UDUTERONOMI 6

₁Le-ke miyalo, okutjho iimiso nemithetho uSomnini uZimenu angiyale bonyana nginifundise ukuze niyenze enarheni enizokungena kiyo niyithumbe. ₂Umnqopho womyalo lo kukobana nesabe uSomnini uZimenu ngokulonda iimiso nemithethwakhe enginiyala ngayo. Yenzeni nina, abantwabenu neenzukulwana zenu imihla yoke yokuphila kwenu ukuze niphile isikhathi eside. ₃Yelelani nina ma-Israyeli niphethe imiyalo ngokupheleleko ukuze koke kunikhambele kuhle enarheni egeleza ibisi neliju, nokobana nande khulu njengombana uSomnini uZimu waboyihlomkhulu anithembisile.

₄Yizwa wena Israyeli! USomnini nguZimethu, nguye yedwa uSomnini. ₅Ngalokho uzakukhathalela uSomnini uZimakho ngayo yoke ihliziywakho, nangomphefumulwakho woke nangawo woke amandlakho. ₆Amezwi la engikuyala ngawo namhlanje azakuba sehliziywenakho. ₇Uwabuyekeze njalo ebantwaneni bakho ngokuzimisela, ukhulume ngawo nawuhlezi emzinakho, nalokha nawukhamba endleleni, nawulalako nalokha nawuvukako. ₈Uzawabopha njengenyongo esandleni nanjengomkhala ehloko abe sikhumbuzo. ₉Uzawatlola egosenini yekumbakho nemasangwenakho.

₁₀USomnini uZimenu uzaningenisa enarheni ayifungela kiboyihlomkhulu, ku-Abrahama, u-Isaka noJakopo. Lokha nayininikela amadorobho amakhulu namahle eningazange niwakhe, ₁₁neenkumba ezizele ipahla ehle eningazange niyisebenzele, imiphathamanzi eningazange niyembe, iindiribe nemithi ye-oliva eningazange niyitjale, nalokha nigoma, nisutha, ₁₂yelelani bona ningakhohlwa uSomnini owanikhupha enarheni yeGibhide, ekumbeni yobukhoboka. ₁₃Yesabani uSomnini uZimenu kwaphela; nimlotjhe benifunge ngebizo lakhe. ₁₄Ningadlhemadlhemi ngemva kwabosingazimu babantu abanibhodileko, ₁₅ngombana uSomnini ophakathi kwenu unguZimu onesikhwele; ubukhali bakhe buzakuvutha phezu kwenu, anirhayile ebusweni bephasi.

₁₆Ningazizinyi uSomnini uZimenu njengombana nenza eMasa. ₁₇Gcinani ngokuzimisela imiyalo kaSomnini uZimenu nobufakazi bakhe neemiso zakhe aniyale ngazo. ₁₈Nenze okulungileko nokuhle phambi kwakaSomnini ukuze izinto zinikhambele kuhle, nokobana nikwazi ukungena nithumbe inarha ehle uSomnini ayifungela kiboyihlomkhulu ₁₉ngokuqotjha zoke izitha zenu phambi kwenu njengombana uSomnini wathembisa.

₂₀Amadodanenu azanibuza ngamunye esikhathini esizako athi: “Butjho ukuthini ubufakazi, iimiso nemithetho uSomnini uZimethu aniyale ngakho?”

₂₁Yeke nizawaphendula nithi: “Sasimakhoboka kaFaro eGibhide, kodwana uSomnini wasikhupha lapho ngesandla esinamandla; ₂₂wasikhombisa iimbonakaliso nemikarisomraro emikhulu nesabekako ngokujamelana noFaro kanye naso soke isigodlo sakhe, siqalile. ₂₃Wasikhupha-ke thina lapho kobana asilethe abe asiphe inarha ayifungela kibobamkhulu. ₂₄Nje-ke uSomnini usiyale bonyana senze yoke imithetho le, ukwesaba uSomnini uZimethu kobana izinto zisikhambele kuhle isikhathi soke, asigcine siphilile njengombana kunjalo namhlanje. ₂₅Lokho kuzakuba buqotho kithi nakube siyelela bonyana senze yoke imiyalo le phambi kwakaSomnini uZimethu njengombana asiyalile.”