2 UTHIMOTHI 4

₁Ngiyakuyala ngiqinisile phambi kwakaZimu noKrestu Jesu ozakugweba abaphilako nabafileko nangokuvela kokubonakala kwakhe nombuso wakhe, ngithi: ₂Tjhumayela ilizwi, ulungele ukulizwakalisa kusikhathi esifaneleko nanyana kungasiso: Sola, ukhalimele, ukhuthaze ngokubafundisa ngesineke esikhulu ₃ngombana siyeza isikhathi lapho abantu bangeze bakhambisana khona nefundiso ephilileko. Kunalokho bazozibuthelelela abafundisi kobana banelise ubuzikazikani beendlebe zabo. ₄Bazokufulathela iqiniso badlhemadlheme ngemva kweenolwana. ₅Kodwana wena zigobe ezintweni zoke, unyamazele ebunzimeni, wenze umsebenzi womvangeli, uphelelisele ukusebenza kwakho.

₆Mina-ke sengilungele ukuphalaka njengomhlabelo; isikhathi sami sokugoduka sesifikile. ₇Ngilwile ukulwa okuhle, ngiliqedile ibanga lami, ngilondile ukukholwa. ₈Kwanje sengibekelwe isihlohlo sokulunga iKosi emgwebi olungileko ezanginikela sona mhlokho; kungasingimi kwaphela kodwana nabo boke abalangazelela ukubonakala kwayo.

₉Yenza msinyana uze lapha uzongibona ₁₀ngombana uDemasi ngokuthanda zephasi lanamhlanje, ungitjhiyile waya eThesalonika; uKresikesi uye eGalatiya, uTitosi eDalimathiya. ₁₁NguLukasi kwaphela engihlezi naye. Uthathe uMarkosi uze naye lapha ngombana ulisizo emsebenzinami. ₁₂UThirhikhu ngimthume e-Efesu. ₁₃Nawuzako, ungiphathele isambatho sami engasitjhiya kuKaripo eTrowasi. Yewungiphathele neencwadi zami, khulukhulu imisongo.

₁₄Kambe u-Alekzandra, umkhandi wedzila wangenzela phasi; iKosi iyombuyisela ngemisebenzakhe. ₁₅Umlemuke nawe ngombana wajamelana khulu namezwi wethu.

₁₆Akakho noyedwa owangisekelako mhlana ngiziphendulela kokuthoma ekundleni, kodwana boke bangisukela; kwanga lokho angeze kwabalelwa kibo. ₁₇Kodwana iKosi yaba nami yangipha amandla ukuze kumenyezelwe ngami umlayezo ngokupheleleko nabatjhili boke bawuzwe. Ngalokho ngephulwa emlonyeni webhubezi. ₁₈IKosi iyongihlenga ingikhuphe kikho koke okumbi, ingise embuswenayo wezulwini ngiphephile. Akube kiyo iphazimulo ngokungapheliko. Amen.

₁₉Ungilotjhisele kuPriska no-Akhwila kanye nendlu ka-Onesiforu. ₂₀U-Erastu wasala eKorinte, uTrofimu yena ngamtjhiya agula eMiletu. ₂₁Yeke phuthuma uze lapha ubusika bungakangeni!

Bayakulotjhisa abo-Ebhulu noPudesi, uLinusi, uKlawudiya nabo boke abazalwana.

₂₂IKosi ayibe nommoyakho.