PSALME ya 78

₁Wena setšhaba sa ka, theetša molao wa ka. Le utlwele ruri puo ya molomo wa ka.

₂Ke tlo ahlama ka hlaba diema, ka bola thopa tša bogologolo,

₃Tše re di kwilego ra di tseba re boditšwe ke botatawešo.

₄Re ka se di utele bana ba bona. Re anegela ditlogolo ditheto tša Morena, tša maatla a gagwe, le tša mehlolo a go e dira.

₅Bohlatse o bo tsemile ga Jakobo; ga Isiraele a bea molao, a o laelela borrawešo, gore ba o rute bana ba bona.

₆Gore ditlogolo tše di bego di sa tlo tšwelela di o tsebe; go tsebe bana ba go tlo belegwa; le bona ba eme ba botše bana ba bona.

₇Gore le bona ba bote Modimo, ba se lebale ditiro tša Modimo; ba diše ditaelo tša gagwe.

₈Gore ba se etše botatabo, moloko wola wa bonganga le wa lonya, wa dipelo tša go se tiiše, wa meoya ya go se botegele Modimo.

₉Bana ba Efuraimi, ba itlhamile ba swere bora, ba phekgogile mohla wa tlhabano;

₁₀Ba hlala kgwerano ba lahla, ba gana go ya ka molao wa gagwe.

₁₁Ba be ba lebetše ditiro tša gagwe, mehlolo ye ba e bonego a e dira.

₁₂A dira mehlolo, botatabo ba e bona kua nageng ya Egipita, le kua lešokeng la Tsoane.

₁₃A fatola lewatle a ba sediša, a hlopha meetse boka leboto.

₁₄Mosegare a ba etetša ka leru; bošego ka moka a ba etetša ka seetša sa mollo.

₁₅A fatola lentswe lešokeng, a ba noša meetse a kago a madiba a magolo.

₁₆A thula methopo lwaleng, ya ela boka dinoka tša meetse.

₁₇Le ge go le bjalo ba fela ba boela go mo senya, ba hlanogela yena yo godimodimo gona kua mahanateng.

₁₈Ba leka Modimo dipelong tša bona ka go lopa dijo ba di kganyogago.

₁₉Ba tsota Modimo ba re: A Modimo a ka kgona go re nea dijo lešokeng?

₂₀Ge e le leswika lona o tiile la tšwa meetse, dinoka tša ela; a le bogobe a ka kgona go re nea? A ka kgona go tlišetša setšhaba sa gagwe dinama?

₂₁Morena a di kwa, mme a galefa; mollo wa tukela ba Jakobo, kgalefo ya wela Isiraele.

₂₂Ka ge ba sa ka ba dumela Modimo, ba se ke ba mmota ge a tlo ba phološa.

₂₃A roma maru a le kua legodimong, a bula mejako ya leratadima.

₂₄A ba nešetša Mana ya go lewa, a ba nea mabele' a legodimo.

₂₅Ka moka ga bona ba ja bušwa bja barongwa, a ba romela dijo mme ba khora.

₂₆A tsoša phefo ya bohlabatšatši a le kua legodimong, a tliša le phefo ya borwa ka maatla a gagwe.

₂₇A ba nešetša nama bokalerole, dinonyana tša ata wa lešabašaba la lewatle.

₂₈A di tsokamiša mešašeng, mekutwaneng ya bona gwa nyeunya tšona.

₂₉Ba ja ba khora gagolo, a ba tlišeditše tše ba bego ba di kganyogile.

₃₀Gomme ya re ba sa ja ba sa kganyoga, dijo di sa le fa marameng,

₃₁Ba tukelwa ke bogale bja Modimo; a bolaya ba nonnego mo go bona, a rapalatša masogana a Isiraele.

₃₂Le bjale ba fela ba buša ba senya, ba se dumele mehlolo ya gagwe.

₃₃Yena a lesa matšatši a bona a felela lefeleng; nywaga ya bona ya ba ya lephakaphaka la boi.

₃₄E be e re ge a ba bolaya, ba mo lla, ba mmoela ba mo hlologetšwe,

₃₅Ba elelwa gobane Modimo ke yena lentswe la bona; ba elelwa gobane Yogodimodimo ke yena Mophološi wa bona.

