BAROMA 1

₁Paulo mohlanka wa Jesu Kriste, Moapostola wa go bitšwa le go hlaolelwa Ebangedi ya Modimo, ₂yeo a bego a re holofeditše yona ka baporofeta ba gagwe Mangwalong a makgethwa, ₃ona a go bolela Morwa wa gagwe e a tswetšwego e le wa leloko la Dafida ka nama, ₄a bonala e le Morwa wa Modimo ka maatla le ka Moya wa bokgethwa, le ka go tsoga bahung, yena Jesu Kriste mong wa rena. ₅Ke yena a re filego kgaugelo le boapostola, gore mo go bohle bantle go be le ba ba mo kwago ka tumelo, gore a tle a be le leina. ₆Gomme le lena le ba mohuta woo wa babidiwa ba Jesu Kriste.

₇Nna Paulo ke ngwalela lena ba motseng wa Roma, lena baratiwa ba Modimo, lena bakgethiwa ba ba biditšwego bohle.

Kgaugelo a e be le lena le khutšo e tšwago go Modimo Tata wešo le go Morena Jesu Kriste.

₈Ke thoma ka go leboga Modimo wa ka ka Jesu Kriste ge ke bona lena bohle, tumelo ya lena ge e bolelwa mo go fela lefaseng. ₉Gobane hlatse ya ka ke Modimo yo ke mo direlago moyeng wa ka go kwatša Ebangedi ya Morwa wa gagwe; o tseba ge ke sa kgaotše go le gopola, ₁₀ge ke fela ke kgopela merapelong ya ka, gore ge Modimo a rata, ke be ke bulelwe tsela ya go tla go lena. ₁₁Gobane ke hlologetšwe go le bona, gore ke le hlallele neo ya Moya, e be go le tiiša. ₁₂E tlo ba go emelana ka tumelo ya rena, go le ya lena, go le ya ka.

₁₃Gomme, bana, bešo, ga ke rate go le utela ge e šetše e le gantši ke re ke tla go lena, mme ka šitišwa; ke rata go bona seenywa sa lena, bjalo ka ge ke se bone ditšhabeng tše dingwe. ₁₄Ke kwa eke ke tlemilwe gore ke hlankele Bagerika le ba mehuta e šele, le ba bohlale le ba ba se nago bohlale. ₁₅Le bjale, ge e le ka nna, ke phegeletše gore le lena ba Roma ke le botše Ebangedi.

₁₆Gobane ga ke na maseme ka Ebangedi ya Kriste, hleng e le maatla a Modimo a go phološa mang le mang e a dumelago, go thoma ka Bajuda, go iša pele ka Bagerika. ₁₇Gomme ka yona Ebangedi go utollwa toko ya Modimo e tšwago tumelong e iša tumelong, bjalo ka ge go ngwadilwe gwa thwe: Moloki o tlo phela ka tumelo.

₁₈Ge e le bogale bja Modimo bo etšwa legodimong, bo bonala bo okametše bohle ba go se boife Modimo, le batho ba bokgopo, ba ba dibago therešo ka bokgopo. ₁₉Gobane tše di tsebegago tša Modimo, le go bantle di pepeneneng, ka ge Modimo a di beile pepeneneng mo go bona. ₂₀Hleng tše di sa bonwego tša gagwe, a lego maatla a neng le neng, le bomodimo bja gagwe, le tšona go tloga tlholong ya legohle, ba ka di hlatha ka go bona ditiro tša gagwe, mme ba hloka tše ba kago latola ka tšona. ₂₁Gobane, le ge Modimo ba mo tsebile, ga ba ka ba mo godiša ba re ke Modimo, ga ba ka ba mo leboga. Ba išitše megopolo lefeleng, dipelo tša bona tša fifala di šilofetše. ₂₂Ba šilofetše mola ba bata mahlale. ₂₃Letago la Modimo Mosefetoge, bakeng sa lona ba beile swantšho sa mothomofetile sa nonyana, le sa phoofolo, le sa digagabi.

₂₄Modimo a ba a ba lesa ba ya le dikganyogo tša dipelo tša bona, ba tsena ditšhileng ba ikgoboša mebele. ₂₅O ba bone ba hlanogetše therešo ya Modimo ba ya le maaka, ba ipega go dibopša ba di hlankela, ba hladile Mmopi Moretwa wa mehleng. Amen.

₂₆Molato ke wona woo ge Modimo a ba gafa ba ya le ditumo tše di lešago dihlong; basadi ba bona ba tlogela modirelo wo ba o bopetšwego, ba tšea modirelo wo ba sa kago ba bopelwa wona; ₂₇banna ba tla ba tlogela modirelo wo ba o bopetšwego wa go dula le mosadi, ba fišegelana monna a duma monna, ba dira tša dihlong; gomme kotlo ya phapogo ba e bona mebeleng ya bona.

₂₈Ke ka gobane ba nyaditše Modimo, ba nyatša go mo tseba. Modimo a ba lesa ba ya le kgopolo tša lefela, ba dira tše di sa dirwego, ₂₉ba tletše bobe bjohle, le bootswa, le bohlola, le megabaru; ba tletše mona le bobolai, le mereba, le maaka, le bomenetša; ₃₀ke ba ditshele, le bophari; ke manaba a Modimo; ke ba lonya; ke baikgogomoši, baikgantšhi, balogi ba mašula, ba go se kwe batswadi; ₃₁ga ba na mogopolo le potego; ga ba na botho le kgaugelo. ₃₂Toko ya Modimo ba a e tseba. Ba tseba le gore badiri ba tše bjalo sa bona ke lehu. Le ge go le bjalo ba di dira, ba thabela ba ba di dirago.