1 IINKRONIKE 13

₁UDavida wakhulumisana neenduna zakhe zeenkulungwana nezamakhulu, nazo zoke iinhloko. ₂Kiyo yoke ihlangano yeenhloko zakwa-Israyeli wathi: “Nakube kuhle kini nebusweni bakaSomnini uZimethu, asiphadlhalaleni sifikise ilizwi kilo loke inengi labafowethu abasemikhawulweni yoke yakwa-Israyeli, nebaphristini nakumaLevi asemizini abelwe yona bona beze bazozihlanganisa nathi. ₃Asihlanganeni ukuze sibuyisele umfaji kaZimu ngakithi ngombana emihleni kaSawula akhange siwukhathalele.” ₄Ihlangano yavumelana yoke nesiphakamisweso ngombana abantu boke basibona silungile.

₅Ngalokho uDavida wahlanganisa woke u-Israyeli ukusukela ephakgheni lomlambo weGibhide ngesewula ukuya eLebo-Rhamathi ngetlhagwini bona kususwe umfaji kaZimu eKhiriyathi-Jeyarimu. ₆UDavida nabantu boke bakwa-Israyeli baya eBhala okuyiKhiriyathi-Jeyarimu yakwaJuda bona bakhuphule lapho umfaji kaZimu onguSomnini ohlala phezu kwamakerubhi; umfaji ogade umanyaniswa nebizo lakhe. ₇Bathwala umfaji kaZimu bawususa endlini ka-Abinadaba ngekoloyana etja. U-Uza no-Arhiyo bekubatjhayeli bekoloyana leyo. ₈UDavida nawo woke ama-Israyeli gade bagidinga ngamandlabo woke phambi kwakaSomnini. Bebavuma lokha nabancinza imihlobohlobo yamaharibha, bebabetha abosotjherere neewahlo begodu balilisa neemporompita. ₉Nabafika eselelweni seKidoni, u-Uza welula isandla bona abambe umfaji ngombana ikoloyana yakhahlumezeka lokha iinkomo nazifika edwalenapho. ₁₀Ubukhali bakaSomnini uZimu bavuthela u-Uza, wamradlha phasi ngombana gade athinte umfaji. Wafela khonapho phambi kwakaZimu. ₁₁UDavida wakhathazeka ngombana uSomnini uphahlaze u-Uza. Yeke wathiya indawo leyo bona yiPeretsi-Uza. Ibizwelo lisajamile nanamhlanjesi.

₁₂Mhlokho uDavida wesaba uZimu bewadlumbana wathi: “Alo, ngingawuletha njani umfaji kaZimu kwamapha?” ₁₃Akhange asathatha umfaji bona uye kwakhe, eMzini kaDavida. Kunalokho wawuphambukisela endlini ka-Obede-Edomu umGathi. ₁₄Umfaji kaZimu wahlala khonapho nomndeni ka-Obede-Edomu iinyanga ezintathu. Nje-ke uSomnini uZimu wabusisa umndenakhe nakho koke anakho.