₃₆Ba mmobolela ka melomo, ba mo aketša ka maleme,

₃₇mola pelo tša bona di sa mo gomarele, ba sa mmotegele kgweranong ya gagwe.

₃₈Mme yena, e le yo kgaugelo, o lebalela dibe, ga a iše tshenyegong; o gomiša kgalefo gantši, o lesa go tsoša bogale bja gagwe ka moka.

₃₉A eleletša a re: Ke ba nama, ba etša moya o fetago o sa boe.

₄₀Ke gantšintši ba mo hlanogela kua lešokeng, ba mmefela gona kua leganateng.

₄₁Ba fela ba boela go leka Modimo, ba šegamiša yena Mokgethwa wa Isiraele.

₄₂Ba širega letsogo la gagwe la mola a ba namolela manabeng.

₄₃Ba lebala matete a go a dira kua Egipita, le mehlolo ya molaleng wa Tsoane.

₄₄Ke tša mola a fetola noka ya bona madi, ba šitwa go nwa didiba tša bona.

₄₅Tša mola a roma dinta tša ba loma, le digwegwe tša ba senya.

₄₆Merogo ya bona a e gafela diji, tše ba di lemilego a di gafela tšie.

₄₇Merara ya bona a e rothotha ka sefako, le mego ya bona a e senya ka tšhwane.

₄₈Le dikgomo tša bona a di gafela sefako; mehlape ya bona a e gafela ditladi.

₄₉A ba romela bogale bja gagwe bo tuka, a befetšwe a hutlega; ya ba thomo ya barongwa ba go senya.

₅₀Bogale bja gagwe a bo thulela tsela; meoya ya bona a se e efele lehu, bophelo bja bona a bo gafela dinkhu.

₅₁Maitšibulo ohle a kua Egipita o a bolaile, dithakaletswalo metseng ya ba Hama.

₅₂Setšhaba sa gagwe a se ntšha, a se gapa bjalo ka mohlape lešokeng.

₅₃A ba iša a ba hleka, ba se tšhoge selo; mme manaba a bona a a ribegetša ka lewatle.

₅₄A ba iša mellwaneng ya gagwe e mekgethwa, fa thabeng ye a e tšerego ka tsogo la gagwe le maatla.

₅₅A raka dithšhaba ge ba sa fihla, a ba fa magae ka tengwa; meloko ya Isiraele a e agiša mo metseng ya ditšhaba tšela.

₅₆Fela, bona ba leka Modimo, ba rumola Yogodimodimo, ba se hlokomele, mabohlatse a gwe.

₅₇Ba goma ba hlanoga bjalo ka bontatabo, ba etša bora bjo bo hlephilego.

₅₈Ba mo rumola ka meboto ya medimo, ba mmefediša ka diswantšho tša medimo.

₅₉Modimo ge a bona fao a hutlega, a lahla Isiraele o šoro.

₆₀A ngala bodulo bjola bja Silo, Ngwako wola wo a o hlomilego gare ga batho.

₆₁A lesa letago la gagwe la išwa bothopa, bothšhephi bja gagwe bja wela diatleng tša manaba.

₆₂Setšhaba sa gagwe a se lahletša marumong, a galefetše naga ya gagwe.

₆₃Mollo wa fetša masogana a bona; basetsana ba bona ba hloka koša ya lenyalo.

₆₄Baperisita ba bona ba fela ka lerumo, mme bahlologadi ba se ba llele.

₆₅Yena Mong a bohle a ba a phafoga, eke o tsoga borokong, bjalo ka mogale e a bego a tlemilwe ke sebela.

₆₆A phekgola manaba a gagwe, a ba lahlela dihlonyeng tše di sa felego.

₆₇A lahla motse wa Josefa, a se kgethe leloko la Efuraimi.

₆₈A kgetha leloko la Juda, le thaba ya Tsione ye a e ratilego.

₆₉A ikagela Ntlokgethwa boka thaba, ya etša lefase le a le theetšego mehla e sa felego.

₇₀A kgetha Dafida mohlanka wa gagwe, a mo tšea a le merakeng ya dihuswana.

₇₁A mo tliša a etšwa dinkung, gore a tle a diše setšhaba sa gagwe sa gaJakobo, naga ya gagwe ya Isiraele.

₇₂Yena yeo a ba diša ka bolo bja pelo ya gagwe, a ba hlahla ka seatla se bohlale.