BAROMA 16

₁Ke le laela Foribe kgaetšedi ya rena, e lego mohlankedi wa phuthego ya Kenkrea. ₂Mo amogeleng Moreneng ka mo go swanetšego bakgethwa, le mo thuše dilong tšohle tše a kago lla go thušwa ke bolena; gobane o thušitše ba bantši; le nna o nthušitše.

₃Dumedišang Perisika le Akwila badirišani baka ka Jesu Kriste. ₄Ke bona ba kilego ba neela dihlogo tša bona e le go namolela nna; ga se ba lebogwa ke nna fela; ba lebogwa ke diphuthego tšohle tša bantle. ₅A ba dumele le phuthego ya mo lapeng la bona.

Dumedišang Epaineto moratwa waka, yena thakangwaga ya Kriste nageng ya Asia. ₆Le dumediše le Maria e a itapišitšego gagolo ka rena. ₇Dumedišang Androniko le Junia metswalo ya ka, ba ba kilego ba ba kgolegong le nna; ba tumile go baapostola; e be e le bakriste, nna ke sešo.

₈Dumedišang Amplia moratwa wa ka Moreneng. ₉Dumedišang Urubano modirišani wa rena wa Kriste, le Stagi moratwa wa ka. ₁₀Dumedišang Apelle monna wa go botegela Kriste. Dumedišang le Aristobulo. ₁₁Dumedišang Herodione motswalo wa ka. Dumedišang le ba gaNarakiso ba e lego ba Morena.

₁₂Dumedišang Terefina le Terifosa ba ba itapišeditšego Morena. Dumedišang le Peresi morategi e a itapišeditšego Morena gagolo. ₁₃Dumedišang Rufo mokgethwa wa Morena, le mmagwe, yo le nna e lego mmane. ₁₄Dumedišang Asinkrito, le Flegone, le Hereme, le Patroba, le Herema, le bana bešo ba nago le bona. ₁₅Dumedišang Filologo, le Julia, le Nereo, le kgaetšedi ya gagwe, le Olimpa, le bakgethwa ba nago le bona.

₁₆Dumedišanang ka katlokgethwa. Diphuthego tša Kriste di a le dumediša.

₁₇Bana bešo, ke le rapela gore le phafogele ba ba dirago dikgaogano le dikgopišo, ba gana thuto ye le e rutilwego. Le ba širogele. ₁₈Ba ba bjalo ga ba direle Mong a rena Jesu Kriste; ba direla dimpa tša bona; mme ba ba se nago maano ba ba foraforetša ka dipolelo tše boreledi tša go kgahla batho. ₁₉Go kwetše gohle ge le le ba ba kwago; ke gona ke le thabelago, ke rata ge le hlalefela bolo, tše mpe la di šilofalela. ₂₀Modimo wa molao o tlo tloga a kgabutlanya Sathana la mo gata ka dinao.

Kgaugelo ya Mong a rena Jesu Kriste a e be le lena.

₂₁Timotheo modirišani wa ka, le Lukio, le Jasone, le Sosipatere metswalo ya ka, ba a le dumediša.

₂₂Nna Teresio mongwadi wa lengwalo le ke le dumediša Moreneng.

₂₃Gayo yo ke lego moeng wa gagwe le phuthego ka moka, o a le dumediša. Erasito mokgoma wa motse, le Kwarato ngwanešo ba a le dumediša. ₂₄Kgaugelo ya mong a rena Jesu Kriste a e be le lena bohle. Amen.

₂₅Bjale yena e a kgonago go le tiiša ka yona Ebangedi ya ka ka lona foko le la Jesu Kriste, ka kutollo ya phihlo ye e bego e homoletšwe mehleng le mehla, ₂₆Ya tla ya utollwa mehleng yeno ka mangwalo a baporofeta go iwa ka taelo ya Modimo Ramabaka, ya tla ya anegelwa tšhaba tšohle gore di mo kwe,

₂₇Yena Modimo Mong a bohlale a nnoši, a a retwe ka Jesu Kriste ka mehla le neng le neng. Amene.