BAROMA 14

₁Mofokodi tumelong le mo amogeleng, e se gore le tšee kgang ka diila. ₂E mongwe o dumela go ja tšohle; mofokodi o fo ja merogo. ₃E a jago a se ke a nyatša eo a sa jego. E a sa jego a se ke a ahlola eo a jago; hleng Modimo o mo amogetše. ₄Wena o mang ge o itira moahlodi wa molata wa e mong? Ge a ema o emela mong wa gagwe; ge a ewa o wela mong wa gagwe; gomme o tlo ema gobane mong wa gagwe o na le maatla a go mo emiša.

₅E mongwe o bona letšatši le lengwe e le le legolo; e mongwe a tla a re matšatši a a lekana. A motho a tsebe se a se kgodilwego e le nnete. ₆E a hlaolago letšatši le go ikona, o le hlaolela Morena; e a sa hlaolego letšatši a ja, le yena o direla Morena ka go se hlaole letšatši. E a jago, le e a sa jego, bohle ba direla Morena, mme ba mo leboga. ₇Gobane mo go rena wa go iphelela ga a gona; le wa go ikhwela ga a gona. ₈Ge re phela re phelela Morena; ge re ehwa re hwela Morena. Re ba Morena ge re phela; le ge re ehwa re ba gagwe. ₉Ke tšona tše Kriste a hwetšego tšona mme a tsoga a phedile, gore a be Morena wa bahu le wa ba phelago. ₁₀Gomme wena o reng ge o ahlola ngwaneno? Ke buša ke re: Gomme wena, o reng o nyatša wa geno? Hleng ka moka re tlo ema re lebane le sedulo sa kahlolo sa Kriste! ₁₁Gobane go ngwadilwe gwa thwe: Ke enne ka nna ke phelago, ka re: matolo ka moka a tlo nkhunamela. O realo Morena. Maleme ka moka a tlo tumiša Modimo. ₁₂Sedio ge, motho mang le mang wa rena o tlo iphetolela pele ga Modimo.

₁₃Ke gona, a re se hlweng re ahlolana; go kaone ge le ka ahlola la re: motho a se ke a kgopiša ngwanabo a mo uša. ₁₄Ke a tseba, gomme ke kgodilwe ka Morena Jesu, ge go se seila sa go ilwa ka baka la sona seng; e ba seila ka eo a se ilago. ₁₅Bjalo ge ngwaneno a hlokofatšwa ka se wena o se jago, gona ga o sa ya ka lerato. O se ke wa mo timetša. ₁₆Le se ke la nyatšiša bjona botse bja lena. ₁₇Gobane mmušo wa Modimo ga se go ja le go nwa, ke toko le khutšo le thabo ka Moyamokgethwa. ₁₈E a direlago Kriste a na le tšona tšeo, o kgahla Modimo, o botwa ke batho.

₁₉Ke gona a re phegeleleng tše re kago khutšišana ra agišana ka tšona. ₂₀Modiro wa Modimo o se ke wa o senya ka baka la dijo. Ga go se se ilago; fela, e ka ba sebe ge motho a ka se ja mme ya ba kgopišo. ₂₁Ke mo go botse ge o sa je nama, o sa nwe sedila, o lesa se se kgopišago ngwana weno. ₂₂Tumelo ye o nago nayo, a e be go itumelela pele ga Modimo. Wa lehlogonolo ke eo, yo e rego ge a iphetleka, a se hwetše se a kago ipea molato ka sona. ₂₃Ge e a belaelago a eja, o oba molato ka ge a eja a se na tumelo. Gomme tšohle tše di sa tšwego tumelong ke sebe.