RUTHE 4

₁Boase a rotoga a ya kgorong a dula. Mohunolodi yola, yo Boase a bego a mmolela, ge a feta, Boase a mo rera a re: Wena semangmang, fapogela mono. A tla a dula. ₂Boase a bitša banna ba lesome ba bagolo ba motse, a re: Dulang mo; mme ba dula. ₃Boase a bolela le yola wa mohunolodi a re: Naomi o tšo boa nageng ya Moaba, o rekiša serapa sela se e bego e le sa Elimeleke ngwana borena. ₄Nna bjale ke bolela o di kwe, ke re: Reka serapa seo re le fa, re na le bagolo ba selete sa gešo. Ge o rata go hunolla, o hunolle. Ge o sa rate, o mpotše, ke tsebe fao; ka gobane ga go sa na mohunolodi e mongwe ge e se wena, le nna ke go hlatlamago.

Monna eo a re: Ke tlo hunolola.

₅Boase a re: Ge o reka tšhemo yeo ya Naomi, o nyala Ruthe mosadi yola wa ga Moaba wa mohlologadi. O tlo mo tšea gore mohu yola o mo tsošetše leina mo bohweng bja gagwe.

₆Ke mo mohunolodi a itšego: Gona nka se kgone go hunolola; e ka ba go senya bohwa bja ka. A go ikhunollele wena bakeng sa ka; nna di a mpalela.

₇Bjale go be go na le mokgwa wa kgale wa Baisiraele, wa gore ge go hunollwa, goba ge go rekanywa, motho a role seeta sa gagwe a se nee wa gabo; ya ba bohlatse go Baisiraele.

₈Le bjale mohunolodi yola ge a rera Boase a re: Ithekele wena, a rola seeta sa gagwe. ₉Boase a bolela le bagolo ba selete ka moka a re: Lena le dihlatse lehono tša gore, tše e bego e le tša Elimeleke le tša Kileoni le tša Mahlone, ke di rekile go Naomi. ₁₀Le Ruthe mosadi yola wa ga Moaba ke a mo tšea, gore mohu yola ke mo tsošetše leina bohweng bja gagwe, gore leina la gagwe le se hwe mo go bana babo le kgorong ya gabo. Le dihlatse lehono.

₁₁Setšhaba ka moka se se bego se le kgorong le ba bagolo ba re: Re dihlatse. A Morena a dire gore mosadi eo a tsenago lapeng la gago a etše Rahele le Lea, ba babedi bao ba bathei ba setšhaba sa Isiraele. Baa senatla mono Efuratha, o be le leina mono Betlehema. ₁₂A lapa la gago le etše la Pheretse, yo Juda a mmelegetšwego ke Thamara; go be bjalo ka bana, ba Morena a tlogo go nea ka mosadi e.

₁₃Ya ba gona Boase a tšeago Ruthe ya ba mosadi wa gagwe. Ya re ge a tsene go yena, Morena a mo thabiša, a ithwala a belega ngwana wa mošimanyana. ₁₄Basadi ba tla go Naomi ba re: A Morena a lebogwe ge a sa ka a go hlokiša mohunolodi lehono; a ina la gagwe le kwale mo go Isiraele. ₁₅A a go lapološe pelo, a go babalele ge o šetše o godile, ka gobane o belegwe ke ngwetši e ya gago, e a go ratilego a fetiša barwa ba ba šupago. ₁₆Naomi a tšea ngwana eo, a mo fara difarong, a ba mofepi wa gagwe.

₁₇Basadi ba ba bego ba agišane nae ba mo rea leina, ba re: Naomi o belegetšwe ngwana wa mošimanyana; ba mmitša ka la Obede.

Ke yena tatago Isai, e lego tatago Dafida.

₁₈Ba leloko la Pheretse šeba: Pheretse ke tatago Hetserone. ₁₉Hetserone ke tatago Rame. Rame ke tatago Abinadaba. ₂₀Abinadaba ke tatago Nahesone. Nahesone ke tatago Salama. ₂₁Salama ke tatago Boase. Boase ke tatago Obede. ₂₂Obede ke tatago Isai. Isai ke tatago Dafida.