U-Azariya ubusa kwaJuda
1Ngomnyaka wamatjhumi amabili nalikhomba wekosi uJerobhowamu ikosi yakwa-Israyeli, u-Azariya umsa ka-Amatsiya ikosi yakwaJuda wathoma ukubusa. 2Gade aneminyaka elitjhumi nathandathu lokha nakathoma ukubusa. Wabusa eJerusalema iminyaka ematjhumi amahlanu nambili. Ibizo lakanina gade kunguJekholiya, weJerusalema.
3Wenza okulungileko phambi kwakaSomnini njengombana kwenza uyise u-Amatsiya. 4Nokho iindunduma akhange zisuswe; abantu baragela phambili ngokwenza imihlabelo nokutjhisa itjhwalo lapho.
5UZimu wabetha u-Azariya ngekhwekhwe bekwaba lilanga ahlongakala ngalo. Wajanyiswa ekwenzeni imisebenzakhe yangamalanga. UJotamu indodanakhe watlhogomela isigodlo bewabusa nesizwe.
6Ezinye izehlakalo zokubusa kwaka-Azariya nakho koke akwenzileko, kutlolwe encwadini yemilando yamakhosi wakwaJuda. 7U-Azariya wahlongakala wabekwa kiboyisemkhulu eMzini kaDavida. UJotamu indodanakhe waba yikosi esikhundleni sakhe.
UZakariya ubusa kwa-Israyeli
8Ngomnyaka wamatjhumi amathathu nabunane wekosi u-Azariya ikosi yakwaJuda, uZakariya umsa kaJerobhowamu waba yikosi eSamariya. Wabusa iinyanga ezithandathu.
9Wenza ubumbi phambi kwakaSomnini njengombana kwenza aboyisemkhulu. Akhange aphambuke ezonweni zakaJerobhowamu umsa kaNebathi abangela ngazo bonyana u-Israyeli one.
10UTjhalumu umsa kaJabetjhi wakhela uZakariya ubukhwebetjhana. Wamsahlela phambi kwabantu, wambulala bewangena esikhundleni sakhe waba yikosi.
11Ezinye izehlakalo zokubusa kwakaZakariya zitlolwe encwadini yemilando yamakhosi wakwa-Israyeli. 12Nje-ke kwazaliseka ilizwi uSomnini alikhuluma kuJehu, elithi: “Iinzukulwana zakho zizakuhlala esihlalweni sobukhosi bakwa-Israyeli bekube sesizukulwaneni sesine.”
UTjhalumu ubusa kwa-Israyeli
13UTjhalumu umsa kaJabetjhi waba yikosi ngomnyaka wamatjhumi amathathu nathoba wekosi u-Uziya ikosi yakwaJuda. Wabusa eSamariya inyanga yinye. 14UMenarhemu umsa kaGadi wasuka eTiritsa wakhuphukela eSamariya. Wasahlela uTjhalumu umsa kaJabetjhi eSamariya, wambulala bewangena esikhundleni sakhe waba yikosi.
15Ezinye izehlakalo zokubusa kwakaTjhalumu nobukhwebetjhana abenzako, kutlolwe encwadini yemilando yamakhosi wakwa-Israyeli.
16Ngesikhatheso uMenarhemu wasahlela iThifisarhi, naye woke umuntu ogade alapho namabhoduluko walo ukusuka eTiritsa ngombana bala ukumvulela amasango. Wabhuruza iThifisarhi; wakghakghamula izisu zabo boke abafazi abazithweleko.
UMenarhemu ubusa kwa-Israyeli
17Kwathi ngomnyaka wamatjhumi amathathu nathoba ka-Azariya ikosi yakwaJuda, uMenarhemu umsa kaGadi waba yikosi yakwa-Israyeli. Wabusa eSamariya iminyaka elitjhumi. 18Wenza ubumbi phambi kwakaSomnini. Esikhathini soke sokubusa kwakhe akhange aphambuke ezonweni zakaJerobhowamu umsa kaNebathi, abangela ngazo bonyana u-Israyeli one.
19Nje-ke uPhuli ikosi ye-Asiriya wasahlela inarha. UMenarhemu wamnikela isiliva elimakhilogremu aziinkulungwana ezimatjhumi amathathu nane azincengela bona amsekele ukuze anzinze ebukhosini bakhe. 20UMenarhemu gade akhuphisa bakwa-Israyeli imali leyo ngekani, okutjho boke abanesabo. Omunye nomunye wabo bekufuze anikele isiliva engaphezu kwesiquntu sekhilogremu ukuze kunikelwe ikosi ye-Asiriya. Yeke ikosi ye-Asiriya yamlisa uMenarhemu, yaphuma enarheni.
