2 UPITROSI 3

₁Bathandekako, le sele kuyincwadi yesibili enginitlolele yona. Kizo zombili ngilingile ukuvusa imicabango yenu ehluzekileko ngokunikhumbuza; ₂iye, kobana nikhumbule amezwi akhulunywe baphorofidi abacwengileko nemiyalo yeKosi noMsindisi ngabapostoli benu. ₃Kokuthoma kufuze nizwisise lokhu bonyana emalangeni wokuphela kuzakufika abanyefuli banyefule balandele iinkanuko zabo zokonakala ₄basithi: “Siphi isithembiso sokuza kwakhe ngombana soloko kwalala abobaba, zoke izinto ziraga njengombana bezinjalo kusukela ekuthomeni kwendalo.” ₅Yeke bathanda ukukhohlwa lokhu bona kwekadeni amazulu bekavele akhona ngelizwi lakaZimu, nokobana iphasi ladaleka emanzini begodu ngamanzi lanzinza; ₆okwathi ngawo amanzi, ilizwe ebelikhona labhubha ngokurhurhulwa. ₇Kodwana ngelizwelo izulu nephasi okukhona gadesi kubekelwe umlilo, kulondiwe bekube lilanga lokugwetjwa nelokubhujiswa kwabangamesabiko uZimu.

₈Yeke-ke bathandekako, ningalibali bona kuSomnini ilanga elilodwa lifana nekulungwana yinye yeminyaka, neminyaka eyikulungwana ifana nelanga elilodwa. ₉USomnini akasibuthaka ngesithembiso sakhe njengombana abanye bacabanga. Kunalokho uyaninyamezelela, akathandi bonyana kubhubhe namunye, kodwana kobana boke baphenduke.

₁₀Kodwana ilanga lakaSomnini lizakufika njengesela, nje-ke amazulu azakudlula ngokukhulu ukuhlokoma, koke kuzakupheliswa ngomlilo, iphasi nemisebenzi ekilo kuzakutjhiswa. ₁₁Njengombana zoke izintwezi zizakupheliswa, alo-ke kufanele nibe babantu abanjani epilweni yokucwenga nekumesabeni uZimu na? ₁₂Iye, ekulindeleni nekurhabeleni ukufika kwelanga lakaZimu ngombana amazulu azakuthungelwa ngomlilo apheliswe nakho koke kuzakuncibilikiswa ngomlilo! ₁₃Kodwana ukuya ngokwesithembiso sakhe, silindele amazulu amatjha nephasi elitjha, lapho kuyokuba khona ukulunga.

₁₄Ngalokho-ke bathandekako, njengombana nilindele lokhu, tjhisekelelani bona nifunyanwe nguye ninokuthula begodu ninganabala namkha umphambo, ₁₅nizibalele ukunyamezela kwakaSomnini njengesindiso. Kube njengombana nomzalwana wethu othandekako uPowula anitlolelako ukuya ngokuhlakanipha akuphiweko, ₁₆nakakhuluma ngalokhu eencwadini zakhe zoke. Kukhona ezinye zezinto ezibukhuni ukuzizwisisa, okuzizinto abanganalemuko nabangakaqini bazihlanakezelela ukubhujiswa kwabo, njengombana benza nakezinye iincwadi zemitlolo.

₁₇Ngalokho nina bathandekako, njengombana senikwazi lokhu, yelelani, nakungasinjalo ningahle nithatheke ngemitjhapho yabantu abangenamthetho beze niwe ekuqineni kwenu. ₁₈Kodwana khulani emseni nelwazini leKosethu noMsindisi uJesu Krestu.

Idumo alibe kuye gadesi bekube ngokungapheliko. Amen.