UDUTERONOMI 30

₁“Nasele koke lokho kunehlele, okutjho iimbusiso namanikelela engiwabeke phambi kwenu, khibe niphakathi kwezizwe zoke uSomnini uZimenu anihlakazele kizo bese nikufaka ehloko, ₂nibuyele kuSomnini uZimenu, nina nabantwabenu, nilalele ilizwi lakhe ngeenhliziyo zenu nangemiphefumulwenu yoke, kikho koke enginiyala ngakho namhlanje, ₃khona-ke uSomnini uZimenu uzakutjhugulula ubujamo benu, abe nezwelo phezu kwenu. Uzabuye anibuthelele hlangana nabo boke abantu lapha bekanihlakazele khona. ₄Nanyana abaqotjhiweko benu basepelazwe, uSomnini uZimenu uzanibuthelela khonapho, anithathe lapho, ₅anise enarheni yaboyihlomkhulu kobana ibe ngeyenu. Uzaniphumelelisa khulu anandise ukudlula aboyihlomkhulu. ₆USomnini uZimenu uzakusoka iinhliziyo zenu nezeenzukulwana zenu ukuze nimthande ngeenhliziyo zenu ezipheleleko nangemiphefumulwenu yoke. Nanenza njalo nizakuphila. ₇USomnini uZimenu uzakubeka woke amanikelela la phezu kwezitha zenu naphezu kwabanizondako banigijimise. ₈Godu nizakulalela ilizwi lakaSomnini, nigcine yoke imiyalwakhe enginiyala ngayo namhlanje. ₉USomnini uZimenu uzanenza niphumelele khulu kiyo yoke imisebenzi yezandla zenu, ngabantwabenu, ngenzalo yefuywenu nangeenthelo zequlwanenu ngombana uSomnini uzakubuye athabele ukuniphumelelisa njengombana kwabanjalo ngaboyihlomkhulu. ₁₀Lokho kuzakwenzeka nanilalela ilizwi lakaSomnini uZimenu, nigcine imiyalwakhe neemiso zakhe ezitlolwe encwadini yomthetho le, niphendukele kuSomnini uZimenu ngeenhliziyo nangemiphefumulwenu ngokupheleleko.

₁₁“Umyalo enginiyala ngawo lo namhlanje, awusilikhuni kangako kini begodu awusi kude. ₁₂Awusisezulwini bonyana ningathi, ‘Sizakufikelwa ngubani ezulwini ayosithathela wona ukuze siwuzwe besiwenze?’ ₁₃Godu awusingaphetjheya kwelwandle bonyana ningathi, ‘Sizakufikelwa ngubani ngaphetjheya kwelwandle kobana asilethele wona ukuze siwuzwe besiwenze?’ ₁₄Iye, ilizwi liseduze khulu nani, lisemilonyeni neenhliziyweni zenu kobana nilenze.

₁₅“Qalani, ngibeke phambi kwenu namhlanje ukuphila nobuhle, ukufa nobumbi. ₁₆Nanilalela imiyalo kaSomnini uZimenu enginiyala ngayo namhlanje ngokukhathalela uSomnini uZimenu, nikhambe eendleleni zakhe, nigcine imiyalo, iimiso kanye nemithethwakhe, nizakuphila benande. USomnini uZimenu uzanibusisa enarheni eningena kiyo bona niyithumbe. ₁₇Kodwana nakube iinhliziyo zenu ziyahlanuka, ningasalalela bese nidlhemadlhema niyokulotjha abosingazimu nibakhothamele, ₁₈ngiyanitjela namhlanje ngithi nizakubhubha nya, ipilwenu izakuba yifitjhani enarheni eniyama iJordani kobana niyithumbe. ₁₉Ngenza izulu nephasi kobana zibe bofakazi bami namhlanje ngokujamelana nani: Ngibeka phambi kwenu ipilo nokufa, iimbusiso namanikelela. Ngalokho khethani ukuphila ukuze niphile nina neenzukulwana zenu, ₂₀nikhathalele uSomnini uZimenu, nilalele ilizwi lakhe, nikakarele kuye ngombana lokho kukuphila kini nokwanda kwamalanga ukuze nihlale enarheni uSomnini ayifungela kiboyihlomkhulu u-Abrahamu, u-Isaka noJakopo kobana uzabanikela yona.”