USomnini uhlunguphaza uDavida
1USomnini wathuma uNathani kuDavida. Lokha nafika kuye wathi: “Emzini othileko gade kukhona amadoda amabili, enye beyinjingile enye ichakile. 2Enjingileko leyo beyinomhlambi omkhulu wezimvu neenkomo, 3kodwana echakileko beyinganalitho ngaphandle kwemvanakazi egade iyithengile. Yazikhulisela yona idla esandleni sayo nabantwabayo. Gade incunguluzelana nayo koke ekudlako; isela ekaphenayo begodu iyisingatha; sele ifana nendodakazi kiyo.
4“Kwathi ngelinye ilanga enjingileko yafikelwa sikhambi. Injinga le akhange ithande ukuthatha enye yezimvu namkha yeenkomo zayo bona ilungiselele isikhambi ebesifike kwayo. Esikhundleni salokho yathatha imvanakazi yendoda echakileko yalungisela isikhambi sayo.” 5UDavida wasilingeka wabila ngesenzo sendoda leyo bewathi kuNathani: “NgoZimu ngiqinisile ngithi, umuntu owenze lokho ufanelwe kukufa! 6Kufuze akhokhele imvanakazi leyo sekubuyelelwe kane ngombana wenze into embi begodu akhange abe nezwelo.”
7Nje-ke uNathani wathi kuDavida: “Umuntu loyo nguwe! Nakhu uSomnini uZimu ka-Israyeli akutjhwileko, ‘Ngimi engakubeka waba yikosi yakwa-Israyeli begodu ngimi engakusindisa esandleni sakaSawula. 8Ngakunikela koke okusendlini yekosakho; namakhohlo wekosakho bona uwayame. Ngakupha indlu yakwa-Israyeli neyakwaJuda. Nakube koke lokho bekukuncancani khulu kuwe, bengingakunikela okhunye ngaphezulu. 9Ulinyazeleni ilizwi lakaSomnini ngokwenza okumbi kangaka emehlwenakhe na? Ubulele u-Uriya umHite ngesabula bewathatha umkakhe bona abe ngewakho. Umbulele ngabomu ngesabula yabakwa-Amoni. 10Yeke isabula ayisobe isasuka endlinakho ngombana unyaze mina ngokuthatha umka-Uriya umHite wamenza wakho.’
11“Mina Somnini ngithi kuwe, ‘Uzasuyihlole, kuzokuvela amanikelela endlinakho. Ngizokuthatha abomkakho phambi kwamehlwakho ngibanikele otjhidelene nawe; yena alale nabo emtarini. 12Wena wenze lokhu emsitheleni, kodwana mina ngizokwenza lokhu emini kukhanya phambi kwaka-Israyeli woke.’ ”
13UDavida wathi kuNathani: “Ngonile kuSomninini.” UNathani wathi: “USomnini usihlangulile isigwebo sakho sokufa. 14Kodwana njengombana ngokwenza lokhu uhlome uSomnini ngomuno ngelihlweni, ayizukuphila indodana obelethelwe yona.”
15Kwathi bona uNathani abuyele kwakhe, uSomnini wabetha umntwana ogade abelethelwe uDavida ngumka-Uriya ngokugula, wagula khulu. 16UDavida wancengela umntwana lo kuZimu. Wangena ngendlini walala phasi amalangana azile ukudla. 17Abaphathi bendlwakhe bamrabhela bona avuke, kodwana walikhomba libaba. Akhange adle nanyana yini nabo. 18Ngelanga lekhomba umntwana wahlongakala. Iinsebenzi zakaDavida bezesaba ukumtjela bona umntwana selahlongakele ngombana bezicabanga zithi: “Lokha umntwana nasaphilako, samrabhela uDavida kodwana akhange asilalele. Alo, singamtjela njani bona umntwana selahlongakele? Angahle azilimaze.”
19UDavida wabona iinsebenzi zakhe zihlebahleba zizodwa, walemuka-ke bona umntwana akasekho. Wabuza wathi: “Uhlongakele umntwana na?” Zavuma zathi: “Iye, uhlongakele.” 20Nje-ke uDavida wasikima phasi. Kuthe bona aqede ukuhlamba, wazela bewembatha nezambatho ezinye, wakhamba waya endlini kaSomnini wadumisa. Emuva kwalokho wabuyela endlinakhe wabawa ukudla bamnikela wadla.
21Iinsebenzi zakhe zambuza zathi: “Kubayini ikosi yenze nje? Lokha umntwana nasaphilako ikosi yazila ukudla yalila, kodwana nje, njengombana umntwana selahlongakele ikosi iyasikima iyadla?” 22UDavida waphendula wathi: “Iye, lokha umntwana nasaphilako, ngazila ngalila ngombana ngangicabanga ngithi, ‘Ngubani owaziko? Mhlamunye uSomnini angaba nomusa kimi, avumele umntwana aphile.’ 23Alo, njengombana selahlongakele nje, ngizakuzilelani? Ngingambuyisa na? Awa, mina ngizakuya kuye kodwana yena angekhe asabuyela kimi.”
24UDavida watjhiriya uBhathi-Tjheba umkakhe. Ngemva kwesikhathi walala naye, wabeletha indodana; bayithiya bona nguSolomoni. USomnini wamthanda. 25Njengombana uSomnini amthandile nje, wathumela ilizwi ngomphorofidi uNathani bona amthiye ibizo lakaJedidiya.
UDavida uthumba iRabha
26Ngesikhatheso uJowabi gade asalwa neRabha yama-Amoni bewaminyezela isigodlo sedorobho. 27UJowabi wathumela iinthunywa kuDavida wathi: “Ngilwile neRabha, ngaphezu kwalokho ngithethe nendawo lapha bakha khona amanzi. 28Nje-ke hlanganisa inengi lamabutho uragelele idorobho, ulithumbe. Nakungasinjalo ngizakuthumba idorobhelo bengidume ngalo.”
29UDavida wahlanganisa loke ibutho bewaya eRabha, walisahlela bewalithumba. 30Wethula isihlohlo ebegade sisehloko yakasingazimu uMilikomu. Ubudisi baso bebuligolide elimakhilogremu amatjhumi amathathu nane begodu ngaphakathi kwaso bekunelitje eliligugu; sathweswa uDavida. Wathatha ipango enengi yedorobhelo.
31Wakatelela abantu bedorobhelo bona bamsebenzele: abanye wabasebenzisa ngeensarha, ngamapeke wesimbi nangamazembe; abanye wabenzisa iintina. Wenza koke lokho kiwo woke amadorobho wabakwa-Amoni. UDavida nebutho lakhe loke babuyela eJerusalema.
