1 KWEBEKORINTE 9

₁Angikakhululeki na? Angisuye umpostoli na? Angikaboni uJesu iKosi yethu na? Nina anisiwo umphumela womsebenzami eKosini na? ₂Nanyana ngingeze ngaba mpostoli kabanye kodwana kini khona nginguye! Ngitjho ngombana nina nisigibo sobupostoli bami eKosini.

₃Lokhu kukuziphendulela kwami kilabo abangisolako. ₄Asinalungelo lokugonywako nokuselwako na? ₅Asinalungelo lokukhamba nomfazi okholwako njengombana kwenza abanye abapostoli kanye nabafowabo leKosi kanye noKhefasi na? ₆Namkha ngimi noBharinabhasi kwaphela ekumele sisebenzele ukudla na? ₇Ngubani osebenza njengejoni ngeendleko zakhe na? Ngubani otjala isidiribe kodwana angagomi amadiribaso na? Ngubani owelusa umhlambi kodwana angaseli ibisi lawo na?

₈Kghani ngitjho lokhu ngokususela ebantwini na? Umthetho awutjho njalo nawo na? ₉Kutloliwe emthethweni kaMosi kwathiwa: “Ungafaki ikomo isifonyo nayibhula amabele.” Kghani uZimu ukhathalela iinkomo na? ₁₀Kanti bekangakaqalisi kithi lokha nakhuluma lokhu na? Iye, lokhu kwatlolelwa thina ngombana lokha umlimi nalimako nombhuli nabhulako, lokho bakwenza ngethemba lokobana bazokwabelwa isivuno. ₁₁Nakube sitjele imbewu kaMoya hlangana nani, kubudisi bonyana sivune kwenyama kini na? ₁₂Nakube abanye banelungelo lokondliwa phakathi kwenu, thina asikafaneli samukele ngaphezu kwalokho na?

Kodwana azange khesilisebenzise ilungelweli. Esikhundleni salokho sinyamezelele yoke into kunobana siliye ivangeli lakaKrestu. ₁₃Anazi bona labo abasebenza ngethempelini bafumana ukudla kwabo ethempelini nalabo abalotjha e-aldarini babelana lokho okulethwe e-aldarini na? ₁₄Ngokunjalo-ke iKosi ikubekile bona labo abatjhumayela ivangeli bafanele bafumane isondlo sabo evangelini.

₁₅Kodwana mina angizange ngisebenzise nalinye lamalungelo la. Nokho angitloli lokhu ngethemba lokobana nizangenzela izintwezo. Kungaba ngcono ngife kunobana umuntu angemuke ukuzikhakhazisa lokhu. ₁₆Nokho nangitjhumayela ivangeli, angikwazi ukuzikhakhazisa ngombana ngikatelelekile bona ngitjhumayele. Maye mina nakube angitjhumayeli ivangeli! ₁₇Nakube ngitjhumayela ngokuzithandela kwami, nginomvuzo; nakube angikwenzi ngokuzithandela, kutjho bona ngiphetha lokho engikuphathisiweko. ₁₈Alo-ke umvuzo wami uyini na? Sengilokhu kokuthi ekutjhumayeleni ivangeli, ngilitjhumayela simahla, ngalokho angisebenzisi ilungelo lami ekulitjhumayeleni.

₁₉Ngitjho ngombana nanyana ngikhululekile begodu ngingasilikhoboka lomuntu, ngazenza ikhoboka labo boke ukuze ngizuze abanengi. ₂₀KumaJuda ngaba njengomJuda ukuze ngizuze amaJuda. Kilabo abangaphasi komthetho, ngaba njengongaphasi komthetho (nanyana mina ngokwami ngingasingaphasi komthetho) ukuze ngizuze labo abangaphasi komthetho. ₂₁Kilabo abanganamthetho, ngaba njengonganamthetho (nanyana ngingakatjhaphuluki emthethweni kaZimu, ngisemthethweni kaKrestu) ukuze ngizuze labo abanganamthetho. ₂₂Kilabo ababuthakathaka, ngaba buthakathaka ukuze ngizuze ababuthakathaka. Ngibe ngikho koke kibo boke abantu ukuze kuthi ngeendlela zoke ngisindise abathileko.

₂₃Koke lokhu ngikwenzela ivangeli ukuze nami ngibe nesabelo eembusisweni zalo. ₂₄Anazi bona emgijimweni boke abagijimi bayagijima, kodwana umvuzo munye na? Gijima ngendlela yokobana ufunyane umvuzo. ₂₅Boke abaphalisana emdlalweni bathoma ngokuzithabulula ngokuncamileko. Benza lokho ukuze bamukele isihlohlo esingekhe sabambelela; kodwana thina sikwenza kobana sizuze isihlohlo sesiphelani. ₂₆Yeke angigijimi njengomuntu ovathazelako; angilwi njengomuntu ofutha ummoya. ₂₇Awa, ngiyawukhandla umzimbami ngiwenze ikhoboka ukuze kuthi ngemva kobana ngitjhumayeze abanye, mina ngokwami ngingakhuthi ekwamukeleni umvuzo.