KUTOLLO 8

₁Ge kwana e kgaola lehuto la go šupa, gwa homola gwa re “tuu” legodimong gwa ba gwa feta lebaka le e kago ba seripa sa nako. ₂Ka bona Barongwa ba ba šupago ba eme pele ga Modimo, ba newa diphalafala tše šupago.

₃Morongwa e mongwe a tla a ema aletareng a swere moruswi wa go tšhuma diorelo, e le wa gauta; a newa diorelo tše ntši gore a di ntšheletše dithapelo tša ba bakgethwa bohle moo aletareng ya gauta e bego e le pele ga sedulo sa bogoši. ₄Muši wa diorelo tša dithapelo tša ba bakgethwa wa rotoga moo aletareng moo seatleng sa Morongwa wa fihla pele ga Modimo. ₅Morongwa a swara moruswi woo wa diorelo a o kgolela mollo wa aletareng, a o lahlela fase gwa napa gwa kwala medumo le mekgoši, gwa tšwelela magadima le tšhišinyego.

₆Bjale Barongwa bala ba šupago ba swerego phalafala tše šupago, ba itokišetša go di letša.

₇Morongwa wa pele a letša phalafala; mme gwa tla sefako le mollo di tswakane le madi, tša lahlelwa lefaseng. Gwa tšhungwa karolo ya boraro ya dihlare, gwa fsa bjang bjo botala ka moka.

₈Morongwa wa bobedi a letša phalafala: ya ba eke lewatleng go lahlelwa thaba e kgolo e tukago mollo; mme karolo ya boraro ya lewatle ya fetoga madi. ₉Karolo ya boraro ya dibopša tše di phelago lewatleng ya hwa, le karolo ya boraro ya maselawatle ya fedišwa.

₁₀Morongwa wa boraro a letša phalafala; mme kua legodimong gwa wa naledi e kgolo e tukago boka seša sa mollo, ya wela karolo ya boraro ya dinoka le didiba tša meetse. ₁₁Leina la naledi yeo ke Kgalako, gobane karolo ya boraro ya meetse e ile ya fetoga ya galaka, batho ba bantši ba hwa ka meetse ao, ka gobane a galakišitšwe.

₁₂Morongwa wa bone a letša phalafala; mme karolo ya boraro ya letšatši ya phumiwa, le karolo ya boraro ya kgwedi, le karolo ya boraro ya dietša tšeo; letšatši la hloka seetša ka lebaka la karolo ya boraro ya lona, le bošego gwa ba bjalo.

₁₃Ke sa lebeletše, ka kwa Morongwa a fofa boka lenong a phatša legodimo ka bogare, a hlaboša lentšu a re: Joo! Joo! Joo! Lena baagi ba lefase le sa tlo tlelwa ke tša mekgoši ya diphalafala tša Barongwa ba bararo, ba ba sa tlogo letša!