TITO 1

₁Paulo mohlanka wa Modimo le Moapostola wa Jesu Kriste ka go ya ka tumelo ya bahlaolwa ba Modimo, le ka tsebo ya therešo ye e išago borapeding. ₂Ka go holofela bophelo bjo bo sa felego, bjo Modimo yena Morereši a bo holofedišitšego batho mola mabaka a bogologolo a sešo a ba gona, ₃a tla a tšweletša lentšu la gagwe ka lebaka la gona ka boseta bjo nna ke bo gafetšwego ka taelo ya Mophološi wa rena, ka taelo ya Modimo.

₄Ke ngwalela wena Tito, e o lego ngwanaka wa ruri ka tumelo ye re lego batee ka yona.

Go gaugelwa le go šokelwa le go khutšišwa a di be nago di etšwa go Modimo Tata wešo le go Jesu Kriste Mophološi wa rena.

₅Mola ke go šadiša Kereta e be e le gore o phethe o tlatše tše di bego di sa hlaela, o bee bagolo o eya le metse ka mo ke go laetšego ka gona. ₆E be batho ba ba se nago bosodi, monna e be wa mosadi o tee, e a nago le bana ba ba dumetšego, e sego ba go tsebja bohlola le go se kwe. ₇Gobane molebeledi, go swanetše ge e le motho e a se nago senyalo, gobane ke molaki wa Modimo. E se ke ya ba senganga, goba mogalefi, le ge e le monwi, goba motho wa mereba, le ge e le wa go nyaka leruo le lebe. ₈A e be motho e a ratago baeng, moratabolo, wa tlhaologanyo, moloki, mokgethwa, moithswari. ₉A e be motho wa go ya ka thuto ya lentšu le le tiilego le, gore a kgone go eletša batho ka thuto ye e se nago phokolo, a kgone go sola baganyetši.

₁₀Gobane go na le ba bantši ba ba ganago go bušwa, batii ba maleme le baforaforetši, gagolo mo go ba lebollo. ₁₁Ke bona ba ba swanetšego go thibja melomo, gobane ba ferekanya batho ka malapa ka thuto yeo e sa tsebalegego, e le go nyaka leruo le lebe. ₁₂E mongwe wa bona, moporofeta wa gabo bona beng, o itše: Bakereta e sa le mola ke babatamaaka, dibata tše šoro, dimpa tša dibodu! ₁₃Lefoko le le šupa se ba lego sona. Ba sole ka thata, ba fole bolwetši bjoo ka tumelo; ₁₄ba lese go šetša dinonwane tša Bajuda le ditaelo tša batho ba ba hlanogetšego therešo. ₁₅Basekegi ba sekegetšwe ke tšhole. Ba tšhila le ba ba sa dumelego ba tšhilafaletšwe ke tšohle, ka gobane ba tšhilafaletše kgopolo le letswalo. ₁₆Ba ipolela ba re: Modimo re a mo tseba, mme ba mo latola ka mediro. Ke ba makgapha le ba go se kwe; ga go modiro o botse wo ba kago o botegela.