UDavida no-Abigeyili
1USamyela wahlongakala, u-Israyeli woke wabuthana wazomlilela. Bambulunga ekhabo eRama.
UDavida wehlela erhalawumbeni leParani. 2EMawoni kwakunendoda enjinge khulu, inepahla godu eKarameli. Beyinekulungwana yeembuzi, neenkulungwana ezintathu zezimvu. Gade irhuna izimvu eKarameli. 3Ibizo layo bekunguNabhali, amKhalebi; ibizo lomkakhe lingu-Abigeyili. Umkakhe gade ahlakaniphile begodu amuhle, kodwana uNabhali gade anekani nehliziyo embi.
4Lokha uDavida aseserhalawumbeni, wezwa bona uNabhali urhuna izimvu. 5Wathuma amasokana alitjhumi wathi kiwo: “Khuphukelani eKarameli kuNabhali nifike nimtjele bona ngiyambingelela. 6Ngithi pilohle, pilode kuye nomndenakhe. Sengathi umsebenzakhe ungakhula udlondlobale. 7-8Nimtjele bonyana ngizwile bona urhuna izimvu. Nange angabuza iinsebenzi zakhe zizamtjela bona lokha abelusi bakhe nabahlanu kwethu eKarameli, akhange sibaphathe makghwakghwa. Soke isikhathi abasihlala nathi akunamvu neyodwa yabo eyalahlekako. Yeke, ngilindele bona abe nomusa kini njengombana kusikhathi seminyanya nje. Nithi: ‘Ngibawa bona ubaba aphe indodanakhe uDavida neensebenzi zayo nanyana yini ubaba angaba nayo.’ ”
9Lokha amasokana wakaDavida nafika kuNabhali, amnikela umlayezo wakaDavida njengombana unjalo. Alindela ipendulo-ke. 10UNabhali waphendula amasokana lawo wathi: “Ngubani yena uDavida wakhona loyo? Umsa kaJese loyo uyini nje khona? Uyazi amalanga la, sekukhamba kugcwele amakhoboka abaleka ebanikazini bawo! 11Nje nidlumbana bona ngizakuthatha isikwa sami namanzami nezimvu engizihlabele abarhuni bami ngiphe imiqhamuka nabosikhotheni?”
12Amasokana ajika khonapho abuyela emuva. Nafika kuDavida ambikela woke amezwi kaNabhali. 13UDavida wathi ebantwini bakhe: “Hlomani ngeensabula zenu!” Bahloma-ke ngeensabula zabo, noDavida naye ngeyakhe. Kwakhuphuka amadoda angaba makhulu amane noDavida, amakhulu amabili asala agade iimpahla.
14Esinye seensebenzi zakaNabhali satjela u-Abigeyili sathi: “UDavida uthumele iinthunywa erhalawumbeni bona zilotjhise unomzana, kodwana yena wazithela ngehlamba. 15Nokho abantwaba bebasilungele khulu thina. Akhange basiphathe kumbi begodu ngesikhathi soke ebegade sikanye nabo emmangweni hlanu kwabo, ayikho into ekhe yasilahlekela. 16Ngesikhathi soke siselusele izimvu zethu hlanu kwabo, gade baliboda elisizombileko ubusuku nemini. 17Nje-ke cabanga ubone bona ungenzani ngombana ihlekelele ilengele phezu konomzana nendlwakho yoke. Unomzana uhlaza kangangobana akakho umuntu ongakhuluma naye.”
18U-Abigeyili akhange asalinda ibhadi. Wathatha khonokho amakhulu amabili weempani zesikwa, imijeka emibili yewayini, izimvu ezihlanu eziphekiweko, isiqwebu sekoroyi ekhanzingiweko, ikhulu lamakhekhe wamakwapa wediribe namakhulu amabili wamakwapa wamakhiwani, walayitjha phezu kwabodumbana. 19U-Abigeyili wathi eencekwini zakhe: “Khambani phambi kwami, ngizanilandela.” Kodwana akhange atjele umyenakhe uNabhali.
20Wakhwela udumbana wehlela ngemrhobeni wentaba. UDavida nabantu bakhe bebeza nganeno. U-Abigeyili wavumbukela phezu kwabo. 21UDavida gade asacabanga asithi: “Akhange kusize ilitho ukugada kwami ifuyo yomrhali lo bona kungalahleki nayinye imvakhe emmangweni. Nje-ke ungithokoza ngothuvi. 22NgoZimu ngiqinisile ngithi akunandoda namkha umsana emzinakhe ozalibona lakusasa!”
