1 KWEBETHESALONIKA 5

₁Bazalwana, mayelana neenkhathi namalanga anidingi ukutlolelwa ilitho ₂ngombana nina nazi kuhle bona ilanga leKosi lizakufika njengesela ebusuku. ₃Lokha nabathi: “Kunokuthula nokuphepha,” khonapho-ke bazakwehlelwa kurhayila msinyana, kube njengemirhelo eyehlela umfazi osidisi, yeke angeze kwabakhona ukuphunyurha. ₄Kodwana nina bazalwana, anikho ebumnyameni kobana ilangelo linganithelekela njengesela. ₅Nina noke nje nibantwana bokukhanya nabantwana bemini; asisibo bebusuku namkha bobumnyama. ₆Ngalokho-ke asingalali njengombana kwenza abanye, kodwana asihlaleni siphapheme begodu siqaqulukile ₇ngombana labo abalalako balala ebusuku nabadakwako badakwa ebusuku. ₈Kodwana njengombana thina singebemini nje, asiqaqulukeni, sembathe isivikelasifuba sokukholwa nethando, isikoporo sethu kube lithemba nesindiso. ₉UZimu akakasibekeli itukuthelo kodwana usibekele ukufunyana isindiso ngeKosethu uJesu Krestu, ₁₀owasifelako ukuze kuthi nanyana siphapheme namkha silele, siphile kuye. ₁₁Nje-ke khuthazanani omunye nomunye bese niyakhana njengombana nivele nisenza.

₁₂Siyanincenga bazalwana bona nibahloniphe labo abasebenza hlangana nani, abaniphetheko eKosini nabanelulekako. ₁₃Baphatheni ngethando elikhulu ngebanga lomsebenzabo. Hlalisanani ngokuthula.

₁₄Godu siyaniyala bazalwana bona nikhalime ababhereleleko, nikhuthaze abaneenhliziyo ezibuthakathaka, nisize ababogabogako, yibani nesineke ngabo boke. ₁₅Qinisekisani bonyana kungabikho phakathi kwenu obuyisela ubumbi ngobumbi, kodwana hlalani njalo nirhuluphela ukwenza okuhle omunye komunye nakibo boke abantu.

₁₆Thokozani ngeenkhathi zoke. ₁₇Thandazani njalo ningalisi. ₁₈Thokozani kibo boke ubujamo ngombana lokho kuyintando kaZimu kuKrestu Jesu ngani.

₁₉Ningamcimi uMoya. ₂₀Ningawanyazi amezwi womphorofidi ₂₁kodwana hlolisisani koke, nibambelele kokulungileko. ₂₂Tjhidani kinanyana ngiwuphi umhlobo wobumbi.

₂₃Sengathi uZimu wokuthula ngokwakhe anganicwengisa ngokupheleleko, ummoya wenu, umkhumbulo kanye nomzimba wenu ulondeke begodu ube msulwa ekubuyeni kweKosethu uJesu Krestu. ₂₄Yena onibizako uthembekile begodu uzakwenza lokho.

₂₅Bazalwana abathandekako, sithandazelani.

₂₆Lotjhisani boke abazalwana ngokuncwangana okucwengileko.

₂₇Nginiyala ngesifungo phambi kweKosi bona incwadi le ifundwe kibo boke abazalwana.

₂₈Sengathi umusa weKosethu uJesu Krestu ungaba nani noke.