BAROMA 4

₁Bjale Aborahama tata wešo ka nama re tlo mo reng? ₂Ge yena Aborahama e ka be e le wa go lokafala ka mediro, go mo reta go ka ba gona; fela, go itheta pele ga Modimo ga go gona. ₃Lengwalo le reng? Le re: Aborahama a dumela Modimo; mme Modimo a mmalela tumelo yeo a re ke yona toko. ₄Wa go ya ka mediro ga a balelwe moputso ka kgaugelo; o balelwa ka tshwanelo. ₅E a sa yego ka mediro, mme a dumela eo a lokafatšago modiradibe, o balelwa tumelo ya gagwe gwa thwe ke yona toko, ₆ke tšona Dafida le yena a di bolelago a era lehlogonolo la motho yo Modimo a mmalelago toko go se mediro, a re: ₇Wa lehlogonolo ke molebalelwadikarogo, yo dibe tša gagwe di khupeditšwego, ₈wa lehlogonolo ke motho eo Morena a sa mmalelego molato.

₉Ge a re: Wa lehlogonolo, o ra mang? A o ra wa lebollo? Goba o ra wa go se bolle? -- Re sa ya le lentšu lela la ge Aborahama a baletšwe tumelo, gwa thwe: Ke yona toko. ₁₀O e baletšwe e le o mobjang? A ke ge a šetše a bolotše, goba ke mola a sešo a bolla? A ga se mola a sešo? ₁₁Leswao la lebollo o le filwe ya ba seka sa bohlatse bja toko ya tumelo ye a bego a na nayo mola a sešo a bolla gore a kgone go ba tatago bohle ba ba dumelago ba sa bolle, gore le bona ba balelwe toko, ₁₂a kgone go ba tatago ba lebollo, e sego wa bao ba go fo bolla fela; ke tatago bao ba tšeago ka mohlala wa tumelo ya Aborahama tata wešo, ye a bego a na nayo a sešo a bolla.

₁₃Kholofedišo ya go re lefase e tlo ba bohwa bja Aborahama le la bana ba gagwe ga se ya mo tlela ka wona Molao, e mo tletše ka go loka ka tumelo. ₁₄Ge bajalefa e le bao ba Molao, gona tumelo e ba ya lefela, le kholofedišo e fedišitšwe. ₁₅Le gona Molao o bitša kgalefo; mo go sego Molao ga go na go sela Molao.

₁₆Bajalefa ke bao ba tumelo gore go iwe ka kgaugelo, gore kholofedišo e tle e ane bohle ba e lego bana ba Aborahama, e sego ba Molao fela, e be le ya bao ba tumelo ya Aborahama, yena tatagorena bohle. ₁₇Di ngwadilwe mo go rego: Ke go beile go tlo ba tatago bontši bja ditšhaba. Ke yena tata wešo pele ga Modimo eo Aborahama a mo dumetšego, Mophedišabahu, tše di sego gona a di bitša tša ba gona. ₁₈Aborahama o dumetše a holofetše go se na sa go holofelwa, ge go thwe o tlo ba tatago ditšhaba tše ntši, gwa thwe: Bana ba gago ba tlo ata gakao. ₁₉Ga a ka a fokola tumelong, ge a bona mmele wa gagwe o notlegile ka ge nywaga ya gagwe e nyaka go ba e lekgolo, ge a bona go notlega ga mmele wa Sara. ₂₀Kholofedišo ya Modimo ga a ka a e belaela ka go se dumele; sa gagwe ya ba go tiela tumelo le go godiša Modimo, ₂₁a kgodilwe ruri gore Modimo o na le maatla a go dira se a mo holofedišitšego sona. ₂₂Ke tšona tše a baletšwego tšona gwa thwe ke toko. ₂₃Gomme tšeo tša ge go thwe: o baletšwe tšona, ga tša ngwalwa ka baka la gagwe fela, ₂₄di ngwaletšwe le rena ba re tlogo balelwa ge re dumela yena a tsošitšego Jesu Mong a rena bahung, ₂₅yo a gafilwego ka baka la dibe tša rena, a tsošwa ka baka la tokafatšo ya rena.