologetšwe monkwela-bohloko, ka mo hloka; wa go nkhomotša ga ke mmone.

₂₁Ba ntšheletše sabohloko ba re ke je; ba re ke nwe meetse a bodila ge ke nyorwa.

₂₂A meruswi ye ba e duletšego e ba fetogele sefu sa go ba tanya ba iketlile.

₂₃Mahlo a bona a a fifale, a se hlwe a bona; matheka a bona a a lokaloke ka mehla.

₂₄Tšhollela bogale bja bona godimo ga bona, ba swarwe ke mollo wa kgalefo yago.

₂₅Selete sa bona a e be lešope, go se be e a dulago mo nywakong ya bona.

₂₆Ka gobane ba hlomere yo wena o mo otlilego, ba bolabola tša mahloko a bahlokofatšwa bago.

₂₇Ba balele melato ya bona yohle, ba se ke ba tla ba re o ba ahlolele.

₂₈A ba phumolwe pukung ya ba phelago, ba se ke ba ngwalwa le ba lokilego.

₂₉Mme nna sekoka, nna mohlaki, ke tlo phagama ge wena Modimo o mphološa.

₃₀Ke tlo tumiša leina la Modimo ka sefela, ka mo godiša ka go mo leboga.

₃₁Tšona di kgahla Morena go fetiša kgomo le powana ya dinaka le ditlhako.

₃₂Babotlana ge ba bona fao ba tlo thaba, mme lena ba le nyakago Modimo, dipelo tša lena di tlo phela.

₃₃Gobane badiidi Morena o a ba kwa; mme bagolegwa ba gagwe ga a ba nyatše.

₃₄Magodimo a a mo tumiše, le lefase, le mawatle le dinyeunya tša ona.

₃₅Gobane Modimo o lwela Tsione, o tlo aga metse ya Juda; ba tlo dula go yona ya ba ya bona.

₃₆E tlo ba magae a bana ba balata bagwe; e tlo dulwa ke bao ba go rata leina la gagwe.