SAKARIA 6

₁Ka buša ka lebelela ka bona dikoloi tše nne di etšwa ka sefateng sa dithaba tše pedi. E be e le dithaba tša mphiri. ₂Koloi ya pele e be e bofilwe ka pitsi tše khulong; ya bobedi e be e na le tše ntsho; ₃Koloi ya boraro e be e na le dipitsi tše tšhweu; ya bone e be e na le dipitsi tše phaswa tše maatla. ₄Ka botšiša Morongwa yola a bego a bolela le nna, ka re: Mong a ka tše ke eng?

₅Morongwa a fetola a re: Ke tša go ya thoko tše nne tša lefase, di etšwa mo di bego di eme pele ga Mong a lefase lohle.

₆Koloi ya dipitsi tše ntsho e ya nageng ya leboa; ya dipitsi tše tšhewu e latela yona. Ya dipitsi tše phaswa e ya nageng ya borwa. ₇Tše maatla, ge di tšwa, di rata go ralala lefase. Mme a re: Yang le ralaleng lefase! Mme tša ralala lefase. ₈A hlaboša lentšu a bolela le nna a re: šedilee! Tše di tšwetšego nageng ya leboa, di ilo khutšiša Moya wa ka nageng ya leboa.

₉Lentšu la Morena la ntlela la re: ₁₀Amogela tše di tlišwago ke mathopša, ka Heledai, le ka Tobia, le ka Jedaya; go ye wena mong lehono, o tsene ngwakong wa Josia morwa wa Tsefanya, mo ba gorogetšego gona ba etšwa Babele. ₁₁O amogele silifera le gauta, o dire mphapahlogo, o o rweše Joshua morwa wa Jotsadaka moperisita e mogolo. ₁₂O bolele le yena o re: Morena wa mašaba o re: So monna yo leina la gagwe e lego Lehlogedi, ka gobane mo a lego gona go tlo hloga, mme o tlo aga Ntlokgethwa ya Morena. ₁₃Ke yena a tlogo aga Ntlokgethwa ya Morena; ke yena a tlogo tšweletša letago a dutše sedulong sa gagwe a buša; e tlo ba yena moperisita a le sedulong sa gagwe; bobedi bjo bo tlo tšweletša kwano le molao. ₁₄Mphapahlogo woo a e be seeletši sa Helema le Tobia le Jedaya le Hene; o bewe Ntlongkgethwa ya Morena.

₁₅Ba kgole ba tla go agiša Ntlokgethwa ya Morena. Tsebang, gee, gobane ke Morena wa mašaba e a nthometšego go lena. Di tlo phethega ge le theetša la kwišiša lentšu la Morena Modimo wa Lena.