1 KWEBEKORINTE 4

₁Kufanele kwazeke bona thina siziinceku zakaKrestu eziphathiswe iimfihlakalo zakaZimu. ₂Yeke kuyadingeka bona labo abaphathisiweko babonakalise ukuthembeka kwabo. ₃Kodwana kimi kuyinto encani bona ngingagwetjwa ngini namkha libandla labantu; iye, nami ngokwami angizigwebi. ₄Unembeza wami akanaso isazela, nokho lokho akungenzi bona ngibe msulwa. YiKosi engigwebako. ₅Ngalokho-ke ningagwebi ilitho kungakafiki isikhathi, lindani bekufike iKosi. Yona izokuveza emkhanyweni koke okufihlwe ebumnyameni beyembule neenhloso zeenhliziyo zabantu. Ngesikhatheso uZimu uzokwamukelisa omunye nomunye ukuthokozwa okumfaneleko.

₆Nje-ke bazalwana, ngiqalise izintwezi kimi no-Apholo ngebanga lenu ukuze nifunde kithi lokho okutjhiwo sisitjho esithi: “Ningaphambuki kilokho okutloliweko.” Ngalokho-ke anisoze nakhetha umuntu oyedwa hlangana nabanye bese nizikhakhazisa ngaye. ₇Kanti ngubani onenza nehluke phakathi kwabanye na? Yini eninakho eningazange nikwamukeliswe na? Khona-ke nakube nikwamukele, kubayini nizigqaje kube ngathi anikamukeliswa na?

₈Konjephana seniyasutha! Senaba ziinjinga! Senaba makhosi, iye ngaphandle kwethu! Maye ngifisa kangangani bona thana sele nimakhosi ukuze sibe makhosi kanye nani! ₉Ngitjho ngombana kubonakala inga uZimu thina bapostoli usibeke embukisweni ekugcineni komlandelande njengabantu abagwetjelwe ukufa ekundleni. Senziwe amabono wephasi loke, weengilozi ngitjho newabantu. ₁₀Thina sesesiziindlhayela zakaKrestu, kodwana nina niziinhlakaniphi kuKrestu! Thina sibuthakathaka, kodwana nina ninamandla! Niyahlonitjhwa, thina siyanyazwa! ₁₁Bekube ngalesisikhathi siyalamba besibulawe mrhawu, simaratha, siphethwe kumbi, sibozulani, ₁₂sisebenza nzima ngezandla zethu. Nasithukiwako siyabusisa; nasizunywako siyakubekezelela lokho; ₁₃nasiphudlhelwako siphendula ngokuthobeka. Bekube nje, siphenduke ifucufucu yephasi, iinzibi zelizwe.

₁₄Anginitloleli lokhu ngombana ngifuna ukuniphathisa iinhloni, kodwana ngifuna ukuniyelelisa njengabantwana bami engibathandako. ₁₅Sengitjho nanyana nineenkulungwana ezilitjhumi zabaluleki kuKrestu, aninabobaba abanengi ngombana kuKrestu Jesu mina ngibe nguyihlo ngevangeli. ₁₆Nje-ke ngiyanirabhela bona ningilingise. ₁₇Kungalokho nginithumela indodanami uThimothi engimthandako nothembekileko eKosini. Uzonikhumbuza ikambo yokuphila kwami kuKrestu Jesu evumelana nalokho engikufundisako kizo zoke iindawo emabandleni woke.

₁₈Abanye benu sele bazikhukhumeza inga angeze bengiseza kini. ₁₉Kanti-ke nangabe iKosi ivuma, ngizokuza msinyana. Nje-ke ekufikeni kwami, angizukufunyana kwaphela bona abantu abazikhukhumezako laba bakhuluma kangangani, kodwana ngizokufunyana nokobana banaliphi igunya. ₂₀Ngitjho ngombana umbuso kaZimu awusikukhuluma kodwana umamandla. ₂₁Alo, ninyula kuphi na? Ngifike kini ngiphethe iswazi, namkha ngize ngethando nangommoya ophasi na?