1 AMAKHOSI 11

₁Ngaphandle kwakaNaFaro, ikosi uSolomoni yabuye yathanda nabanye abafazi abanengi abatjhili, okubafazi abamaMowabi, ama-Amoni, ama-Edomu, amaTsidoni namaHite. ₂Bekungebezizwe uSomnini uZimu athi kuma-Israyeli ngazo: “Ningalingi nihlanganyele nazo ngombana zizakuyengela iinhliziyo zenu kibosingazimu bazo.”

Nanyana kunjalo uSolomoni wanamathela ebafazinabo ngethando.

₃Waba namakhulu alikhomba wabafazi ababelethwa ebukhosini kanye namakhulu amathathu wemingena. Abafazi bakhabo bamkhupha endleleni. ₄Kuthe uSolomoni lokha nathoma ukuluphala, abafazi bakhe bayengela ihliziywakhe kibosingazimu. Yeke ihliziywakhe azange inamathele ngokupheleleko kuSomnini uZimakhe njengekayise uDavida. ₅Walandela u-Atjhitaroti usingazinyanakazi wamaTsidoni noMilikomu usingazimu onyenyisako wama-Amoni.

₆Ngalokho uSolomoni wenza ubumbi phambi kwakaSomnini, azange alandele uSomnini ngokupheleleko njengombana kwenza uyise uDavida. ₇USolomoni wakhela uKemotjhi usingazimu onyenyisako wamaMowabi, noMoleki usingazimu onyenyisako wama-Amoni, indunduma phezu kombundu ongepumalanga yeJerusalema. ₈Wabenzela njalo boke abafazi bakhe abatjhili ebebatjhisa ipepho bebenzele nabosingazimu babo imihlabelo.

₉USomnini wathukuthelela uSolomoni ngombana ihliziywakhe yasele ifulathele uSomnini uZimu wakwa-Israyeli owaziveza kabili kuye. ₁₀USomnini naziveza kuSolomoni wamyala bonyana angadlhemadlhemi ngemva kwabosingazimu, kodwana azange awulalele umyalo kaSomnini. ₁₁Yeke uSomnini wathi kuSolomoni: “Ngebanga lesenzo sakho sokungaphethi isivumelwano sami kanye nemithethwami engakuyala ngayo, ngiqinisile ngithi ngizokurharhabula umbuso ngiwususe ezandleni zakho bese ngiwunikela omunye wabangaphasi kwakho. ₁₂Nokho ngebanga lakayihlo uDavida, angeze ngakwenza lokho ngesikhathi sokuphila kwakho. Ngizawurharhabula ngesikhathi sokubusa kwendodanakho. ₁₃Nalapho angizuwurharhabula woke ezandleni zayo, kodwana ngizayinikela ikoro yinye ngebanga lakaDavida incekwami nangebanga leJerusalema engayikhethako.”

₁₄USomnini wavusela uSolomoni umjamelani, uHadadi umEdomu ovela ebukhosini baka-Edomu. ₁₅Kwathi lokha uDavida naseduze ne-Edomu, uJowabi umphathibutho wenyuka bona ayokubulunga abahlongakalele e-Edomu. Ngemva kwalokho warhadla woke amadoda e-Edomu. ₁₆Kwabathatha iinyanga ezisithandathu bonyana uJowabi nawo woke ama-Israyeli abhubhise woke amadoda e-Edomu. ₁₇Kodwana uHadadi wabalekela eGibhide kanye neenkhulu ezinye ze-Edomu ebegade zisebenzela uyise. Ngesikhatheso ubasese msana. ₁₈Basuka eMidiyani baya eParana. Bathatha amadoda eParana bakhamba nawo eGibhide kuFaro ikosi yeGibhide owanikela uHadadi ikumba nenarha bewamondla nangokudla.

₁₉UFaro wathabela uHadadi kangangobana wabe wamendisela nomlamakhe, wekhabo lendlovukazi, umma wesizwe. ₂₀Umntazana wekhabo lendlovukazi wabelethela uHadadi umsana, wamthiya bona nguGenubathi. Indlovukazi yamkhulisela esigodlweni. Nje-ke uGenubathi wakhula nabentwana bakaFaro.

₂₁Kwathi uHadadi asese seGibhide, wezwa bonyana uDavida sele aye kiboyisemkhulu nokuthi uJowabi umphathibutho naye sele alele. Wathi kuFaro: “Bengithi yewungivumele ngibuyele enarhenekhethu.”

₂₂UFaro wabuza wathi: “Uzakuthi utlhogeni lapha bona ungaze ubuyele enarhenekhenu?”

UHadadi wathi: “Awa, abe angitlhogi litho, nokho bese ngithi ngivumela ngikhambe!”