21Ezinye izehlakalo zokubusa kwakaMenarhemu nakho koke akwenzileko, kutlolwe encwadini yemilando yamakhosi wakwa-Israyeli. 22UMenarhemu wahlongakala, uPhekarhiya indodanakhe waba yikosi esikhundleni sakhe.
UPhekarhiya ubusa kwa-Israyeli
23Ngomnyaka wetjhumi nahlanu ka-Azariya ikosi yakwaJuda, uPhekharhiya umsa kaMenarhemu waba yikosi eSamariya. Wabusa iminyaka emibili. 24Wenza ubumbi phambi kwakaSomnini. Akhange aphambuke ezonweni zakaJerobhowamu umsa kaNebathi abangela ngazo bonyana u-Israyeli one.
25UPhekharhi umsa kaRemaliya, oyinduna esisandla sakhe, wamakhela ubukhwebetjhana. Wakhamba namadoda amatjhumi amahlanu weGiliyadi, wambulalela eSamariya ebuphephelweni besigodlo obungaphakathi kanye no-Arigobho no-Ariye. UPhekharhi wabulala uPhekarhiya njalo-ke, bewaba yikosi esikhundleni sakhe.
26Ezinye izehlakalo zokubusa kwakaPhekarhiya nakho koke akwenzileko, kutlolwe encwadini yemilando yamakhosi wakwa-Israyeli.
UPhekharhi ubusa kwa-Israyeli
27Ngomnyaka wamatjhumi amahlanu nambili ka-Azariya ikosi yakwaJuda, uPhekharhi umsa kaRemaliya waba yikosi yakwa-Israyeli eSamariya. Wabusa iminyaka ematjhumi amabili. 28Wenza ubumbi phambi kwakaSomnini. Akhange aphambuke ezonweni zakaJerobhowamu umsa kaNebathi abangela ngazo bonyana u-Israyeli one.
29Ngesikhathi sakaPhekharhi ikosi yakwa-Israyeli, uTigilathi-Pileseri ikosi ye-Asiriya wafika wathumba i-Iyoni, i-Abeli-Bhethe-Makha, iJanowarhi, iKhedetjhi kanye neRhatsori. Wathumba iGiliyadi kanye neGalile, ngitjho nalo loke lakwaNafitali. Wathumba abantu wabathumela ekudingisweni e-Asiriya.
30UHosiya umsa ka-Ela, wakhela uPhekharhi umsa kaRemaliya ubukhwebetjhana. Wamsahlela wambulala bewaba yikosi esikhundleni sakhe ngomnyaka wamatjhumi amabili kaJotamu umsa ka-Uziya.
31Ezinye izehlakalo zokubusa kwakaPhekharhi nakho koke akwenzileko, kutlolwe encwadini yemilando yamakhosi wakwa-Israyeli.
UJotamu ubusa kwaJuda
32Kwathi ngomnyaka wesibili kaPhekharhi umsa kaRemaliya ikosi yakwa-Israyeli, uJotamu umsa ka-Uziya ikosi yakwaJuda wathoma ukubusa. 33Gade aneminyaka ematjhumi amabili nahlanu lokha nakathoma ukubusa. Wabusa eJerusalema iminyaka elitjhumi nathandathu. Ibizo lakanina bekunguJerutjha indodakazi kaTsadokhi.
34Wenza okulungileko phambi kwakaSomnini njengombana kwenza uyise u-Uziya. 35Nokho iindunduma akhange zisuswe; abantu baragela phambili ngokwenza imihlabelo nokutjhisa itjhwalo lapho. UJotamu wavuselela isango lethempeli lakaSomnini elisekuphakameni.
36Ezinye izehlakalo zokubusa kwakaJotamu nalokho akwenzileko, kutlolwe encwadini yemilando yamakhosi wakwaJuda. 37Ngesikhathi sakhe uZimu wathoma ukuthumela uRetsini ikosi ye-Aramu noPhekharhi umsa kaRemaliya bona bajamelane noJuda.
38UJotamu wahlongakala wabekwa kiboyisemkhulu eMzini kaDavida. U-Arhazi indodanakhe waba yikosi esikhundleni sakhe.