23Kwathi lokha u-Abigeyili nabona uDavida, wehla masinyana kudumbanakhe waguqa wahloma ihloko phasi phambi kwakaDavida. 24Wawela eenyaweni zakhe wathi: “Kosami, ngimi onomlandu. Ngiyabawa bona uvumele incekukazakho ikhulume ekosinayo; ikosi ilalele lokho incekukazayo ekutjhoko. 25Sengathi ikosi ingeze yatjheja uNabhali isirithirithi sendodesiya. Unjengebizo lakhe, elithi Sidlhayela; naye udlhayele. Mina ncekukazakho, akhange ngibabone abantu ikosami ebegade ibathumile. 26NgoZimu nangokuphila kwakho ngiqinisile ngithi: NguZimu okuvimbe bona ungazenzeli ngokwakho ukuthulula iingazi. Sengathi izitha zekosami nabo boke abancamele ukuyilimaza bangaba njengoNabhali. 27Sengathi isiphesi incekukazakho esilethele ikosayo, singanikelwa abantu abalandela ikosami. 28Ngiyarabhela, ikosi ayithethelele iphoso yencekukazayo. Ngambala uZimu uzokwakhela ikosami indlu eqinileko ngebanga lokobana ikosami ilwe izipi zakaZimu. Ihlekelele asoze yakwehlela nawusaphilako, 29begodu nange kungabakhona okulandelela ngemuva afuna ukukubulala, uSomnini uZimakho uzakuvikela, njengomelusi nabulunga ilitje esikhwameni sembada. Kodwana ukuphila kwezitha zakho uzakukuvirimejela kude njengelitje lesarayi. 30Lokha uZimu nasele enzele ikosami koke okuhle akuthembisileko nokuyibeka ibe mbusi phezu kwaka-Israyeli, 31ikosami ayikazukuzizwela ehliziywenayo inomlandu wokubulala ngaphandle kwebanga nanyana ukuzibuyiselela. Kuzakuthi lokha uZimu naphumelelisa ikosami bese iyakhumbula incekukazayo.”
32UDavida wathi ku-Abigeyili: “Akadunyiswe uSomnini uZimu ka-Israyeli, okuthume bona namhlanjesi uzongihlangabeza. 33Sengathi ungabusiswa ngokuhlakanipha obenakho nokungenza bona namhlanje ngingazibuyiseleli ngokuthulula iingazi ngezandla zami. 34Ngathana akhange uze masinyana uzongihlangabeza, ngoZimu uSomnini wakwa-Israyeli ngiqinisile mncwi ngithi, akunandoda namkha umsana emzini kaNabhali obezalibona lakusasa.” 35UDavida wamukela esandleni sakhe agade amlethele khona wabe wathi kuye: “Iya ekhaya, ungasakhathazeki. Ngiwezwile amezwakho nesibawo sakho ngisamukele.”
36Lokha u-Abigeyili nafika kuNabhali, wamfunyana asendlini enze imbedla yomgidi. Gade athakase khulu begodu adakwe afile. Nokho u-Abigeyili akhange amtjele litho bekwasa ngomuso. 37Kwathi ngomuso ekuseni uNabhali sele aqaqulukile, umkakhe wamtjela zoke izintwezo. Wawa watsirimezeka. 38Emva kwamalanga angaba litjhumi uSomnini godu wabetha uNabhali bewafa. 39Kwathi bona uDavida ezwe ukuthi uNabhali uhlongakele wathi: “USomnini akadunyiswe, ngokungibuyiselela kuNabhali owangithukako. USomnini ungibulungile ekoneni, kodwana wabetha uNabhali ngeentonga zakhe.”
Emva kwalokho uDavida wathumela iinceku bona ziyomkhulumela ku-Abigeyili bonyana amngene. 40Iinceku zakaDavida zaya eKharameli, zafese zathi ku-Abigeyili: “UDavida usithume bona sizokuthatha uzokuba mkakhe.” 41U-Abigeyili waguqa wahloma ihloko phasi wathi: “Incekukazenu nasi njengekhoboka, ilungele ukuhlanza iinyawo zeenceku zekosayo.” 42U-Abigeyili wasikima masinyana wakhwela udumbana aphekelelwa lidwendwe labafazi abahlanu. Wakhamba neenceku zakaDavida, waba mkakhe.
43UDavida wathatha no-Arhinowami weJizriyela, bobabili baba bomkakhe. 44Kodwana uSawula gade sele athethe indodakazakhe uMikali umkaDavida, wamendisela kuPhalithi umsa kaLayitjhi, ogade abuya eGalima.