₂₃Godu uZimu wavusela uSolomoni omunye umjamelani, uRezoni umsa ka-Eliyada, owabalekela isikhulu sakhe uHadadi-Ezeri ikosi yeTsoba. ₂₄Wabuthelela amadoda bona amsingathe bewaba mrholi wesiqhema semigulukudu. Lokha uDavida nalinga ukubarhayila, banqomba eDamaseku lapha bafika banzinza khona bebabeka uRezoni bona abe yikosi. ₂₅URezoni waba mjamelani waka-Israyeli ngesikhathi soke sokuphila kwakaSolomoni, wangezelela imiraro eyabangwa nguHadadi. URezoni wabusa e-Aramu begodu gade akghabhudlheka nabona u-Israyeli.

₂₆NoJerobhowamu umsa kaNebathi wajamelana noSolomoni. Gade angomunye weenkhulu zakaSolomoni, umEfrayimu weTsereda, unina gade amhlolokazi ekwakuthiwa nguTseruwa. ₂₇Nanti ibanga elamenza bonyana ajamelane nekosi: USolomoni gade akhe indunduma begodu wapara nesikhala ebegade sisebodeni loMuzi kaDavida uyise, ₂₈uJerobhowamu waziveza bonyana uyindoda emadodeni. Kwathi lokha uSolomoni nabona bonyana isokaneli liwenza kuhle kangangani umsebenzalo, walibeka bona liqale woke umsebenzi wokukatelela owenziwa yikoro kaJosefa.

₂₉Ngesikhatheso uJerobhowamu gade aphuma eJerusalema, wahlangana no-Arhiya umphorofidi weTjhilo endleleni embethe iphuraphura etja. Gade babobabili njalo kwaphela emmangwenapho, ₃₀u-Arhiya wathatha iphuraphura etja agade ayembethe leya wayirathurathula yaba ziinqetjhana ezilitjhumi nambili. ₃₁Wathi kuJerobhowamu: “Zithathele iinqetjhana ezilitjhumi ngombana lokhu ngokwatjhiwo nguSomnini uZimu ka-Israyeli wathi, ‘Qala, ngizokurharhabula umbuso ezandleni zakaSolomoni bese ngikupha iinkoro ezilitjhumi. ₃₂Kodwana yena uzakubusa ikoro eyodwa ngebanga lencekwami uDavida kanye nedorobho iJerusalema engalikhetha hlangana nazo zoke iinkoro zakwa-Israyeli. ₃₃Ngizakwenza lokhu ngombana uSolomoni ungihlanukile walotjha u-Atjhiterothi usingazimukazi wamaTsidoni, uKemotjhi usingazimu wamaMowabi noMilikomu usingazimu wama-Amoni. Azange akhambe eendleleni zami, enze okulungileko phambi kwami begodu aphethe imithethwami neemiso zami njengombana kwenza uDavida uyise. ₃₄Nokho angeze ngawuthatha woke umbuso ezandleni zakaSolomoni. Ngizamenza abe liduna amalanga woke wokuphila kwakhe ngebanga lakaDavida incekwami, engayikhethako neyaphetha imiyalo nemithethwami. ₃₅Ngizakuthatha umbuso ezandleni zendodanakhe bese ngikunikela iinkoro ezilitjhumi. ₃₆Ngizakunikela indodanakhe ikoro eyodwa ukuze uDavida incekwami ikghone ukuhlala inesibani phambi kwami eJerusalema, idorobho lapha ngakhetha ukubeka khona ibizo lami. ₃₇Wena-ke ngizakuthatha bese ubusa phezu kwakho koke okuthandwa yihliziywakho, uzakuba yikosi phezu kwaka-Israyeli. ₃₈Nawenza koke engikuyala ngakho bese ukhamba eendleleni zami, wenze okulungileko phambi kwami ngokuphetha imithetho nemiyalwami njengombana kwenza uDavida incekwami, ngizakuba nawe. Ngizakwakhela ubukhosi obuqine njengalobo engabakhela uDavida bese ngikunikela u-Israyeli. ₃₉Ngizakululaza iinzukulwana zakaDavida ngebangeli, nokho kube ngokwesikhatjhana.’ ”

₄₀USolomoni walinga ukubulala uJerobhowamu, kodwana uJerobhowamu wabalekela kuTjhitjhakhi ikosi yeGibhide, wahlala lapho uSolomoni bewakhothama.

₄₁Zoke ezinye zezehlakalo zakaSolomoni nakho koke akwenzako kanye nobuhlakani ayenabo kutlolwe encwadini yemilando kaSolomoni. ₄₂USolomoni wabusa woke u-Israyeli iminyaka ematjhumi amane eJerusalema. ₄₃Ngemva kwalokho waya kiboyisemkhulu, wafihlwa eMzini kayise uDavida. URerhobhowamu indodanakhe yathatha iintambo zobukhosi emva kwakhe.