2 IINKRONIKE 14

Inarha yaba nokuthula iminyaka elitjhumi yoke ekubuseni kwaka-Asa. ₂U-Asa wenza okuhle nokulungileko phambi kwakaSomnini uZimakhe. ₃Wasusa ama-aldari atjhili kanye neendunduma, waphahlaza amatje akhethekileko bewagawula nemifanekiso yabo-Atjhera. ₄Wayala abantu bakwaJuda bonyana bafune uSomnini uZimu waboyisemkhulu begodu balalele umthetho nomyalwakhe. ₅Wasusa iindunduma nama-aldari wetjhwalo kiwo woke amadorobho wakwaJuda.

Kwaba nokuthula embusweni ophethwe nguye. ₆Njengombana inarha beyinokuthula, kunganamuntu omlwisako ngesikhatheso, ngalokho u-Asa waphumelela ukwakha amadorobho anemithangala kwaJuda. NguSomnini owamupha ukuthulokho. ₇U-Asa gade athe kuJuda: “Asakhe imizi le bese siyibiya ngemithangala eneenthala zabalindi, amasango kanye neenqabo. Inarha le isese ngeyethu ngombana sifune uSomnini uZimethu. Iye, samfuna bewasipha nokuthula mahlangothi woke.” Yeke bakha, baphumelela.

₈U-Asa gade anebutho lamadoda aziinkulungwana ezimakhulu amathathu abuya kwaJuda. Gade ahlome ngamagebhegebhe weenhlangu kanye nemikhonto. Amadoda aziinkulungwana ezimakhulu amabili namatjhumi abunane abuya kwaBhenjamini, ahlome ngamakhande nemisubi. Woke amadoda lawo bekuziingorho.

₉UZerarhi umKutjhe waphuma walwa nawo akhamba nebutho leenkulungwana ngeenkulungwana neenkarana ezimakhulu amathathu, bewayokufika eMaretjha. ₁₀U-Asa waphuma wamhlangabeza. Bahlela ipi emrhobeni weTsefata eMaretjha.

₁₁Yeke u-Asa wabiza uSomnini uZimakhe wathi: “Somnini, akakho onjengawe ongasiza obogabogako ezandleni zetsitsirimba. Nje-ke Somnini Zimethu, sisize ngombana sithembele kuwe. Sijamelene nesinyokotho sebuthweli ngokuthemba ibizo lakho. Maye Somnini! Kazi wena unguZimethu, ungavumeli bonyana umuntukazana adlondlobale ngaphezu kwakho.”

₁₂USomnini uZimu wamadlha amaKutjhe phasi phambi kwaka-Asa noJuda. AmaKutjhe abaleka, ₁₃u-Asa nebutho lakhe bawakhweza umbundu bekwaba seGerari. AmaKutjhe amanengi arabhalala, ngokubhujiswa nguSomnini uZimu nebutho lakhe. Abantu bakwaJuda bazithathela ipango enengi. ₁₄Bahlula yoke imizi emagegana neGerari ngombana yehlelwa kukwesaba uSomnini. Baphanga yoke imizi leyo ngombana kwakunepahla enengi tle lapho. ₁₅Godu basahlela namatende wabafuyi, bathatha imihlambi yezimvu, iimbuzi namakamela. Babuyela eJerusalema.