Umbiko kaPitrosi ebandleni
1Abapostoli nabazalwana kilo loke iJudiya bezwa bona nabatjhili sebamukele ilizwi lakaZimu. 2Nje-ke kwathi bona uPitrosi aye eJerusalema, labo ebegade bafuna ukusoka abatjhili bamsola, 3bathi: “Wena uye emzini wabatjhili abangakasoki, wagoma nabo!”
4UPitrosi wathoma ukubahlathululela koke njengombana kwenzekile, wathi: 5“Bengithandaza, ngisedorobheni leJopa, khonapho ngehlelwa siyezi ngabona umbono. Ngabona into efana netjhila isehliselwa phasi ngeentsutsungu zayo ezine ivela ezulwini; yehlela lapha ngikhona. 6Ngaqalisisa ngaphakathi kwayo, ngabona iinlwana zephasi ezineenyawo ezine, iimbandana, iimphili ezikhakhabako neenyoni zomkayi. 7Ngezwa ilizwi lithi kimi, ‘Pitrosi, vuka, uhlabe, ugome!’ 8Kodwana ngaphendula ngathi, ‘Awa Kosi, akunalitho elisilapheleko namkha elingakahlambuluki elakhe langena ngemlonyenami.’ 9Ilizwi elivela ezulwini lakhuluma kwesibili lathi, ‘Lokho uZimu akuhlambululileko, ungakubizi bona kungokusilapheleko.’ 10Lokho kwenzeka amahlandla amathathu, nje-ke koke kwabuyiselwa ezulwini godu. 11Khonokho amadoda amathathu agade avela eKhesariya athunywe kimi, afikela ngendlini ebengihlala kiyo. 12UMoya oCwengileko wangitjela bona ngikhambe nawo ngaphandle kokuzaza. Abazalwana abasithandathu laba bakhamba nami nje-ke soke sangena ngendlini yendoda leyo. 13Yona yasitjela bona yabona njani ingilozi egade ijame endlinayo isithi, ‘Thumela umuntu eJopa ayokubiza uSimoni okuthiwa nguPitrosi. 14Uzokulethela umlayezo ozakusindisa wena nomndenakho woke.’ 15Kwathi ngisathoma ukukhuluma, uMoya oCwengileko wehlela phezu kwabo, njengombana wehlela phezu kwethu ekuthomeni. 16Alo-ke ngakhumbula lokho iKosi eyakutjhoko nayithi, ‘UJwanisi wabhabhadisa ngamanzi, kodwana nina nizakubhajadiswa ngoMoya oCwengileko.’ 17Nje-ke, nakube uZimu wabapha isipho njengombana apha thina esakholwa kuJesu Krestu; alo-ke, bengingubani mina bona bengingaliya uZimu?”
18Kwathi bona bezwe lokho, balisa ukusola, badumisa uZimu basithi: “Yeke uZimu selabaphile abatjhili ithuba lokutjhugulukela ekuphileni!”
Ibandla e-Anthiyorhiya
19Labo abahlakazeka ngebanga lokuhlutjhwa okwathoma ngemva kokufa kwakaStefani, bafika ngitjho eFunisiya, eSayipurasi ne-Anthiyorhiya, barhatjha umlayezo emaJudeni kwaphela. 20Kodwana phakathi kwawo bekumadoda avela eSayipurasi neSirene, wona aya e-Anthiyorhiya ayokhuluma ilizwi nemaGirigini awatjela ivangeli ngeKosi uJesu. 21Amandla weKosi gade anamadoda lawo nenani elikhulu labantu lakholwa latjhugulukela eKosini.
22Iindaba ngalokho zafika eendlebeni zebandla eJerusalema, yeke bathumela uBharinabhasi e-Anthiyorhiya. 23Kwathi lokha nakafikako abona umusa kaZimu, wathaba kwamambala bewabakhuthaza boke bonyana bathembeke eKosini ngokudzimelela ngeenhliziyo zabo zoke. 24Bekuyindoda elungileko, izele uMoya oCwengileko nokukholwa; abantu abanengi bazinikela eKosini.
25Yeke uBharinabhasi waya eTarsusi ukuyokufuna uSawula. 26Kwathi bona amfunyane, wamusa e-Anthiyorhiya. Nje-ke umnyaka woke bahlanganyela nebandla bafundisa abantu abanengi. Kwaba se-Anthiyorhiya lapha abafundi babizwa khona kokuthoma bona maKrestu.
27Ngesikhatheso kwehla abanye babaphorofidi basuka eJerusalema baya e-Anthiyorhiya. 28Omunye wabo okuthiwa ngu-Agabhusi, wasikima wathukula ngoMoya oCwengileko bona kuzakuba khona indlala ekulu kilo loke iphasi. Kwamambala yaba khona ngesikhathi sokubusa kombusi omkhulu uKlawudiyusi. 29Abafundi omunye nomunye ngokukghona kwakhe waqunta ukusiza abazalwana abahlala eJudiya. 30Lokho bakwenza ngokuthumela izipho zabo ebaphathini ngoBharinabhasi noSawula.
