1Ngalokho khathalelani uSomnini uZimenu, nigcine iimfanelo zakhe, okutjho iimiso zakhe, imithethwakhe, kanye nemiyalwakhe ngaso soke isikhathi. 2Yazini-ke namhlanje bona abantwabenu abazi begodu azange babone ukukhalima kwakaSomnini uZimenu, kodwana nina niyabazi ubukhulu bakhe, isandla sakhe esinamandla kanye nesiphanga sakhe. 3Iye, niyawazi amatshwayo kanye nezenzo zakhe azenza ekabeni yeGibhide kuFaro ikosi yakhona nenarhenakhe yoke; 4nalokho akwenza ebuthweni leGibhide, eenjomaneni neenkaraneni zalo lokha nagubuzesa ibuthwelo ngamanzi welwandle lomGaba nalinigijimisako nangendlela uSomnini alibhubhisa nya ngayo njengombana nazi namhlanje. 5Niyakwazi okwenziwa nguSomnini kini naniserhalawumbeni kufikela lapha nifika khona endaweni le, 6nokobana yenzani kuDatani no-Abiramu amadodana ka-Eliyabu umsa kaRubeni lokha iphasi livula umlomalo bonyana libaginye nemindenabo, amatendabo nakho koke okuphilako okwabalandelako, phakathi kwawo woke ama-Israyeli. 7Njengombana amehlwenu abone yoke imisebenzi emikhulu uSomnini ayenzileko, 8gcinani yoke imiyalo enginiyala ngayo namhlanje. Qinani idolo, ningene nithumbe inarha eniyamela kiyo ukuyithatha bona ibe ngeyenu 9ukuze niphile isikhathi eside endaweni uSomnini ayifungela kiboyihlomkhulu bona uzabanikela yona kanye neenzukulwana zabo. Leyo-ke yinarha egeleza ibisi neliju. 10Ngambala, inarha eningena kiyo kobana niyithumbe ayifani neGibhide eniphuma kiyo, lapha benitjala khona imbewenu kwanga sivande semirorho, niyisezela ngokumodza edakeni; 11kodwana inarha eningena kiyo kobana niyithumbe yinarha yeentaba nemirhoba esezelwa lizulu emkayini. 12Kuyinarha etjhejwa nguSomnini uZimenu, amehlwakhe ahlala akiyo ukusuka ekuthomeni komnyaka bekube sekupheleni kwawo.
13Nakube ngambala nizakulalela imiyalo kaSomnini enginiyala ngayo namhlanje, ukobana nikhathalele uSomnini uZimenu, nimlotjhe ngeenhliziyo zenu zoke nangemiphefumulwenu yoke, 14yena wathembisa bonyana uzakunisa izulu enarhenenu ngesikhathi esifaneleko: izulu lokuthoma nelamuva. Nizakubulunga ikoroyi, iwayini namafuthenu we-oliva; 15godu uSomnini uzakumilisa utjani emirhulenenu kobana ifuywenu ikarule, nina nigome nisuthe.
16Ziyeleleni ningayengwa bese niyaphambuka nilotjhe abosingazimu benibakhothamele 17ngombana itukuthelo kaSomnini izakuvutha phezu kwenu, ivale amazulu ukuze izulu lingasana, inarha ingasakhiqiza ukudla bese nibhubha masinyana enarheni ehle uSomnini aninikele yona.
18Ngalokho bekani amezwami la eenhliziyweni zenu nemiphefumulwenenu; niwabophelele abe njengenyongo ezandleni zenu nanjengomkhala eenhloko zenu abe sikhumbuzo. 19Niwafundise abantwabenu, nikhulume ngawo naniditjhileko emizinenu, nanikhambako endleleni, nanilalako nalokha nanivukako. 20Niwatlole eengosenini zeenkumba zenu nemasangwenenu 21ukuze amalangenu newabantwabenu ande endaweni uSomnini ayifungela kiboyihlomkhulu ukubanikela yona ikani kusaphilwa.
22Naniwulonda ngokupheleleko woke umyalo enginiyala bona niwenze, nikhathalele uSomnini uZimenu, nikhambe eendleleni zakhe zoke benikakarele kuye, 23khona-ke uSomnini uzokuqotjha zoke izizwezi phambi kwenu, nina niphange izizwe ezikulwezo nezinamandla kunani. 24Yoke indawo lapha inyawo lenu ligadanga khona izakuba ngeyenu; umkhawulwenu uzakuthoma erhalawumbeni ngesewula uphelele eLibhanoni ngetlhagwini begodu usuke emlanjeni iYufrathe ngepumalanga ukuya elwandle elingetjingalanga. 25Akunamuntu ozakghona ukujamelana nani; uSomnini uZimenu uzakubeka ukwesabeka nevalo lenu phezu kwayo yoke inarha enibeka kiyo inyawo lenu njengombana anithembisa.
26Qalani, ngibeka namhlanje phambi kwenu isibusiso namanikelela: 27isibusiso, nakube nilalela imiyalo kaSomnini uZimenu enginiyala ngayo namhlanje; 28amanikelela, naningalaleli imiyalo kaSomnini uZimenu, niphambuke endleleni enginiyale ngayo namhlanje, kobana nidlhemadlheme ngemva kwabosingazimu beendawezi. 29Lokha uSomnini uZimenu aniletha enarheni eningena kiyo kobana niyithumbe, nizakubeka isibusiso entabeni iGerizimu nibeke amanikelela entabeni i-Ebali.
30(Iintabezi zingaphetjheya kweJordani ngetjingalanga, zifulathele indlela eya ngetjingalanga, enarheni yamaKanana ahlala emrhobeni weJordani. Iintabezi zingaphetjheya kweGiligali eduze nemithi emikhulu yeMore.)
31Lokha naniyama iJordani kobana ningene nithumbe inarha uSomnini uZimenu aninikela yona nalokha naniyithathako benihlale kiyo, 32tjhejani bona nenza zoke iimiso nemithetho engininikela yona namhlanje.
